Read kumam Mika 5 Bible Online

Mika 5 - kumam bible

Mika 5

¹Yerusalem, jokwor otieko luki! Gin kitieko juto lem ngatel me Isirael kede ebela me lilim.

²Rwot waco be, “In Betelem Epurata, in en bomba acel kikom bomban atitino twatwal me Yuda, do ango abino yero ngapug me Isirael kibuti, ngapug kame diakal kame kobino nywale iye wapere paka tuno i kare kasek.”

³Pi mano, Rwot bino jalo jo mege atatai tuno i kare nono, kare kame dako kame tie ramere me nywal bino nywalo kede wode. Di do jo Isirael kame tie obukui bala mabus ko bino dwogo ribere kede jo Isirael wad gi.

⁴Ka ngapug nono obino, en ebino gwoko jo mege bala kame ngakwat gwoko kede romini. En ebino pugo gi kede teko kame Rwot mie, kede angosibib ka Rwot Rubanga mere. Jo mege bino bedo kede anapakin, piento en ebino bedo dano adwong i wi lobo lung.

⁵En ebino kelo anapakin. Ka jo Asiria oko bino suro lobo wa, di gin kiko turo apama me cel wa, wan obino yero jotel kame romo di oko cwano gi ot yi kede gi.

⁶Gin kibino bwono jo Asiria di kiko donyo pugo gi, en lobo ka Nimurod. Gin kibino lako wa ki cing jo Asiria ka jo Asiria nogo oko suro lobo wa.

⁷Di do donge me jo Isirael kame osasarun i diere me atekerin apat, ko bino bedo cal bala toyo kame Rwot ocwao pi bido lobo, arabo bala kot kame cwei i kom lum, kalikame dano twero timo iye gimoro kwanyo kenekene Rubanga.

⁸Donge me jo Isirael kosasarun i diere me atekerin apat bino bedo cal bala engu kame tie i diere me leini me abum, arabo bala engu owor kame tie i diere me esipan me romini. Ka en ebeo i kom romini esosomo i kom gi di eko nyinyilo gi, abongo ngatamoro kame lako gi.

⁹Jo Isirael bino bwono jokwor gi di kiko muducaro gin dedede.

¹⁰Rwot waco be, “I kare nono ango abino neneko asigiran wu di ako dudubo cabalan wu.

¹¹Ango abino muducaro bomban me lobo wu di ako rereto piny kabedere wu dedede kame kocelo di tek.

¹²Abino jiko tim me jwok kibutu, doko likame ibinunu bedo tie kede jo kame lamuso gagi.

¹³Ango abino muducaro caljwogi wu kede kide kame kosipo kame koworo; likame ibinunu bobo woro jamini kame itimunu kede cingu.

¹⁴Abino puputo cal me rubanga Asera ki diere wu di ako muducaro bomban wu.

¹⁵Ango abino timo onyanga kede twon gero, i kom atekerin dedede kalikame oko lubo kop na.”