Read kumam Sakaria 1 Bible Online

Sakaria 1 - kumam bible

Sakaria 1

¹I duwe me kanyauni me mwaka me are me apugan ka Darias bala abaka me Pasia, Rwot oko mino kop mere but Sakaria wot ka Berekia, en bin akwar Ido.

²En ewaco ne Sakaria pi waco ne jo be, “Ango Rwot cunya oudo owang twatwal kede joakwari wu,

³do nan atie waco ne wu be, ‘Dwogunu buta di ada ako bino dwogo butu, ango Rwot me jo yi en awaco.

⁴Kur ibedunu bala joakwari wu, kame bin inabin owaco negi kop na, pi weko yote kede tice gi areco, do gin kiko dagi winyo kop na.

⁵Joakwari wu kede inabin nogo otieko totoun.

⁶Ango bin ako mino joakwari wu cik kede ikwenyar kibut inabin, do gin likame kiko lubo gi, di kiko beo i can pi manono. Di do gin kiko swilaro, di kiyei be ango Rwot amio gi alola pi yote kede tice gi areco, bala kame oudo atieko iiko.’ ”

⁷I ceng me ot are kiwie ongwon me duwe me tomon kiwie acel, en duwe me Sebat, i mwaka me are me apugan ka Darias, Rwot oko mina, ango Sakaria kop mere i gianyuta kotimere iwor.

⁸Ango aneno ngatamoro di etie ringo kede asigira akwar. En eko cungo i diere me yen maitol kame oudo tie i aditot; cen ngee oudo tie iye asigiran ace akwar, eleli eleli kede atar.

⁹Ango ako penyere be, “Adwong, asigiran gi nyuto nyo?” Malaika koyamo keda oko dwoko na be, “Ango abino nyuto ni dwong gi.”

¹⁰Aso icuo nono koudo tie cungo i diere me yen maitol oko waco be, “Gin en kame Rwot ocwao gi ot mamano wi lobo.”

¹¹Asigiran nogo oko waco ne malaika nono kame oudo tie cungo i diere me yen maitol be, “Wan otieko mamano wi lobo dedede di oko udo be wi lobo dedede tie okwei, di etie kede anapakin.”

¹²Malaika ka Rwot oko waco be, “Rwot me jo yi, in nan cunyi obedo wang kede Yerusalem kede bomban me Yuda pi mwakini ot kanyaare. Ibino meede kamanono pi kare arom kamene di pwodi likame inyuto negi cuny me kisa?”

¹³Rwot oko dwoko kop ne malaika koyamo keda nono kop me kisa kede kame dio cuny.

¹⁴Aso malaika nono oko waco na pi ot rabo kop kame Rwot me jo yi oudo owaco be, “Ango atie kede nyeko pi Yerusalem kede Sion.

¹⁵Gero omaka kitek twatwal i kom atekerin kame bedo di ilajara kede anapakin. Pien kakame gero nango oudo titidi kede, gin kiko mino can kame jo tie iye omeede ameda.

¹⁶Pi manono, ango Rwot atie waco be, ango nan atieko dwogo Yerusalem kede cuny me kisa. Kobino gero tempulo na, di oko temuno gero bomba.”

¹⁷Malaika oko doko waco na pi rabo ne jo kop awaco be, “Rwot me jo yi waco be bomban mege bino bobo pong kede abar, kede be en ebino bobo kweno cuny Sion di eko yero Yerusalem bedo bomba mere.”

¹⁸I gianyuta ace ango ako bobo neno tung leini ongwon.

¹⁹Ango ako penyo malaika koudo tie yamo keda be, “Magi obedo nyo?” En eko dwoko na be, “Magi obedo tung leini kosarakino jo me Yuda, Isirael kede Yerusalem.”

²⁰Di Rwot oko nyuto na jotet ongwon.

²¹Ango ako penyere be, “Jogo tie bino timo nyo?” En eko dwoko na be, “Gin kibino pi mino lworo kede pi bwono atekerin kopudao lobo me Yuda atwal atwala di kiko sasaro jo mege.”