Read kumam Sakaria 3 Bible Online

Sakaria 3 - kumam bible

Sakaria 3

¹I gianyuta ace Rwot oko nyuto na Ngatel me Josaseredoti Yosua, di etie cungo i nyim malaika ka Rwot; Sitani oudo tie cungo i nget Yosua i bade tetu cam pi pide.

²Malaika ka Rwot oko waco ne Sitani be, “Sitani, in Rwot bunano in! Rwot kame maro Yerusalem bunano in! Benyo, likame ingeo be icuo ni cal bala yat kotuo kame kowariso ki mac?”

³Yosua oudo tie cungo kunono i nyim malaika di engapo igoen komodo.

⁴Malaika oko waco ne jo koudo tie cungo i nyime be, “Gonyunu igoen mege komodo go.” Di eko waco ne Yosua be, “Neningo, ango atieko kwanyo raco ni tenge, nan abino ngapo ni igoen me angosibib.”

⁵En eko waco ne jo nogo pi keto egoe kacil me bono wic i wi Yosua di kiko ngape kede igoen me angosibib, di en malaika ka Rwot nono etie cungo kanono.

⁶Di malaika oko waco ne Yosua be,

⁷“Rwot me jo yi tie waco kaman: ka in ilubo yote nango di iko timo gikame ango amito ni timo, in ibino bedo ngaloc me tempulo na kede diakal mere, doko da ako bino mini twero me tuno but imalaikan kame nan tie cungo kan.

⁸“Nan winyi, in Yosua Ngatel me Josaseredoti, in karacel kede josaseredoti jowoti kame tie bedo i nyimi, kame tie anen me gikame bino timere. Ango abino kelo ngatic na en Ajange.

⁹Kidi kame ango aketo i nyim Yosua kame tie kede nyime kanyaare, ango abino goro iye iwandik di ako bino kwanyo raco me lobo noni i ceng acel kenekene, ango Rwot me jo yi en awaco.

¹⁰Ka ceng nono otuno, ngat acelacel bino lwongo ngawote pi ot bedo i dud yat epigi kede olok mere, kede anapakin.”