Read kumam Mika 6 Bible Online

Mika 6 - kumam bible

Mika 6

¹Winyunu kop kame Rwot tie waco. En ewaco be, “Yaunu malo di ikounu mino pido wu; mito imukuran kede mori winy kop kame wun iwacunu.”

²Wun mori kede acakini me lobo kame bedo nakanaka, winyunu pido kame Rwot tie kede i kom jo mege! En etie pido jo Isirael.

³Rwot penyere be, “Okwe wun jo na, nyo kara kame ango atimo ne wu? Nyo kame ango aolo wu kede? Wacanu!

⁴Ango akwanyo wu ki lobo me Misiri, di ako lako wu ki ipasun. Ango ako cwano Musa, Aaron kede Miriamu pi telo wu.

⁵Okwe wun jo na, kong yutununu gikame Abaka Balak me Moab bin oiko pi timo i komu, kede epone kame Balaam wot ka Beor oko gamo kede doge. Yutununu da gikame bin oko timere i yongayo, cako ki Akasia tuno Giligal. Yutununu gi nogi tetekeny iniangunu i kom gikame bin ango Rwot ako timo pi lako wu.”

⁶Kara nyo kame ango abino tero but Rwot, Rubanga me malo, kame aoto wore? Benyo, abin aot i nyime di atero giayala awanga me roya me mwaka acel?

⁷Benyo, cuny Rwot bino bedo yom ka ango atero bute romini tutumian kede tutumian, arabo icileta kame bedo mol mo me olibeti nakanaka? Benyo, abin amie atin kao na bala giayala pi gikareco na?

⁸Okwe in wot dano, Rwot otieko waco ni gikame ber. Gikame en emito ki buti en ine: in bedo timo gime ateni, nyuto amara kalikame lokere, kede mwolere bedo timo gikame Rubanga ni mito.

⁹Lworo Rwot obedo tim me rieko. En elwongere but jo kame tie i bomba be, “Winyunu, wun jo kocokere i bomba!

¹⁰Benyo, iparunu be wia twero wil kede jamini kame koudo i yore kalikame ber, jamini kame tie i ude me jotim gikareco, kede gipim kame kokwalo kede jo, gikame cunya dagi?

¹¹Benyo benyo kame ango atwero sasiro kede jo kame tio kede misanin areco, kede kame tio kede kide me misani kame sero jo?

¹²Jo ni kobaro tero jocan kirac, doko gin dedede kiyamo kope me angalo kenekene.

¹³Pi mano, ango atieko cako tojo wu, abino mino wu idongunu nono pi dub wu.

¹⁴Ibinunu cam, do likame ibinunu yeng, ibinunu dong di iwinyunu kec kamanono. Ibinunu kano jamini do likame ibinunu twero gwoko gi, doko gikame ibinunu gwoko, ango abino kelo yi muducaro gi.

¹⁵Ibinunu cuno kodi, do likame ibinunu kano gikame icuwunu nogo. Ibinunu biino anyakini me olibeti do likame ibinunu tic kede mo nono. Ibinunu biino anyakini me olok do likame ibinunu mato bwini nono.

¹⁶Manoni bino timere pien in Yerusalem ibedo lubo iswilia ka Abaka Omiri, kede tim dedede me ot ka Abaka Akab, doko in ibedo lubo tam gi. Pi mano, ango abino mini idong nono, di jo ni ko bino doko jo kame koyisiro kede acae. Aso, in ibino kanyakino anyera me atekerin dedede.”