Read kumam Sakaria 10 Bible Online

Sakaria 10 - kumam bible

Sakaria 10

¹Penyunu Rwot kot i kare me iporo, pien Rwot en kame cwao idoun me kot; en kame emio wu kot di eko mino kodere dongo i poti me jo dedede.

²Jo penyo caljwogi kede imuroko, do gin kiwaco ne gi kope me abe kede kame kony gi li. Jo mogo gonyo lek me abe di kiko mino kweicuny akony mere li. Pi manono jo tiang ot atatai bala romini korwenyo; ki li kede ngakwat.

³Rwot waco be, “Ango atie kede gero but jokumbor kame pugo jo na; ango abino mino gi alola. Jo me Yuda obedo mega, ango Rwot me jo yi abino gwoko gi; abino mino gi kibedo bala asigiran atek me yi.

⁴Kibut gi bino wok kiye ngatel kame tek bala kidi me esonda me ot, kede bala loc kame koguro me gero eema, kede bala tir me emal, kede da bino wok kibut gi jodongo dedede me Isirikalen.

⁵Jo me Yuda dedede karacel bino bedo cal bala jo yi kame nyonyono jokwor gi i cwoto me gudi me bomba. Gin kibino yi pien Rwot udo tie kede gi, di kiko bino mino lewic mako jokwor gi aringo kede asigiran.” En ewaco be,

⁶“Ango abino mino jo me Yuda bedo tek di ako bino lako jo me Isirael. Ango kisa bino maka kede gi di ako bino dwoko gi paco. Gin kibino bedo bala jo kalikame ango oudo adagi, pien ango en Rwot Rubanga gi; abino gamo ilega gi.

⁷Di jo me Isirael ko bino doko bala jo yi, di cuny gi ko bedo yom bala kimato bwini. Idwe gi bino neno manoni di cuny gi ko kilel, cuny gi bino bedo yom pi gikame ango Rwot atimo.

⁸“Ango abino gweto gi di gin kiko cokere karacel, pien ango atieko lako gi; doko kibino bedo tot kalamo wel gi angoce sek.

⁹Bed bala ango asasaro gi i diere me atekerin, do gin kibino yutuno ango akadi ki kakaboco kugonogo; Gin kibino pito idwe gi di kiko bino dwogo paco karacel.

¹⁰Ango abino dwoko gi paco ki lobo me Misiri, abino coko gi ki lobo me Asiria. Abino kelo gi i lobo me Gilead kede Lebanon da, tuno di kitieko pong kiculo kabedere dedede.

¹¹Gin kibino beo i peko bala ngolo nam adwong, ango Rwot abino juto ebuka di eko kwei, di pii atut me ecilet me Nail ko bino tuo. Kobino dwoko piny ewaka me Asiria, di twer kame Misiri tie kede ko bino tiek.

¹²Ango abino mino jo na bedo tek, di gin kiko bino donyo lubo kop na. Ango Rwot en awaco!”