Read kumam Matayo 17 Bible Online

Matayo 17 - kumam bible

Matayo 17

¹Ingei ceng kanyape, Yesu oko kwanyo Petero, Yakobo kede omin mere Yokana, di en eko tero gi malo i wi moru kargi ken gi.

²Kom Yesu oko lokere i wang gi kanono, di nyime oko rieny bala ceng, kede igoen mege oko doko tar liamaliam.

³Gin kiko neno Musa kede Elia di tie yamo kede Yesu.

⁴Petero oko waco ne Yesu be, “Rwot, eber pi wan bedo tie kan. Ka imito, abino gero kimere adek kan, acel ne in, acel ne Musa kede acel ne Elia.”

⁵Di oudo pwodi etie yamo, edou atar oko umo gi pukupuk, di dwan oko wok ki edou di waco be, “Man en Woda kame amaro, cunya yom i kome; winyenu.”

⁶Kakame josiao owinyo kede kop noni, gin kiko popoto kiriebo nyim gi piny, di kiko bedo kede lworo karacel kede wor.

⁷Do Yesu oko ot oko mulo gi di ewaco be, “Yaunu, doko kur ibedunu kede lworo.”

⁸Do kakame kitingo kede wang gi malo, likame tie ngatamoro kame kiko neno kwanyo Yesu kenekene.

⁹Kakame Yesu kede josiao mege oudo tie wok kede ki wi moru, en eko ciko gi be, “Kur iwacenu ngatamoro gikame inenunu, tuno kame koyaruno Wot ka dano kikom jo oto.”

¹⁰Josiao oko penyo Yesu be, “Do pinyo komio doko jopwony me Iswil waco be Elia en kame miero gei bino?”

¹¹Yesu oko dwoko be, “Ebo Elia en kame miero gei bino di en eko temuno gi dedede;

¹²do awaco ne wu be, Elia otieko bino, do jo likame oko ngene, di gin kiko timo ne gikame cuny gi oudo mito. Wot ka dano da bino neno can i cing gi iepone acel nono.”

¹³Josiao di do oko niang be Yesu oudo tie yamo ne gi kop i kom Yokana Ngaibatis.

¹⁴Kakame Yesu kede josiao mege odwogo kede but ekodet, icuo moro oko bino but Yesu di eko riondiko piny i nyime, di eko waco ne be,

¹⁵“Rwot, mi kisa maki i kom woda. En etie kede tuwo me ikwikwing, kame tie mine neno can twatwal, pien maro rereto en i mac kede i pii.

¹⁶Oudo akele but josiao ni, do gin likame kiko twero cange.”

¹⁷Yesu oko dwoko be, “Wun lwak koparao me i kare ni, kame li kede yei, miero abed kede wu pi kare kame rom amene? Apoore kanyakino kope wu tuno awene? Kelenu buta kan.”

¹⁸Yesu oko coko jwogi, di jwogi oko wok ki kom awobi nono, di do eko cango esawa nono.

¹⁹Josiao oko lwidar ot but Yesu kiko penye be, “Pinyo komio wan likame oudo otwero riamo jwogi nono?”

²⁰Yesu oko dwoko ne gi be, “Pien yei wu titidi. Pi ateteni awaco ne wu be, ka itie kede yei kame rom kede nyige me karadali, ikaruno waco ne moru ni be, ‘Yai ki kane i ot kuca,’ di eko bino yai da. Doko likame tie gimoro kame karuno loni.

²¹(Do ilega kede kanyo kec kenekene en kame mio gikame cal kamanoni yai, likame bobo tie gimoro ace.)”

²²Kakame josiao oudo ocokere kede i Galilaya, Yesu oko waco ne gi be, “Kobino mino Wot ka dano i cing jo,

²³gin kiko bino neke, do oko bino yaruno en i ceng me adek.” Josiao oko bedo kede cwercuny adwong.

²⁴Kakame Yesu kede josiao mege ooto kede Kaperanaum, jorar esolo me tempulo oko ot but Petero di kiko penye be, “Apwony wu mam culo esolo me tempulo?”

²⁵En eko dwoko be, “Ebo, eculo.” Kakame Petero odok kede paco, Yesu oko cako yamo kede, di ewaco be, “Simoni, in iparo benyo? Abakai me piny kan gamo esolo me jame kede esolo me apugan kibut anywali me piny arabo kibut jokumbor?”

²⁶Petero oko dwoko be, “Kigamo kibut jokumbor.” Yesu oko dwoko ne be, “Dwong mere be anywali me piny likame culo esolo.

²⁷Do wan likame omito wango cuny gi, in ot i nam iko uco iliket, iko kwanyo deknam kame bino cako moko. Ka iyabo doge ibino udo ogap kame romo culo esolo nin kede mera me tempulo; kwany iko mino gi.”