Read kumam Abakuk 1 Bible Online

Abakuk 1 - kumam bible

Abakuk 1

¹Man en kop ka Rubanga kame enyuto but enabi Abakuk.

²Okwe Rwot kara abino tero kare kame rom amene di akok buti pi mito kony, en kame mio iko winyo di iko lako wa i tim me gero noni?

³Pinyo bo komio in imia aneno peko kame cal kaman? Pinyo komio in ineno anena tim arac kamano? Amuducar kede tim me gero odure i nyima, doko yi kede lok tie kabedere dedede.

⁴Iswil otieko doko goro, doko likame kongolo kop kakare. Jo areco nakanaka lo jo kopoore i pido, pi manono ngolo kop me ateni likame tie.

⁵Di do Rwot oko dwoko ne jo mege be, “Bedunu ngico atekerin koluko wu, di ikounu bino bedo kede ur i kom gikame ibinunu neno. Ango ayaro timo gimoro kalikame ibinunu yei ka kowaco ne wu kop i kome.

⁶Ango atie mino jo Babilon doko tek, gin jogero kame kom gi mit. Gin kibino sirito ot kabedere dedede me wi lobo di kiko bwono jo me lobere apat.

⁷Gin kikelo ne jo lworo atek; kiwakere di kitamo be gi dedede kame gin kitimo opoore, doko likame turo iswil moro.

⁸“Asigiran gin dwir kato irisai, doko kiger kato ipeon kame kec oneko. Joe gi kame ringo kede asigiran ringini kibino ki kakabor; asigiran gin takaro. Gin kipor kede ringo bala ekokom kame mwomere i kom gikame emito mako me acama.

⁹“Gin dedede kibino kede tim me gero, di kiko coko jo kame kimako di tot bala asinge.

¹⁰Gin kicao abakai, doko kinyero jopug anyera. Kineno apama me cel me bomba di kiko nyero anyera, di kiko toro lobo i ngete di kiko mane.

¹¹Di do gin kiko beo awakawaka bala yamo di kiko kato, gin jodubo kame teko gi en kobedo rubanga gi.”

¹²Okwe Rwot Rubanga na, Ngat Kacil, in en ibedo Rubanga cako i kare kasek, in ibedo nakanaka. Rwot, Rubanga na kede ngagwok na, in itieko yero jo Babilon di iko mino gi teko me mino wan alola.

¹³In ibedo ngat kacil, pi manono likame iromo kanyakino neno gikarac, doko in likame iromo neno anena tim arac. Pinyo kara komio in itie ling alinga di jo areco tie muducaro jo kopoore kato gin?

¹⁴Benyo benyo kame in itero kede jo bala odoko dek me nam, arabo bala gimogo kame liao alia i piny, gikame li kede ngatel?

¹⁵Jo Babilon kodo jo kede golu, ineno bala jo odoko aporogo. Gin kiwao gi kede bwoi, kigalalo gi i kokoto, di kiko tero gi di kilelebo.

¹⁶Pi mano, gin kimio giayala but bwoini kede kokoto gi, pien magonogo mio gi abar kede cam abeco.

¹⁷Benyo, gin do mam poore kibed gonyo aporogon ki bwoini gi kamanono, di kimuducaro atekerin abongo kisa moro i cuny gi?