Read kumam Matayo 25 Bible Online

Matayo 25 - kumam bible

Matayo 25

¹“I kare nono kobino poro Ajakanut me malo kede anyira tomon kame okwanyo italan gi kiko ot pi riamo kede eteran.

²Kany kikom gi oudo jomingo, do kany oudo riek.

³Pien kame ming mege bin otero italan gi, do likame oudo kimako motala,

⁴do anyira kame riek mege oko mako mo ace i cupan kede i yi italan gi.

⁵Kite kame eteran oudo oko gal kede, omio nino oko bwono gi di kiko nino.

⁶“I dier iwor ilelem oko winyere be, ‘Nenunu, eteran otieko tuno! Bianu igamenu.’

⁷Anyira nogo dedede oko yai kiko donyo iiko ausin me italan gi.

⁸Di anyira aming mege ka oko waco ne anyira ariek be, ‘Miunu wada motala wu mogo, pien italan wa tie mito to.’

⁹Do anyira ariek oko dwoko be, ‘Cengemogo motala likame bino romo wa karacel kede wu, tikatika iotunu but jocat ikounu wuda wilo meru.’

¹⁰Kakame gin kioto kede pi wilo motala, eteran nono oko tuno, di anyira kany kame oudo otieko iikere oko donyo kede en i ot i ebaga me nyom, di do oko cego ekeko.

¹¹“I cen mere, anyira kany icegun ka da oko bino di kilwongere be, ‘Adwong, adwong yab ne wada ekeko.’

¹²Do en eko dwoko ne gi be, ‘Ateteni awaco ne wu be, ango gira akwia wu.’

¹³“Pi mano, bedunu di igwokerenu, pien likame ingeunu ceng amotoko esawa kame Wot ka dano bino dwogo kede.

¹⁴“Pien Ajakanut me malo bino bedo cal bala dano kame bin tie ot i sapali mere, en eko lwongo jotic mege di eko keto jame mege i cing gi.

¹⁵Bin emio ngat acel talente kany, dano ace di eko mino talente are, kede ocelu da en eko mino talente acel. Emio dano acelacel gikame rom kede teko mere. En di do eko ot.

¹⁶Ngat kame oudo ogamo talente kany oko ot, cucuto di en eko donyo timo kede gi tic me cat. En eko udo ameda ace me talente kany.

¹⁷Ngat kame oudo ogamo talente are da oko timo kamanono, eda eko bobo udo ameda me talente are.

¹⁸Do ngat kame oudo ogamo talente acel oko ot di eko kunyo piny di en eko kano iye sente me ngadwong mere.

¹⁹“Ingei kare alac ngadwong me jotic nogo oko dwogo di eko donyo ngingico epone kame gin kitio kede sente.

²⁰Di do ngatic kame oudo ogamo talente kany nono oko bino di ekelo talente ace kany medo bobo i wi kame bin egamo. En eko waco be, ‘Adwong, in oudo imia talente kany, do talente ace kany ige bobo amedo udo.’

²¹Ngadwong mere oko waco ne be, ‘Itimo kiber, in ngatic aber, doko igenere. Itieko bedo ngat kame genere kede gi atitidi, abino do keto gi atot i cingi, pi mano dony do i kilel na.’

²²“Ngat kame oudo ogamo talente are da oko bino di ewaco be, ‘Adwong, oudo imia talente are, do talente ace are ige bobo amedo udo.’

²³Ngadwong mere oko waco ne be, ‘Itimo kiber, in ngatic aber, doko igenere. Itieko bedo ngat kame genere kede gi atitidi, abino do keto atot i cingi, pi mano dony do i kilel na.’

²⁴“Di do dano kame oudo ogamo talente acel nono da oko bino di ewaco be, ‘Adwong, ango oudo angeo be in ibedo dano kame ekite mere tek, ikao ki kakalikame i cuo iye, doko icoko ki kaka likame ipieto iye;

²⁵pi mano, ango ako bedo kede lworo, di ako ot kano talente ni piny i lobo. Nan do gam giri ine.’

²⁶“Do ngadwong mere oko dwoko ne be, ‘In ngatic arac, doko inyap. Mam in oudo ingeo be ango akao ki kakalikame acuo iye, doko acoko ki kakalikame apieto iye?

²⁷Pi mano, oudo ipoore kopo sente na ne jo kame bin kano lim, di do i kare me dwogo na koto ako gamo sente na kede ameda i wie.

²⁸Pi mano, gamunu do talente no kibute di ikounu mino ngat kame tie kede talente tomon.

²⁹Pien ngat acelacel kame tie kede gimoro, kobino mine ace bobo, di en eko bino bedo kede atot kalamo; do ngat kame li kede gimoro, akadi atitidi kame etie kede da kobino kwanyo tenge kibute.

³⁰Pi mano, ucunu ngatic kame kony mere li no ooko kakacol, kakame jo bino koko kede mwodo lak gi kiye.’

³¹“I kare kame Wot ka dano bino dwogo kede di etie i deyo mere karacel kede imalaikan dedede, en ebino bedo i kom mere me deyo.

³²Di do jo me atekerin dedede ko bino cokere i nyime. En eko bino poko jo kopoore kikom jo apat, bala kite kame ngakwat poko kede romini kikom diegi.

³³En ebino keto jo kopoore i bade tetu cam, di eko keto jo areco i bade tetu ngodal.

³⁴Di do Abaka ko bino waco ne jo kame tie i bade tetu cam be, ‘Bianu wun jo kame Papa na omio wu winyo, bia igamunu winyo me ajakanut kame Rubanga oiko ne wu cako ki agege me cweno piny;

³⁵pien bin kec oneka di ikounu mina cam; bin orio oneka di ikounu mina pii amato; bin ango ngakumbor di ikounu gama;

³⁶bin atie nono di ikounu mina giangapa; bin atuwo di ikounu bino nena; bin atie i otkol di ikounu welao ango.’

³⁷“Di do jo kopoore ko bino dwoko ne be, ‘Rwot awene en kame wan oneni kede di kec oneki di oko mini cam, arabo di orio oneki oko mini pii imato?

³⁸Doko awene en kame wan oneni kede di in ngakumbor di oko gami, arabo di itie nono oko mini egoe ingapo?

³⁹Doko awene kame wan oneni kede di itie i otkol arabo di ituwo di wan oko welao in?’

⁴⁰Di Abaka ko bino dwoko ne gi be, ‘Ateteni awaco ne wu be, bala kite kame bin itimunu kede kamanoni ne ngat acel kalikame pire dwong kikom imiegu kede amiegu na gi, udo bin itimunu nango.’

⁴¹“Di do en eko bino waco ne jo kame tie i bade tetu ngodal be, ‘Irwaunu tenge kibuta, wun jo kame kolamo. Otunu i mac kalikame to, kame Rubanga oiko pi Sitani kede imalaikan mege.

⁴²Pien oudo bin kec oneka likame ikounu mina cam, doko orio oudo oneka likame ikounu mina gi me amata;

⁴³Ango bin ngakumbor do likame ikounu gama; oudo atie nono do likame ikounu mina egoe me angapa; oudo bin atuwo kede oudo atie i otkol do likame ikounu welao ango.’

⁴⁴“Di gin kiko bino dwoko ne be, ‘Rwot, awene en kame wan oneni kede di kec oneki, arabo di orio oneki, arabo di in ngakumbor, arabo di itie nono, arabo di ituwo, amotoko di itie i otkol di wan oko dagi konyi?’

⁴⁵Di en eko bino dwoko ne gi be, ‘Ateteni awaco ne wu be, bala kame bin likame itimunu kede kamanoni ne ngat acel kalikame pire tek kikom jogi, udo bin likame itimunu ne ango.’

⁴⁶Di do gin kiko bino ot i alola me nakanaka, do jo kopoore ko bino ot i kuo kame bedo nakanaka.”