Read kumam Sakaria 8 Bible Online

Sakaria 8 - kumam bible

Sakaria 8

¹Rwot oko bobo mina kop mere.

²Rwot me jo yi owaco be, “Amara na pi Yerusalem omio atie kede twon nyeko pire, nyeko na pire mia abedo kede gero.

³Ango abino dok Yerusalem di ako donyo bedo i diere. Kobino donyo lwongo Yerusalem be bomba kame genere, kede moru ka Rwot me jo yi kobino donyo lwongo be moru kacil.

⁴Cuo kede mon koti twatwal bino donyo doko bedo i gudi me Yerusalem, ngat acelacel kede ebela mere me komo pi tio gi.

⁵Gudi me bomba doko bino pong kede anyira kede awobe atie tuko.

⁶“Manoni twero neeno bala gi kalikame sobolokin kibut yonge me jo na kodong, do kibuta etie gikame sobolokin.

⁷Ango abino lako jo na ki lobere kame kotero gi iye i bad tetu kide kede i bad tetu tim,

⁸di ako bino kelo gi bedo Yerusalem. Gin kibino bedo jo na di ada ako bino bedo Rubanga gi; abino pugo gi i yore kopoore di agenere but gi.”

⁹Rwot me jo yi tie waco be, “Wun jo kame nataman itiekunu winyo kope nogo kame bin inabin owaco i kare kame bin kocako cibo kede acakini me apama me gedo me tempulo, miunu cingu bed tek i tic me gero tempulo.

¹⁰Di pwodi kare nono, oudo likame koculo jo amoto leini pi tic kame kitimo, doko da oudo likame dano twero ot karamoroni dedede i mulem, pien ango oudo amio jo dedede odagere.

¹¹Do nataman likame ango abino tero donge me jo nogi iepone kame bin atero kede jo i kare kasek.

¹²Gin kibino cuno kodere gi kede mulem; olok gi bino nyak, lobo bino ceko cam, kede kot bino bedo tot. Ango abino mino donge me jo nogi gi nogi dedede.

¹³Jo me Yuda kede Isirael, jo me atekerin oudo tio kede nyingu bala anen me ilam, do nan ango abino lako wu di gin kiko donyo tic kede nyingu bala anen me mino winyo. Aso bedunu abongo lworo di itienu kede nwangcuny.”

¹⁴Rwot me jo yi waco be, “Bala kame bin joakwari wu owango kede cunya, ango ako iikere pi keto can i komu, di likame ako loko tam na, do ako cobo timo gikame oudo aikere iye,

¹⁵kamanono da nataman ango atieko iikere pi timo bero ne jo me Yerusalem kede Yuda. Kur ibedunu kede lworo.

¹⁶Magi en gikame ipoorenu timo: wekunu yamo kope me abe but jowotu, ngolunu kope i ateni i ekiko wu pi kelo mulem,

¹⁷kur cunyu bed kede iik areco i kom jo icegun. Kur ikwongerenu i kope me abe, magonogi dedede cunya dagi.”

¹⁸Rwot me jo yi oko mino Sakaria kop kaman:

¹⁹“Kanyo kec kame kotimo i duwe me ongwon, me kany kede me kanyaare, kede kanyo kec me duwe me tomon bino doko kare me kilel kede me yomcuny, kede ebaga me yomcuny pi jo me Yuda. Pi manono, marunu ateni kede mulem.”

²⁰Rwot me jo yi waco be, “Kare tie bino kame jo me bomban atot bino bino Yerusalem kan.

²¹Jo me bomba acel bino ot waco ne jo me bomba ace be, ‘Bia ootunu oworunu Rwot me jo yi, di okwaenu. Wan otie ot.’

²²Jo atot kede atekerin atek bino bino Yerusalem wora, ango Rwot me jo yi, kede pi kwana.

²³I kare nono jokumbor tomon bino makakin i egoe me Eyudayat acel di kiwaco ne be, ‘Wan omito ot kedi, pien wan owinyo be Rubanga tie kede wun.’ ”