Read kumam Sakaria 5 Bible Online

Sakaria 5 - kumam bible

Sakaria 5

¹Ango bobo ako ngoloro malo di ako neno itabu adola kame tie por ki wi yamo.

²Malaika oko penya be, “Nyo kame itie neno?” Ango ako dwoko be, “Atie neno itabu adola atie por; boro mere tie mita kanyangon, kede laco mere tie mita ongwon kede dul.”

³En eko waco na be, “Kowandiko iye ilam kame bino bedo tie i lobo noni dedede. Tetucel me itabu adola nono kowandiko iye be ngat kame kwalo kobino kwanye tenge ki lobo noni; kede tetucel mere da kowandiko be ngat kame kwongere i kop me abe eda kobino kwanye ki lobo noni.

⁴Rwot me jo yi waco be en etieko cwane, ebino donyo i buli ot me ngakuwo acelacel kede i buli ot me ngat acelacel akwongere i kop me abe. En ebino dong bedo i ude gi di eko dudubo gi.”

⁵Malaika koudo oyamo keda oko bobo bino di eko waco na be, “Ngoloro malo di iko neno gikame tie bino kiye.”

⁶Ango ako penye be, “Nyo inonono?” En eko dwoko be, “Manono obedo ebukit; ecungo pi dub me lobo noni dedede.”

⁷Oko yabo gikame oudo koumo kede dog ebukit nono, di ako neno dako di tie bedo iye.

⁸Malaika oko waco be, “Dako noni cungo pi tim areco.” En eko dino dako nono i yi ebukit nono, di eko dwoko gi me umo dog ebukit nono di eko dino.

⁹Ango ako ngoloro malo di ako neno di mon are tie bino. Yamo oudo tie i bwom gi; bwom gi oudo cal bala me etolut, di gin kiko tingo ebukit nono malo i dierediere me wi lobo kede idoun.

¹⁰Ango ako penyo malaika koudo oyamo keda be, “Kitie tero ebukit nono tuai?”

¹¹En eko dwoko na be, “Kitie tere Babilon pi ot gero ne ot kunono. Kame kotieko gero ot nono kobino cibo ebukit nono i yie.”