Read kumam Nakum 2 Bible Online

Nakum 2 - kumam bible

Nakum 2

¹Ninebe, ngat kame ngingido in otieko bino pi suri. Ket isirikalen ni dar wi apama ni me cel! Darunu yongayo! Cok teko ni lung di iko iikere pi yi!

²(Rwot oyapuno dwoko deyo me jo Yuda, karacel kede me jo Isirael, bed bala joyak otieko yako gi pitipit.)

³Isirikalen me jokwor mako ibukui akwar, doko kingapo igoen akwar. Cabalan gi meny bala mac i ceng kame gin kitie iiko gi kede me yi; asigiran gi cuny gi lelepa di kidaro ot yi.

⁴Cabalan ringo i yote bala kipoi, kiringo tuni tuni di kibeo i yote alac. Gin kimeny bala mac me rau, kiketo wil wil bala meny me kot.

⁵Kolwongo jotel me isirikalen; gin kigete di kioto anyim. Gin kionyaro ot i apama me cel di kiko gero gikame galao gi ki kide kame kouco piny ki wi apama me bomba.

⁶Irutei kame tie i bad me ecilet oyabere; lworo atek omako paco ka abaka.

⁷Komako dako ka abaka di oko tero bala mabus; mon jotic mege kok bala aweleko di kibapo kor gi pi paro can.

⁸Ninebe cal bala atapar kodipere mol. Jo tie onyaro tenge kiye! Ngatamoro lelemo be, “Cungunu! Cungunu!” Do likame tie ngatamoro kame ngoloro cen.

⁹Yakunu siliba! Yakunu saabu! Jamini me wel, me epone dedede opong i bomba!

¹⁰Kotieko muducaro Ninebe, kotieko weke edong nono! Cuny jo onyote piris pi lworo; cong gi miel teltel, teko gi otiek; nyim jo dedede olokere.

¹¹Kara bomba noni kame oudo cal bala abo me inguon tie tuai? En oudo ecal bala kabedo kame inguon pito kiye idwe gi, kabedo kame engu adako kede engu icuo oto iye di idwe gi ko bedo abongo peko moro.

¹²Engu otieko neko le mere me acama doko etieko nyinyilo en ne dako mere kede idwe mege; en etieko pongo ringo kame enyinyilo i abo mere.

¹³Rwot me jo yi waco be, “Ninebe, ango en ngakwor ni! Ango abino wango cabalan ni. Kobino neko isirikalen ni i yi. In likame bobo ibino yako ateker moro i wi lobo, doko likame ibino cwano joor ni ot titimo ateker moro.”