Read kumam Sepania 1 Bible Online

Sepania 1 - kumam bible

Sepania 1

¹Manoni en kop kame Rwot bin omio Sepania i kare kame Yosia wot ka Amon en koudo tie abaka me Yuda. (Sepania oudo obedo wot ka Kusi, Kusi wot ka Gedalia, Gedalia wot ka Amaria, Amaria wot ka Abaka Esekia.)

²Rwot oko waco be, “Ango abino weno jamini dedede kame tie i wi lobo,

³jo kede leini, winy kede dek nam. Jo dedede kame timo gikareco ango abino mino kobwono gi. Abino tieko jo dedede i wi lobo, di likame tie dano moro kame ko bino dong. Ango Rwot atieko waco.

⁴“Ango abino mino jo me Yerusalem kede jo me Yuda dedede alola. Abino tieko jo kame woro Baal kame pwodi odong kabedo noni, di likame tie ngatamoro kame ko bino yutuno nying josaseredoti mege.

⁵Likame bobo kobino udo akadi dano moro acel kame yito i wi ot woro ceng, duwe, kede acerin, arabo jo kame wora di kikwongere pi lubo kop na, do di bobo kikwongere i nying rubanga Molek da.

⁶Ango abino muducaro jo kotieko lokere dok cen di kiko weko luba, gin jo kalikame bobo kibino buta, doko da likame kikwaa pi mino gi tam.”

⁷Lingunu titi i nyim Rwot Rubanga, pien ceng kame Rwot bino ngolo kede kop ne jo oyapuno tuno. Rwot tie iiko leini kame kobino ngolo bala giayala, doko etieko lwongo jokwor pi bino yako Yuda.

⁸Rwot waco be, “I ceng me nek nono, ango abino mino jotel kede idwe ka abaka alola, karacel kede jo dedede kame lubo itok me atekerin me obukui.

⁹I ceng nono ango abino mino jo dedede kame woro caljwogi alola, karacel kede jo kame pongo ot ka ngadwong gi kede jamini kame kiudo i yore me gero kede pi tim me angalo.”

¹⁰Rwot waco be, “Ceng nono ibinunu winyo di jo kok ki Erute me Aporogo i Yerusalem. Ibinunu winyo di jo wololo koko i adul anyen me bomba, kede mor me ude apopoto piny ki wi imukuran.

¹¹Wololonu koko wun jo kame bedo i adul kame tie pipiny me bomba, pien jocat wil dedede kobino neko.

¹²“I kare nono ango abino pekeso Yerusalem di atio kede etala. Abino mino alola but jo kame tie bedo mot abongo paro kop moro, jo kame waco i cuny gi be, ‘Rwot likame bino timo gimoro aber, doko da likame ebino timo gimoro arac.’

¹³Kobino yako abar gi, di oko dudubo ude gi. Akadi kiger ude, do likame kibino bedo i yi gi. Akadi kipur olok, do likame kibino mato bwini gi.”

¹⁴Ceng adwong ka Rwot odoko iyapiyapi, etie tuno awakawaka. Ceng nono bino bedo ceng me lito, akadi sirikale atek i yi da bino boroboro koko.

¹⁵Ceng nono bino bedo ceng me gero ka Rubanga, ceng me peko kede me mwodo lak, ceng me dudubo kede me muducaro, ceng kame colpiny mere cucucuc, ceng kame col cucucuc di eumere kede idoun,

¹⁶ceng me kuto agwara me yi kede me ilelem me isirikalen kame tie suro bomba kame kocelo, kede gedo aboco malo.

¹⁷Rwot waco be, “Ango abino mino jo neno can kame bino mino jo dedede rarapo piny bala imuduka. Gin kitieko timo dub buta, aso nataman kobino onyo remo gin bala pii, doko liele gi bino top bala woyo.”

¹⁸I ceng me gero ka Rwot, akadi siliba gi arabo saabu gi likame bino lako gi. Mac me gero ka Rwot bino muducaro wi lobo lung. En ebino ngeso jiko kuo me jo dedede kame bedo i wi lobo.