Read kumam Sakaria 11 Bible Online

Sakaria 11 - kumam bible

Sakaria 11

¹Lebanon, yab ikekon ni tetekeny mac wang yen seda ni.

²Kokunu kitek wun yen saipuras, pien seda otieko popoto, kotieko dudubo yen me deyo nogo! Kokunu kitek wun yen oak me Basan, pien kotieko tongo piny abum koudo oduko.

³Winy koko me jokwat; pien deyo gi otiek! Winy dorano me inguon; pien kotieko dudubo abumiok me Yorodan, en paco gi.

⁴Rwot Rubanga owaco na be, “Porere bedo ngakwat me romini kame koyaro ngongolo.

⁵Jo kame wilo gi neko gi di likame kiko udo alola moro. Jo kame cato gi waco be, ‘Pak bed but Rwot, pien atieko baro!’ Akadi jo kame kwao gi da likame tie kede cuny me kisa i kom gi.”

⁶(Rwot owaco be, “Likame doko ango abino bedo kede cuny me kisa i kom jo kame bedo i wi lobo. Abino jalo ngat acelacel i cing ngakio mere kede i cing abaka; gin kibino dudubo wi lobo di likame ango ako bino lako ngatamoro ki cing gi.”)

⁷Kawang jo kame wilo kede kame cato romini, ango ako doko ngakwat me romini kame oudo koyaro ngongolo. Ango ako kwanyo ibelai are: acel acako ne nyinge be “Kisa”, ocelu ako lwongo be “Ariba”. Di ango ako donyo kwano romini nogo.

⁸Ango likame ako twero kanyakino kede jokwat adek ace koudo daga, di ango ako weko gin dedede i duwe acel.

⁹Ango ako waco ne romini be, “Ango doko likame abino bedo ngakwat wu. Oromo amito to, etoi; kede kame komito muducaro, muducaro en. Di romini kame bino dong ko camere ken gi.”

¹⁰Ango ako kwanyo ebela na kame alwongo be “Kisa” di ako ture, pi jiko isikan kame Rwot oudo otimo kede atekerin dedede.

¹¹Aso oko bin jiko isikan nono i ceng nono. Jo koudo tie cato kede wilo romini oudo tie nena, di gin kiko ngeno be Rwot oudo tie yamo i gikame ango oudo atie timo.

¹²Ango ako waco negi be, “Ka inenunu be eber, mianu cul na; do ka li, dongunu kede.” Aso gin kiko cula siliba akaya ot adek.

¹³Di Rwot oko waco na be, “Ket sente nono i sanduku me kano lim me tempulo.” Aso, ango ako kwanyo siliba akaya ot adek nogo, twon sente kame oudo opoore kede cul na, di ako keto gi i sanduku me kano lim me tempulo.

¹⁴Ango ako turo ebela me are kame nyinge “Ariba” di ariba me Yuda kede Isirael oko tur.

¹⁵Di Rwot oko waco na be, “Porere bedo bala ngakwat akony mere li.

¹⁶Pien ango nan abino keto ngatel i lobo noni kame tie bala ngakwat kalikame paro pi romini kiyapi to; doko da likame emo romini korwenyo akadi pito akom gi yot. Do akaka manono, en ebino donyo camo ringo me romini kocwe, di ebuturo kiton abelekek gi.

¹⁷Okwe ngakwat akony mere li, kame weko romini! Poore epima cob bade kede wange tetu cam! Poore bade twili di wange tetu cam ko to atwal atwala.”