Read kumam Matayo 2 Bible Online

Matayo 2 - kumam bible

Matayo 2

¹Di do kotieko nywalo Yesu i bomba me Betelem i piny me Yudea, i kare kame oudo Erode tie kede abaka, cucuto jorieko mogo oko bino Yerusalem di kiwok ki tetu kide. Gin kiko penyere be,

²“Ani bo atin kame konywalo pi bedo abaka me Iyudayan? Pien wan oneno acer kame nyuto nywale di wok ki tetu kide, nan wan obino pi wore.”

³Kakame Erode owinyo kede kop noni, wie oko dubere, en karacel kede jo dedede kame oudo tie Yerusalem.

⁴En eko lwongo jodongo me josaseredoti kede jopwony me Iswil karacel, di en eko penyo gi be, “Kara ber koyaro nywalo Kirisito tuai?”

⁵Gin kiko dwoko ne be, “Koyaro nywale i bomba me Betelem i piny me Yudea; pien enabi bin owandiko be,

⁶‘Wun jo me Betelem, i piny me Yuda, bomba wu pire dwong i dier bomban apat kame tie i piny me Yuda; pien ngatel bino wokun ki diere wu, kame bino bedo ngakwat me jo na me Isirael.’ ”

⁷Erode oko lwongo jorieko kame bin owok ki tetu kide en eko bedo kede gi i cokere i mung, di en eko udo niang kibut gi i kom esawa kame acer oudo oneeno iye kikokome.

⁸En eko cwano gi Betelem di ewaco ne gi be, “Otunu imounu atin no kiber, do ka iudenu, bianu iwacanu, tetekeny ada aot awore.”

⁹Di do gin kitieko winyo kop me abaka, kiko yai. Kikano acer kame bin kineno ki tetu kide nono oko telo ne gi anyim tuno kakame atin oudo tie iye, di en eko cungo.

¹⁰Kakame kineno kede acer, kiko bedo kede yomcuny kede kilel adwong adikinicel.

¹¹Gin kiko donyo i ot, kiko neno atin di tie kede toto mere Maria, di kiko riondiko piny kiko wore. Kakame kitieko gonyo kede jame gi, kiko kwanyo giamia gi me saabu, bubani kede mura kiko mine.

¹²Di do gin kiko lubo yongayo apat me dok i piny me tur gi, pien Rubanga oudo okwenyaro gi i wang lek di ewaco ne gi be kur kidoki but Erode.

¹³Kakame do gin kitieko yai kede, malaika ka Rwot di do oko nyutere but Yosepu i wang lek di eko waco ne be, “Yai ikwany atin kede toto mere ikounu ringo Misiri, di ikounu dong kuno tuno di ango awaco ne wu be idwogunu; pien Erode oyapuno cako mono atin no pi neko.”

¹⁴Di Yosepu oko yai en eko kwanyo atin kede toto mere iwor, kiko ot Misiri,

¹⁵kiko dong kuno tuno kakame Erode oto kede. Man otimere pi mino cobere kakare gikame Rwot owaco i dog enabi be, “Alwongo Woda ki Misiri.”

¹⁶I kare kame bin Erode oniang kede be jorieko kame bin oyai ki tetu kide oudo ongolo ne rieko, cunye oko wang twatwal, di en eko cwano jo pi neko idwe awobe me mwaka are dok piny i Betelem kede i adulion kame kio kede dedede, di lubere kede kare kame oudo jorieko oniange kede.

¹⁷Man oko mino gikame bin enabi Yeremia owaco ocobere kakare be,

¹⁸“Dwan bin owinyere ki Rama, di etie kok koko me to, Lakeri inonono kame oudo tie koko idwe mege; likame tie ngatamoro kame oudo twero dino cunye, pien gin do kitieko doko li.”

¹⁹Ingei to Erode, malaika ka Rwot oko nyutere but Yosepu i wang lek di etie Misiri,

²⁰di eko waco ne be, “Yai ikwany atin kede toto mere ikounu dok i piny me Isirael, pien jo kame oudo mito neko atin otieko do to.”

²¹Yosepu oko yai en eko kwanyo atin kede toto mere kiko dok i piny me Isirael.

²²Do kakame doko Yosepu owinyo kede be Arekelau olunyo wang papa mere Erode bala abaka me Yudea, lworo oko make ot kuno. Malaika ka Rwot oko medo kwenyaro en i wang lek be kur eot kuno. En eko do ot Galilaya.

²³En eko ot bedo i bomba kame kolwongo be Nasaret, tetekeny kop kame bin enabi owaco cobere kakare be, “Kobino lwonge be dano me Nasaret.”