Read kumam Matayo 23 Bible Online

Matayo 23 - kumam bible

Matayo 23

¹Yesu oko waco ne ekodet me jo karacel kede josiao mege be,

²“Jopwony me Iswil kede Iparisayon olunyo akarunikin kame bin Musa tie kede;

³pi mano, lubunu kop dedede kame gin kipwonyo wu, do likame gikame gin kitimo; pien gin likame kilubo gikame kipwonyo.

⁴Gin kiketo i epepet me jo icegun yec apek kalikame kitwero yeno, do di gin likame kitwero cwano akadi lwet gi acel pi konyo gi tingo.

⁵Kitimo tice dedede be tetekeny jo nen gi, pien gin kitimo pulakateria[3] gi di dongodongo kalamo. Doko ausin me lak ikanson kame bin jo ngapo pi nyuto mire gi but Rubanga, mergin oudo bocoboco twatwal.

⁶Doko gin kimaro kabedo me wor i ibagai kede komini kabeco kalamo i sinagogan.

⁷Kimito be di jo moto gi kede wor i atalen kede di kolwongo gi be ‘Apwony.’

⁸Do likame poore lwongo ngatamoro kikom wu be ‘Apwony’, pien wun dedede itienu imiegu, doko itienu kede ngapwony acel kenekene.

⁹Doko kur ilwongunu ngatamoro be papa wu i wi lobo kan, pien itienu kede Papa wu acel kenekene kame tie i malo.

¹⁰Kur da lwongu be jotel, pien itienu kede ngatel acel kenekene, en Kirisito.

¹¹Ngat kame pire dwong kalamo jo icegun i diere wu miero bed ngatic wu.

¹²Ngat kame tingere kene kobino dwoke piny, kede ngat kame mwolere kobino tinge malo.

¹³“Itienu i can wun jopwony me Iswil kede Iparisayon, wun joecuke! Pien wun icegunu ne jo ekeko me Ajakanut me malo. Pien likame idonyunu iye, doko da likame iyeunu ne jo kame mito donyo pi donyo iye.

¹⁴(Ibinunu neno can wun jopwony me Iswil kede Iparisayon, wun joecuke! Pien wun icamunu jame me apuserun di do ikounu lego ilega aboco me ecuke. Pi mano, kobino ngolo ne wu kop kame pek kalamo.)

¹⁵“Itienu i can wun jopwony me Iswil kede Iparisayon, wun joecuke! Pien wun ingolunu name kede itelai pi loko dano moro acel i edini wu, do ka itiekunu loke, ikounu mine edoko ngat kame poore ot i mac kalikame to kalamo wun tien are.

¹⁶“Ibinunu neno can wun imuduka kame telo ne jo yote, pien wun ipwonyunu jo be, ‘Ka ngatamoro olairo i nying tempulo, likame eromo timo gikame elairo iye. Do ka ngatamoro olairo i nying saabu kame tie i tempulo, poore ecob gikame elairo iye nono.’

¹⁷Wun jomingo kame wangu oto! Mene en kame pire dwong, saabu arabo tempulo kame mio saabu bedo gikacil?

¹⁸Wun ipwonyunu be, ‘Ka ngatamoro olairo i nying alutari, likame eromo cobo gikame elairo iye, do ka ngatamoro olairo i nying giamia kame tie i alutari, epoore cobo gikame elairo iye.’

¹⁹Wun jo kame wangu oto, mene en kame pire tek, giamia arabo alutari kame loko giamia doko gikacil?

²⁰Aso, ngat kame lairo i nying alutari udo etie lairo i nying alutari kede gi dedede kame tie i wie;

²¹doko dano kame lairo kede nying tempulo, udo elairo kede nying tempulo karacel kede Rubanga, ngat kame bedo kuno.

²²Do ngat kame lairo i nying malo udo elairo i nying kom me Ajakanut ka Rubanga, kede ngat kame bedo iye.

²³“Ibinunu neno can wun jopwony me Iswil kede Iparisayon, wun joecuke! Pien wun imiunu Rubanga acel ki kom tomon me yen kame jo nyalo kede cam pi mino cam doko mit, kame kolwongo be minit, dili kede cumin, do di iwekunu cuny pwony me Iswil, en tero jo i yore kopoore me ateni, bedo kede cuny me kisa kede bedo kede yei. Magi en gikame oudo wun ipoorenu timo abongo weko apat.

²⁴Wun jo kame wangu oto, kame telo ne jo yote, icanenu jililo ojur gi kidikirir tenge ki gikame imatunu, do di ikounu mwonyo aguragura gikame ti!

²⁵“Ibinunu neno can wun jopwony me Iswil kede Iparisayon, wun joecuke! Wun ilwokunu ngei ikopo kede ngei suani, do di gikame ipongunu i yi gi iudunu i yore me eranga kede mit kalikame dire.

²⁶Wun Iparisayon kame wangu oto, geunu ber lwoko i yi ikopo kede i yi suani en kamio ngei gi da ko bino bedo cil.

²⁷“Itienu i can, wun jopwony me Iswil kede Iparisayon! Wun joecuke! Pien wun icalunu bala atesin kame kopuo kede erangi atar, kame ngei gi cil do di yi gi opong kede cogere me jo oto kede gi kotop.

²⁸Aso, wuda i ooko koneno wu bala jo abeco, do di yi wu opong kede ecuke kede dub.

²⁹“Itienu i can, wun Iparisayon kede jopwony me Iswil! Wun joecuke! Pien wun igerunu atesin me inabin di cil doko ikounu tubuso gikame kogero pi yutuno jo kame bin kuo gi opoore i nyim Rubanga;

³⁰di iwacunu be, ‘Ka koto bin wan otienu di okuo i kare me joakwari wa, koto bin likame oyei ribere kede gin pi onyo remo me inabin.

³¹Iepone noni wun ipiderenu kenu be, wun ibedunu ikwae me jo kame bin oneko inabin.’

³²Pi mano, imiunu do gikame bin joakwari wu ogeo ongetakin.

³³Wun twole, wun idwe me twole, ikarununu bwot benyo benyo di likame kongolo ne wu kop me ot i mac kalikame to?

³⁴Pi mano, ango awaco ne wu be abino cwano ne wu inabin, kede jorieko kede jopwony me Iswil; mogo kikom gi ibinunu neko di igurunu gi i kom musalaba, kede mogo ibinunu dano gi i sinagogan wu di itidilunu gi ki bomba acelacel.

³⁵Pi mano, remo me jo kopoore, remo kame bin koonyo bino dwogo i wi wu; cako ki remo ka Abel, ngat kame bin li kede kop moro, tuno kede i remo ka Sakaria wot ka Barakia, kame bin inekunu i dierediere me gedo me kabedo kacil kede alutari.

³⁶Ateteni awaco ne wu be, gigi dedede bino timere ne jo kame nan tie i kare ni.

³⁷“Okwe in Yerusalem, Yerusalem, in bomba kame neko inabin doko ididipo jo kame Rubanga ooro buti! Tien atot ango oudo amito be koto acoko idwe ni karacel bala kite kame gweno rukumo kede imion mege i bwome, do in iko dagi na!

³⁸Neningo, Rubanga otieko weko ni odi odong nono.

³⁹En komio awaco ni be, likame bobo ibino nena tuno kede kakame ibino waco kede be, ‘Etie kede winyo ngat kame bino i nying Rwot.’ ”