Read kumam Sakaria 7 Bible Online

Sakaria 7 - kumam bible

Sakaria 7

¹I mwaka me ongwon me apugan ka Abaka Darias, i ceng me ongwon me duwe me kanyangon (en duwe me Kisileb), Rwot oko mina kop mere.

²Jo me Betel oudo ocwao Sareser kede Regem Melek, karacel kede joe gi ace pi kwano Rwot,

³kede pi penyo josaseredoti me tempulo ka Rwot me jo yi kede inabin kop kame waco be, “Benyo, poore omedere tururo di okanyo kec i duwe me kany pi kite kame bin kodudubo kede Yerusalem, bala kame obedo timo pi mwakini atot?”

⁴Rwot oko mina kop mere be,

⁵“Wac ne jo dedede me lobo noni kede ne josaseredoti be, iturur kede kanyo kec kame gin kibedo timo i duwe me kany pi mwakini ot kanyaare kokato, oudo likame kibedo timo pi wora.

⁶Doko da ka icamunu di imatunu, mam udo itienu timo manono pi komu?”

⁷Magonogi da obedo kope kame Rwot bin owaco ki dog inabin kasek i kare kame Yerusalem oudo obaro kede di jo opong iye, kede da di jo opong i bomban koluke, kede i adul me bad tetu piny, kede i bad imukuran me bad tetu tim.

⁸Rwot oko bobo mino Sakaria kop mere awaco be,

⁹“Ango Rwot me jo yi bin awaco ne jo na kop kaman: Ngolunu kop kede ateni, nyutunu mwolo kede cuny me kisa but dano acelacel.

¹⁰Kur iterunu kirac apuserun, idwe kic, jokumbor kame bedo i diere wu, kede jocan. Kur cunyu bed kede iik areco i kom jo icegun.

¹¹“Do jo na oko dagi winyo, di kiko loka na ngei gi kede di kiko culo na yit gi.

¹²Gin kimio cuny gi obedo tek gangagang bala lela tetekeny kur kiyei lubo iswilia kede pwony kame ango acwao kede tipo na kibut inabin kasek. Manono oko bin mina, ango Rwot me jo yi, adoko ger negi adikinicel.

¹³Pi kite kalikame gin kiyei winyo kede kop na kakame ango ayamo kede, ada likame ako gamo kwac gi kakame kilego kede.

¹⁴Ango ako sasaro gi bala apipiru i diere me atekerin kalikame gin oudo kingeo. Di do lobo aber noni bin oko dong nono abongo ngatamoro abedo iye.”