Read kumam Matayo 14 Bible Online

Matayo 14 - kumam bible

Matayo 14

¹I kare no Erode ngapug me Galilaya oko winyo epone kame oudo nying Yesu iruo kede,

²en eko waco ne jotic mege be, “Yokana Ngaibatis en ine kame oyaruno kikom jo oto, en komio etie kede twer acal kamano.”

³Pien Erode oudo omio komako Yokana di oko tweno i otkol pi kop Erodia, dako ka omin mere kame nyinge Pilipo;

⁴pien Yokana oudo owaco ne be, “Iswil likame yei ni nyomo Erodia.”

⁵Bed bala Erode oudo mito neko Yokana, do en eko lworo jo, pien jo oudo tero be Yokana obedo enabi.

⁶Di bin ceng kame koyutuno kede nywalo Erode otuno, nyar ka Erodia oko miel i nyim wele kame oudo obino i ebaga, di cuny Erode oko bedo yom adikinicel,

⁷omio en eko cikere di elairo pi mino nyako nono gimoroni kenekene kame en ebino penyo be mie.

⁸Nyako nono oko lubo acora ka toto mere, di en eko waco be, “Mia wi Yokana Ngaibatis i sinia kan.”

⁹Gini oko cobo cuny abaka, do pi kite kame oudo etieko kwongere kede i nyim wele mege, en eko ciko be miero mi nyako nono gikame epenyo.

¹⁰En eko cwano jo ooto ngolo ngut Yokana i otkol,

¹¹oko kelo wi Yokana di tie i sinia di oko mine, di en eko tero ne toto mere.

¹²Josiao ka Yokana oko bino kiko kwanyo kome kiko ot yiko, di do kiko ot waco ne Yesu.

¹³Kakame Yesu owinyo kede kop me to ka Yokana, en eko donyo i yi yee di eko yai ki kuno eko ot kakoling. Do kakame jo owinyo kede kamano, kiko yai ki bomban kede tien gi di kiko lube.

¹⁴I kare kame Yesu oudo tie wok kede i dog nam, en eko neno ekodet me jo, eko bedo kede par pirgi, en eko cango joe gi kame oudo tuwo.

¹⁵Kakame piny oyuto kede, josiao mege oko bino bute di kiko waco ne be, “Kan oling, doko esawa okato, peruno jo ot wil cam i calere kiyapiyapi kan.”

¹⁶Yesu oko dwoko ne gi be, “Likame kipoore ot tenge, wun nogo miunu gi gimoro kicami.”

¹⁷Gin kiko waco ne be, “Wan otie kan kede mugati kany kede deknam are kenekene.”

¹⁸Yesu oko waco ne gi be, “Kelunu gi buta kan.”

¹⁹En eko waco ne ekodet pi bedo piny i wi lum. En eko kwanyo mugati kany kede deknam are nogo, di eko ngino malo, eko pwono Rubanga di en eko tuturo mugati, eko mino josiao mege, di josiao oko popoko ne jo.

²⁰Gin dedede kiko cam kiko yeng. Di josiao oko coko cam kame odong oko pongo ibukito tomon kiwie are.

²¹Cuo kame ocamo wel gi oudo romo tutumia kany, di likame komaro iye mon kede idwe.

²²Yesu oko mino josiao mege odonyo i yi yee pi telo ne yongayo me ot loka, di en ber edong cen peruno jo.

²³Ingei peruno jo, en eko ot i wi moru kene pi lego. Kakame piny oyuto kede, en oudo etie do kuno kene.

²⁴Esawa no yee oudo otieko do tuno kakabor kede itela, di ebuka tie napunapun i kome, pien yamo oudo tie buko di wok ki tetu nyim gi.

²⁵Do di piny bin otuno obai, Yesu oko bino but gi di eoto ki wi pii kede tiene.

²⁶Do kakame josiao onene kede di eoto ki wi pii kede tiene, lworo atek oko mako gi, kiko waco be, “Kom jwogi inonono.” Kiko cako dwilao pi lworo.

²⁷Cucuto di Yesu oko waco ne gi be, “Bedunu kede nwangcuny, ango inononi, kur lworo maku.”

²⁸Petero oko dwoko be, “Rwot, ka in inonono, wac ne ada abin buti ki wi pii.”

²⁹Yesu oko waco ne be, “Bia.” Petero oko wok ki yee di eko ot but Yesu kede tiene ki wi pii.

³⁰Do kakame eneno kede yamo, lworo oko make, eko cako lwiny i yi pii. En eko kok be, “Rwot laka.”

³¹Cucuto Yesu oko rieno cinge oko make, di eko waco ne Petero be, “In ngat kame yei ni nonok, pinyo komio cunyi gung?”

³²Kakame kidonyo kede i yi yee, yamo oko kwei.

³³Jo kame oudo tie i yi yee oko mine wor di kiwaco be, “Ateteni in ibedo Wot ka Rubanga.”

³⁴Kakame kitieko do ngolo kede nam, kiko wok itela i Genesaret.

³⁵Kakame jo me kuno oneno kede Yesu di kiko ngene, gin kiko cwano jo i adulion me kuno dedede, di jo oko kelo ne Yesu jo dedede kame oudo tuwo.

³⁶Di gin kiko donyo bako dog gi ne Yesu be eyei ne jotuwo mulo lak egoe mere. Jo dedede kame oko mulo egoe mere oko cango.