Read kumam Malaki 2 Bible Online

Malaki 2 - kumam bible

Malaki 2

¹Aso nataman Rwot me jo yi waco be, “Okwe wun Josaseredoti, cik noni mako wun.

²Ka wun likame ibinunu winyo kop na, ka likame ibinunu keto cunyu wora, ango abino cwano ne wu ilam nono, doko abino mino winyo kame koto iudunu lokere doko ilam. Ateteni ango atieko keto ilam i kom gi, pien wun likame iketunu cunyu i cik na.

³Ango abino mino idwe wu alola, di ako suto we me leini me giayala wu i nyim wu, di ako riamo wu tenge ki nyima.

⁴Di do wun ikounu bino ngeno be ango atieko mino wu cik noni, tetekeny isikan na kede kwaru wu Lebi kur turi.

⁵“Cikere nango kede gin oudo obedo cikere me mino gi kuo kede mulem, di ango bin ako mino gin gi nogi, tetekeny kibed kede wor buta. I kare nono gin bin kiko bedo kede wor buta, doko oudo kilwora.

⁶Gin kiko pwonyo kop me ateni, abongo angalo moro. Gin kiko bedo lubo kuo kame ango oudo amito, di kitimo gi kopoore. Manono bin oko mino gin kiko mino jo atot oweko timo dub.

⁷Pien josaseredoti en kame miero gwok ngec me ateni amako Rubanga. Jo poore ot pwonyere but gin, pien gin en kibedo joor ka Rwot me jo yi.

⁸“Do nataman wun josaseredoti itiekunu weko lubo yongayo nono. Pwony wun otieko mino jo atot odonyo timo gi kalikame poore. Wun itiekunu turo isikan kame bin ango atimo kede kwaru wu Lebi.

⁹Manono en komio ango ako mino jo dedede obedo kede acae but wu, pien wun likame ilubunu yote na, do ibedunu kede apokapoka i kom jo kame itienu pwony.”

¹⁰Benyo, likame wanunu dedede papa wa acel? Likame Rubanga acel en kocweo wa? Pinyo do komio wan likame ogenerenu ken wa ken wa, doko pinyo komio wan ocaunu isikan kame Rubanga bin otimo kede joakwari wa?

¹¹Jo me Yuda likame obedo kede genere but Rubanga, doko kitieko timo gikame neno rac i Isirael kede Yerusalem. Gin kitieko timo gi me emuna i tempulo ka Rwot, kabedo kame en emaro. Cuo otieko nyomo mon kame woro rubangan apat.

¹²Ango akwao Rwot ekwany tenge kikom jo Isirael jo kotimo gi noni, di likame eko yei negi mino giayala kame ateker wa tero but Rwot me jo yi.

¹³Manoni en bobo gi ace kame wun itimunu: wun idwilaunu kede koko di ikounu mino pigewang wu mol romo wi alutari ka Rwot, piento en likame do egamo giayala kame wun iterunu ne.

¹⁴Wun ipenyunu pinyo komio en nataman likame do egamo giayala nogo. Etie kamanono pien ngat acelacel kikomu otieko turo cikere kame oudo etimo kede dako kame en enyomo di pwodi en awobi, bed bala dako nono pwodi tie ngawote, dako mere kame esikano kede.

¹⁵Benyo, likame Rubanga oudo omio idokunu kom acel kede cuny acel? Dwong kop nyo en komio oudo en etimo manoni? En etimo manoni piento en oudo emito be wun inywalunu idwe kame ateteni obedo jo mege. Pi manono, miero igwokerenu, di likame dano moro ko turo cikere mere but dako mere.

¹⁶Rwot Rubanga me Isirael waco be, “Ango adagi kop me riamo mon. Ango adagi neno di dano moro kikom wu timo tim me gero kacal kamano but dako mere. Aso, poore igwokerenu di likame ikounu turo cikere wu me wun bedo di igenerenu but mon wu.”

¹⁷Wun itiekunu mino Rwot ool kede kop wu. Do di wun ipenyerenu be, “Omie eol iepone mene?” Wun imienu eol kede yamo wu kame waco be, “Jo dedede kame timo gikareco beco i nyim Rwot, doko en cunye yom i kom gi.” Arabo pi penyere be, “Rubanga kame ngolo kop kakare nono kara tie tuai?”