Read kumam Sakaria 12 Bible Online

Sakaria 12 - kumam bible

Sakaria 12

¹Man en kop kame Rwot owaco i kom Isirael, en Rwot ngat koyararo malo, ngat kosipo lobo kacungo mere, di eko mino dano tipo me kuo. En ewaco be,

²“Abino mino Yerusalem doko bala ikopo me bwini kame bino mero atekerin me kio. Ka jokwor oluko Yerusalem, kobino luko kiton bomban ace me Yuda da.

³Kame kare nono otuno, ango abino mino Yerusalem doko bala kidi apek; ateker moroni kame bino tamakino tinge bino wanare. Atekerin dedede me wi lobo bino ribakin pi sure.

⁴I kare nono ango abino mino asigiran gin dedede bedo kede lworo di jo kame ringo kede gi ko poi. Abino ciko wanga gwoko Yuda, do abino mino asigiran ka jokwor gi wang gi totoun.

⁵Di jo me ude apapat me ekeko ka Yuda ko bino donyo yamo ken gi be, ‘Jo me Yerusalem tie kede teko kame kiudo kibut Rwot me jo yi, en Rubanga gi.’

⁶“I kare nono ango abino mino jo me ude dedede me ekeko ka Yuda doko bala itonge me mac atie i atukit me yen otuo, bala rau aliel i diere me ijolong kotuo. Gin kibino muducaro atekerin dedede koluko gi, do Yerusalem jo bino dong iye bala lem sek.

⁷“Ango Rwot, me agege abino kong mino isirikalen me Yuda bwono yi, tetekeny wor kame ikwae ka Daudi kede kame jo me Yerusalem bino udo likame bino kato wor kame jo me Yuda bino udo.

⁸I kare nono ango Rwot abino gwoko jo kame bedo Yerusalem, tetekeny akadi dano agoro kalamo kibut gi bino doko tek bala bin Daudi. Ikwae ka Daudi bino telo gi, bala malaika na, bala ango kikoma.

⁹I kare nono ango abino muducaro atekerin dedede kame bino suro Yerusalem.

¹⁰ “Abino cibo i kom ikwae ka Daudi kede i kom jo ace me Yerusalem, tipo me cuny me kisa kede me ilega. Gin kibino neno ngat kame kicobo paka neko di kiko bino koke bala koko atin acel kenekene, arabo bala koko atin awobi kao.

¹¹I kare nono koko atie Yerusalem bino bedo rom aroma bala bin koko Kadad Rimon i ebar me Megido.

¹²Jo me lobo noni bino koko i ot i ot: ikwae me ot ka Daudi, ikwae me ot ka Natan, ikwae me ot ka Lebi, ikwae me ot ka Simei, kede jo me ude apat dedede. Ot acelacel bino koko kene, cuo bino pokere kargi ken gi, kede mon da kamanono.