Read kumam Matayo 28 Bible Online

Matayo 28 - kumam bible

Matayo 28

¹Ingei Ceng Sabato, tetu obai kame ru ceng Sande, Maria Magadalina kede Maria ocelu oko ot pi neno ates.

²Kikano, piny oko yangere kitek; pien malaika ka Rwot oudo obino ki malo di eko loro kidi tenge ki dog ates, en eko bedo i wie.

³Cal mere oudo ineno bala meny me kot, kede egoe mere oudo tar bala akako.

⁴Mielkom oko mako jodar pi lworo, di kiko anatakin bala jo kotieko to.

⁵Do Malaika nono oko waco ne mon ka be, “Kur ibedunu kede lworo, pien ango angeo be wun itienu mono Yesu kame oudo koguro i kom musalaba.

⁶En eli ki kan pien etieko yaruno bala kame bin ewaco. Bianu inenunu kakame oudo kopielo iye kome.

⁷Aso, otunu awakawaka iwacunu ne josiao mege be, en etieko yaruno kikom jo oto, en do etieko cako ot ne wu Galilaya; ibinunu nene ki kuno. Gikame ango awaco ne wu en ino.”

⁸Gin kiko yai awakawaka ki ates kede lworo, do di kipong kede yomcuny, di kiko ringo pi ot waco ne josiao mege.

⁹Yesu oko riamo kede gi, di en eko waco ne gi be, “Yoganu.” Gin kiko ot bute, kiko mulo tiene di kiko wore.

¹⁰Yesu oko waco ne gi be, “Kur ibedunu kede lworo; otunu iwacunu ne imiegu na pi ot Galilaya di kiko bino nena ki kuno.”

¹¹Kakame mon nogo oudo tie ot kede, jo kame oudo tie daro ates oko ot i bomba kiko waco ne jodongo me josaseredoti gikame oudo otimere dedede.

¹²Kakame jodongo me josaseredoti kede joadongo me piny ocokere kede karacel, kiko iiko tam, di kiko mino isirikalen sente atot

¹³di kiwaco ne gi be, “Wacunu ne jo be, ‘Josiao mege obino iwor di wan onino kiko kwalo kome.’

¹⁴Ka kop noni otuno i yit ngapug, wan obino cungo iye di likame ikounu udo peko moro.”

¹⁵Isirikalen jodar oko gamo sente di kiko timo bala kame oudo kowaco ne gi. Kop noni oko sarakin i dier Iyudayan tuno tin.

¹⁶Josiao tomon kiwie acel oko ot Galilaya i moru kame bin Yesu owaco be kioti iye.

¹⁷Kakame kinene kede, gin kiko wore, do jo mogo kikom gi oko bedo kede gungcuny.

¹⁸Yesu oko ot but gi di en eko waco ne gi be, “Kotieko mina akarunikin dedede me i malo kede me lobo.

¹⁹Pi mano, otunu ilokunu jo me atekerin dedede dok jo kame luba, batisonu gi i nying Papa kede Wod kede Tipo Kacil,

²⁰doko di ipwonyunu gi gwoko gikame aciko ne wu pi lubo. Doko nenunu, ango atie kede wu nakanaka tuno i ajikini me piny.”