Read kumam Sakaria 6 Bible Online

Sakaria 6 - kumam bible

Sakaria 6

¹Ango ako bobo ngoloro malo di ako neno di cabalan ongwon tie wok ki dierediere me mori are me nyonyo buronsi.

²Cabala me agege asigiran akwar en kame oudo wao, me are mere asigiran acol en kame oudo wao,

³me adek mere asigiran atar en koudo wao, me ongwon mere asigiran eleli eleli en koudo wao.

⁴Ango ako penyo malaika koudo oyamo keda be, “Adwong, cabalan nogi dwong gi nyo?”

⁵Malaika oko dwoko na be, “Magonogi obedo yamere ongwon me malo atie ot; gin kiwok ki nyim Rwot me wi lobo lung.

⁶Cabala kame tie kede asigiran acol tie ot i piny atie i bad tetu malo, atie kede asigiran atar tie ot i piny atie i bad tetu tim, kede eleli eleli tie ot i piny atie i bad tetu piny.”

⁷Kakame asigiran eleli eleli owok kede, kom gi oudo tie miel amiela pi cako yai ot mamano wi lobo. Malaika oko waco negi be, “Otunu imamanunu wi lobo!” Gin kiko ot mamano wi lobo dedede.

⁸Di malaika oko lelemo na be, “Asigiran kodok i bad tetu malo okweo gero ka Rwot.”

⁹Rwot oko mina kop kame waco be,

¹⁰“Keledai, Tobija, kede Yedaya nan odwogo ki Babilon. Cok nyonyo siliba kede saabu kibut gi, di iko ot i paco ka Yosia wot ka Sepania.

¹¹Ter nyonyo siliba kede saabu nogo di iko timo kede gi ocoro me angosibib, di iko ngape i wi Yosua Ngatel me Josaseredoti, en wot ka Yekosadoki.

¹²Wac ne be Rwot me jo yi owaco be, ‘Icuo kame kolwongo be Ajange bino janyo i kakame etie iye di eko temuno gero tempulo ka Rwot.

¹³En nono kame ebino gero tempulo ka Rwot, di eko bino udo wor kame komio abaka, di eko bedo i kom mere me ajakanut di eko pug. Ebino bedo tie kede ngasaseredoti i nget kom mere me pug, di gin are nogo kiko bino tic kede mulem kede anapakin.’

¹⁴Ocoro me angosibib nono kobino keto i cing Keledai, Tobija, Yedaya, kede Yosia wot ka Sepania, di oko cibe i tempulo ka Rwot pi bedo gi me iyutun.”

¹⁵Jo kame bedo tenge kakabor bino bino konyo tic me gero tempulo ka Rwot. Kame kotieko gere, ibino ngeno be Rwot me jo yi en ocwaa buti. Manoni bino timere ka in ilubo cik ka Rwot Rubanga ni.