Read kumam Sepania 3 Bible Online

Sepania 3 - kumam bible

Sepania 3

¹Itie ican, in bomba kame ikiteso me jo ni odubere, di kibedo jojemo, kede di kitero jo icegun kirac.

²Likame gin kiwinyo kop ka ngatamoroni, doko likame kiyei be iik gi. Gin likame kiketo gen gi i kom Rwot, doko likame kikwae pi konyo gi.

³Jotel mege cal bala inguon kame dorano; jongolkop mege cal bala ipeon kame tie dwar wang otieno, kalikame weko cogo moro dong tuno odiko.

⁴Inabin me Yerusalem yamo atatai, likame kigenere; josaseredoti munao gikacil, di kiko loloko iswil ka Rubanga pi gin timo gikame kimito.

⁵Do Rwot pwodi tie i bomba me Yerusalem; en etimo gikame poore do weko gikarac. Buli odiko en enyuto ngolo kop me ateni mere but jo mege abongo keng. Do di jo areco kame tie i bomba kanono meede ameda kede timo gikarac abongo lewic.

⁶Rwot waco be, “Ango atieko muducaro atekerin atot; amuducaro bomban gi di ako weko apama me cel gi kede gedo gi abocoboco malo di opopoto. Jo otieko yai oweko bomban gi; gudi me bomban gi da odong nono abongo jo.

⁷Ango oudo atamo be manono ateteni bino mino jo me Yerusalem lwora, di kiko yei lubo pwony na, doko da be wi gi koto likame oko wil kede gi dedede kame ango oudo atimo negi. Do gin di do kiko meede ameda kede mitkom, i timo gikareco kame oudo kibedo timo.”

⁸Rwot waco be, “Kong kurunu. Kurunu ceng kame ango abino pido kede atekerin. Ango atieko moko tam na pi coko atekerin kede ajakanuto dedede karacel, tetekeny abwot lilo na i kom gi. Ango abino doko ger di ako muducaro wi lobo lung.

⁹“I kare nono ango abino loko kope kame wok ki dog jo me atekerin, tetekeny jo dedede wora di kitimo tic na kede cuny acel.

¹⁰Akadi ki loka tetuca me icileta me Abisinia, jo na kame osasarun bino kelo giayala buta.

¹¹I kare nono likame kobino mino lewic mako wu pi tim wu me jemo na. Ango abino kwanyo tenge ki diere wu jo kame wakere di kingato kitek, di wun likame bobo ikounu bino jemo na i wi moru na kacil.

¹²Ango abino weko dong i diere wu jo kame mwolere di kijocan. Gin kibino bino buta mono kony.

¹³Jo Isirael kame bino dong kuo likame bino timo gimoro arac, likame kibino waco kop moro me angalo, doko likame kibino tamo ngalo dano moro. Gin kibino cam di kiko buto wei abongo ngatamoro mino gi lworo.”

¹⁴Werunu di igounu mujira pi kilel, Okwe wun jo Isirael! Lelunu kede cuny wu lung, Okwe wun jo me Yerusalem!

¹⁵Rwot otieko jiko alola wu; en etieko riamo jokwor wu tenge. Rwot, abaka me Isirael tie kede wu; likame bobo ibinunu lworo peko moro.

¹⁶Kare tie bino kame kobino waco ne kede Yerusalem be, “Kur ibed kede lworo moro, Okwe bomba me Sion! Kur lworo mi ibed goro!

¹⁷Rwot Rubanga wu tie kede wu; ibinunu bwono jokwor wu pi teko mere. Cunye bino bedo yom kede wu, en ebino mino wu kuo anyen pi amara mere; ebino wer di elelo piru

¹⁸bala i ceng me ebaga.” Rwot waco be, “Ango likame bobo abino mino kotimo ne wu can moro, doko atieko kwanyo tenge lewic wu.

¹⁹I kare nono ango abino mino jo kame tero wu kirac alola. Abino lako ingwalasa dedede di ako dwoko i paco jo koudo tie obukui. Ango abino loko kuo gi me lewic doko me wor, di jo me wi lobo lung ko bino pako gi.

²⁰I kare nono ango abino dwoko paco jo wu kame nataman osasarun; ango abino mino nying wu bedo iruo i wi lobo lung di bobo ako mino wu abar; ango Rwot atieko waco.”