Read kumam Agai 1 Bible Online

Agai 1 - kumam bible

Agai 1

¹I mwaka me are me Abaka Darias bedo ngapug me Pasia, i buto duwe acel me duwe me kanyape, Rwot oko mino Agai kop kame poore ewac ne ngapug me Yuda, Serubabel wot ka Selatiel, kede ne Ngatel me Josaseredoti, Yosua wot ka Yekosadoki.

²Rwot me jo yi oko waco ne Agai be, “Jo nogi tie waco be kare pwodi likame oromo me bobo gero tempulo.”

³Rwot oko waco ne enabi Agai be ewace jo be,

⁴“Wun jo na, pinyo kame mio wun miero ibedunu i ude kame kogero kiber do di tempulo na bedo di epopoto?

⁵Nenunu kong gikame tie timere ne wu!

⁶Wun icuunu kodi atot, do iudunu kac anonok; icamunu, do likame iyengunu; imatunu bwini do likame eromo wu; ingapunu igoen do likame kiobo komu; doko jo kame camo musala kikom wu, ineno bala kirwako sente gi i yi isaun kotutucun.

⁷Nenunu kong gikame tie timere ne wu!

⁸Aso, nataman yitunu i wi emukura di ikounu kelo yen, di ikounu gero tempulo; di do ango cunya ko bino bedo yom, di jo ko bino wora iepone kame poore keda.

⁹“Wun oudo itienu kede gen me kano kac adwong, do ikounu udo gikame titidi. Kakame ikounu tero kede gikame ikaunu nono paco, ango ako mine edubere. Pinyo bo komio ango ako timo kamanono? Ango atimo manono pien oda odong di edubere, do di wun ngat acelacel kome mit gero ode.

¹⁰Manono en komio kot li, doko lobo da likame ceko cam.

¹¹Ango atieko mino piny dedede otuo; wi imukuran, poti me engano, poti me olok kede me olibeti. Tuo me piny noni bino kelo peko i kom jamini apura dedede, jo kede leini. Ebino mino cane wu bedo me nono.”

¹²Di do Serubabel kede Yosua, kede jo dedede koudo odwogo ki Babilon, kakame oudo kitie iye bala mabus, oko timo gikame oudo Rwot Rubanga gi owaco negi. Lworo bin omako jo di gin kiko lubo kop kame Agai, ngaor ka Rwot owaco negi.

¹³Di do Agai oko waco ne jo be Rwot oudo otieko cikere pi bedo tie kede gi.

¹⁴Rwot oko mino jo obedo kede cuny me timo tic me tempulo: Serubabel, ngapug me Yuda; Yosua, Ngatel me Josaseredoti, kede jo dedede koudo odwogo ki obukui. Gin bin kiko cako tic me tempulo ka Rwot me jo yi, Rubanga gi,

¹⁵i buto duwe ot are kiwie ongwon me duwe me kanyape, i mwaka me are me apugan ka Darias.