Read kumam Sakaria 14 Bible Online

Sakaria 14 - kumam bible

Sakaria 14

¹Nenunu, ceng kame Rwot bino ngolo iye kop onoko. Di oko bino yako Yerusalem di oko popoko i nyimu jamini kame koyako.

²Rwot bino coko atekerin dedede karacel pi bino yi kede Yerusalem, di kiko bino mano bomba, di kiko yako ude, kede kiko buto kede mon tetek. Dul me jo kobino mako di oko tero gi obukui, do jo ace ko bino dong i bomba.

³Di Rwot ko bino ot di eko yi kede atekerin nogo, bala etie yi i ceng me yi.

⁴I kare nono en ebino cungo i wi moru me Olibeti, i bad tetu kide me Yerusalem; di aditot alac ko bino poko moru me Olibeti ki diere cako ki bad tetu kide tuno i bad tetu tim. Dul me moru nono ko bino nyiko i bad tetu malo, di dul acel da ko bino nyiko i bad tetu piny.

⁵Di wun ikounu bino ringo pi bwot di ilubunu aditot me moru ka Rwot nono, pien aditot nono bino ot paka tuno Asal. Ibinunu ringo bala kame bin joakwari oringo kede pi yangere me piny i kare me apugan ka Abaka Usia me Yuda. Di Rwot Rubanga na ko bino bino, karacel kede imalaikan mege kacil.

⁶Kame kare nono otuno, ngico amoto akako likame bino bedo tie,

⁷akadi kiton colo da. Ceng bino rieny nakanaka akadi kiton iwor da. Ceng nono Rwot en kame ngeo.

⁸Kame ceng nono otuno, pii amio kuo bino mol wok ki Yerusalem, dul mere bino mol ot i Nam Oto, kede dul mere ko bino mol ot i nam me Mediterania. En ebino mol i kare me oro di rom aroma bala kare me iporo.

⁹Di do Rwot ko bino doko abaka me wi lobo lung; Rwot bino bedo acel nono kame koworo i kabedere dedede me wi lobo.

¹⁰Lobo nono dedede, cako ki Geba i bad tetu malo tuno Rimon i bad tetu piny me Yerusalem bino doko lobo kame wie oporere abongo imukuran. Yerusalem bino bedo idelelei malo kalamo kabedere icegun koluke; bomba nono bino cakere ki Erute ka Benjamin tuno i Erute me Kona, kakame oudo bin erute me agege tie iye; kede da cako ki Gedo Abor me Kananel tuno i kabedo me biino bwini ka abaka.

¹¹Jo bino donyo bedo kuno, likame kobino doko dudubo en; Yerusalem bino bedo kede mulem abongo alola moro.

¹²Aumpuli kame Rwot bino kelo i kom jo dedede kame bino yi kede Yerusalem gin ige: ringo me kom gi bino cako top di gin pwodi kitie cungo, tong wang gi bino top, kede leb gi da bino top i dog gi.

¹³I kare nono Rwot bino mino gi mielkom di wi gi ko atotolun di kiko donyo yi ken gi ken gi.

¹⁴Akadi Yuda da bino cako yi i Yerusalem. Abar me atekerin me kio kobino coko karacel, magonogo ribo saabu, siliba kede igoen atot adikinicel.

¹⁵Aumpuli acel nono da bino poto i kom asigiran, leini mogo acal bala asigiran, aguraguran, pundan, kede i kom leini ace dedede kame tie kede gi.

¹⁶Di jo dedede kobwot kikom atekerin kosuro Yerusalem nogo ko bino donyo ot kunono buli mwaka pi woro Rwot me jo yi, en Abaka, kede pi tedo Ebaga me Kimere.

¹⁷Ka ateker moroni oko dagi ot Yerusalem pi woro Rwot me jo yi bala abaka, kot likame bino cwei i lobo gi.

¹⁸Doko da ka jo me Misiri oko dagi ot kunono, Rwot bino cwano negi aumpuli kame en eketo i kom atekerin kame dagi ot tedo Ebaga me Kimere.

¹⁹Manono bino bedo alola kame bino poto i kom jo me Misiri kede i kom atekerin apat kame dagi ot tedo Ebaga me Kimere.

²⁰I kare nono akadi kiton acwirin kame kongapo ne asigiran da kobino goro iwandik i kom gi kame somere be “Komio but Rwot”. Doko da agune me tedo atie i tempulo bino bedo jamini kacil bala bakulin kame kotio kede gi i alutari.

²¹Agune dedede me tedo atie Yerusalem kede Yuda kobino mino gi i tic me woro Rwot me jo yi, tetekeny jo dedede kame mio giayala bino tic kede gi me tedo ringo me giayala. Doko da i kare nono likame bobo jocat kede jowil bino bedo tie i ot ka Rwot me jo yi.