Read kumam Nakum 3 Bible Online

Nakum 3 - kumam bible

Nakum 3

¹In tin itie i can benyo! In bomba kame nganek, bomba kopong kede angalo, kede jamini kame koyako; bomba kame yak mere likame jik.

²Winyi! Koko me ebela me del, mor me namisigan, itakar me asigiran, kede mor me cabalan kame tie ringini!

³Isirikalen kame ringo kede asigiran tie bino yi, ipimai milimilun, tongini meny! Kokumemo liele, kom jo oto kalikame marere, kame jo do gete i kom gi!

⁴Kotie mino Ninebe alola pi tim mere me malaya. En ecil doko etie kede yen atek me apipan, en epipao atekerin di eko mino gi kidoko ipasoi.

⁵Rwot Ngakaruno waco be, “Ninebe, ango en ngakwor ni! Ango abino elaro egoe ni malo i wii; di ako mino atekerin kede ajakanuto neni di itie nono, lewic bino maki di gin kineni.

⁶Ango abino bwoto yugi i komi di ako timo ni tim me acae. Abino mini idoko gikame jo neno kede acae.

⁷Jo dedede kame bino neni bino lokere dok cen di kiwaco be, ‘Kotieko tiatiao bomba me Ninebe piny! Ngai kame bino koke? Ngai kame bino mito kweno cunye?’ ”

⁸Ninebe, benyo, iparo be in iber ilo bomba me Tebes? En oudo etie i nget ecilet me Nail, di pii oluke diere bala apama me cel mere.

⁹Teko mere oudo cungo i kom Abisinia kede Misiri, doko oudo likame ejik; Put kede Libiya en koudo konye.

¹⁰Akadi kamanono da, bin oko tero jo me Tebes i piny me obukui bala mabus. Idwe gi bin koneneko i buli kona me gudo me bomba. Cuo kame bin koworo kibut gi, bin kotero di kotweo kede irikoi. Jo komako gi bin uco alulu me popoko gi.

¹¹Ninebe, ida ibino mer! Ibino tamo mito bwot ki cing jokwor ni.

¹²Bomban ni kame kocelo kede apama atek dedede bino doko cal bala yen me epigi kame tie kede anyakini kocek. Ka koyayango yen, anyakini kocek me acama popoto i dog jokwor.

¹³Nen kong isirikalen ni! Gin kical bala mon, doko piny ni tie twolo ne jokwor ni. Mac bino wango alorito kame kocego kede irutei ni.

¹⁴Twomunu pii cuto, pien jokwor bino luko bomba, iikunu apama bed tek! Nyonunu lobo me timo matapali, di ikounu mako atubai me gono matapali.

¹⁵Akadi itimunu benyo, pwodi kobino wango wu paka to, doko kobino neko wu i yi. Kobino weno wu pitipit bala poto kame obonyo ocamo. Wun oudo inywalunu bala obonyo!

¹⁶Wel me jocat wil wu oudo omeede kalamo wel me acerin kame tie i edou. Do nataman gin kitieko yai bala obonyo kame camo jamini dedede di girgi kiko por ot tenge.

¹⁷Jodar wu cal bala obonyo kame oony i wi apama i ceng kame piny ngic kede. Do ka ceng oko neeno, gin kipor di kiko ot tenge, di likame tie dano moro kame ngeo kakame gin kioto iye.

¹⁸Okwe in abaka me Asiria, jo kame konyi pug oto, doko jo ni kame koworo otieko nino atwal! Jo ni osasarun i wi mori abongo ngatamoro kame bino bobo dwoko gi paco.

¹⁹Awanon nin likame muketikin, doko aporeso nin likame cango. Jo dedede kame winyo rwonge me amuducar nin bapo cing gi pi kilel. Pien ngai kame oko bwot ki tim nin me gero kalikame jik nono?