Read kumam Mika 7 Bible Online

Mika 7 - kumam bible

Mika 7

¹Okwe can! Ango atieko doko cal bala dano kame kec oneko di eko ot mono anyakini i wi yat, di likame eko udo moro, pien jo otieko raro olok koudo odong. Likame tie abunge moro me olok arabo anyakini moro me epigi kame cunya oudo mito ngwedo.

²Jo kame genere otieko doko li i lobo, likame tie ngatamoro kodong kame timo gi kopoore. Jo dedede maro kino jowot gi pi neko. Ngat acelacel tie dwaro ngat ocelu emito make.

³Gin dedede kitie jo ipirana i timo gikarac. Jotel kede jongolkop penyo cemusana. Jo kame koworo waco ne jotel gikame gin kimito, di gin kiko iiko tam pi ngolo kop kalikame tie me ateni.

⁴Akadi ngat aber twatwal kikom gi da kony mere li bala okuto me ocokocok. Kare me mino gi alola otieko tuno, bala kame inabin jo akio piny bin okwenyaro kede. Nataman gin kitieko babangun.

⁵Kur iket geni i kom adieri moro, arabo ngatamoro kame imaro. Gwok kop kame iwaco akadi but dako ni.

⁶Pien i kare nogi awobe tero papi gi bala jomingo, anyira piemo kede toti gi, mon kame konyomo da cuny gi dagi toti ka cwog gi. Ngakwor ka dano obedo jo me ode.

⁷Do ango gira abino geno Rwot; abino kuro Rubanga pi laka. Rubanga na bino winyo kwac na.

⁸Okwe wun jokwor na, kur ilelunu i wia. Ka ango apoto, ango abino bobo yai. Ka ango ako bedo kakacol, Rwot en kame bino mina lero.

⁹Ango atimo dub but Rwot, pi manono, ango miero akany lilo mere, tuno en gango kop na di eko ngolo kop me ateni, pi gi dedede kame kotimo i koma. En ebino kela ooko i lero; ango abino neno ngolo kop me ateni mere.

¹⁰Di do jokwor na kobino neno manoni di lewic ko mako, gin jo kame oudo kipenya be, “Kara ani Rwot Rubanga ni nono?” Ango abino neno kede wanga di kobwono gi, di konyonyono gi piny bala cwoto me yongayo.

¹¹Wun jo me Yerusalem, kare me gero apama me bomba wu tie bino. I kare nono kobino nyano ikor wu.

¹²Joe wu bino bino butu yai ki Asiria, Misiri ape tuno i ecilet me Eupurate, kibino yai ki name kede ki mori me kakaboco.

¹³Lobere nogo bino dong nono pi gikareco me jo kame bedo i yi gi.

¹⁴Okwe Rwot, kwai jo ni bala romini kede ebela ni me kwat, jo kobedo megi kame iyero. Bed bala gin kitie bedo ken gi i abum, do lobo amio orimaro gi. Mito gin kiot cam Basan kede Gilead bala i kare kasek.

¹⁵Tim ne wan giaura mogo, bala kame bin itimo i kare kame bin ikwanyo wa kede ki Misiri.

¹⁶Atekerin bino neno manoni di lewic ko mako gi pi kony me teko gi li. Kom gi bino to di likame kiko twero yamo arabo winyo kop.

¹⁷Gin kibino liao alia i lobo bala twole di kimoko apua; gin kibino wok ki kapwono gi kame kocelo di tek di kom gi miel pi lworo. Gin kibino bedo kede lworo atek but in Rwot Rubanga wa.

¹⁸Okwe Rwot, likame tie rubanga moro kame cal bala in; in isasiro dub me donge me jo ni. In likame idong di ililo nakanaka, pien in cunyi yom pi nyuto amara ni kalikame lokere.

¹⁹In bobo ibino bedo kede cuny me kisa i kom wa. In ibino nyono dub wa i tieni piny di iko lwomo gi i dud nam kakatut.

²⁰In ibino nyuto genere ni kalikame yangere but ikwae ka Yakobo kede Aburam, bala kame riki ikwongere kede but joakwari wa i kare kasek.