Read kumam Matayo 4 Bible Online

Matayo 4 - kumam bible

Matayo 4

¹Di do Tipo Kacil oko telo Yesu ot i tim pi Sitani tame.

²Ingei Yesu kanyo kec pi ceng ot ongwon kede iwor da ot ongwon, kec oko neke.

³Di ngatam jo oko bino di oko waco ne be, “Ka in Wot ka Rubanga, wac ne kide gi lokere dok mugati.”

⁴Do Yesu oko dwoko ne be, “Iwandik kacil waco be, ‘Dano likame kuo kede cam kenekene, do kede kop acelacel kame wok ki dog Rubanga.’ ”

⁵Di Sitani oko tero Yesu i Bomba Kacil, di eko kete i amidu me tempulo,

⁶di en eko waco ne be, “Ka in Wot ka Rubanga, som piny ki kan, pien iwandik kacil waco be, ‘Rubanga bino ciko imalaikan mege piri, di gin kiko gwoki; gin kibino gagao in i cing gi, tetekeny kur itwom tieni i wi engaro.’ ”

⁷Yesu oko waco ne be, “Bobo da iwandik kacil waco be, ‘Kur itam Rwot Rubanga ni.’ ”

⁸Sitani bobo oko tero Yesu i wi moru abor twatwal di eko nyuto ne ajakanuto dedede me piny kede deyo gi,

⁹en eko waco ne Yesu be, “Abino mini mago dedede ka iriondiko piny di iko wora.”

¹⁰Yesu oko waco ne be, “Orwa tenge, in Sitani! Pien iwandik kacil waco be, ‘Wor Rwot Rubanga ni di itio ne en kene.’ ”

¹¹Di Sitani oko weko Yesu, di do imalaikan oko bino konye.

¹²Kakame bin Yesu owinyo kede be koketo Yokana i otkol, en eko dok Galilaya.

¹³En eweko Nasaret di eko kato ot bedo i Kaperanaum, bomba kame tie i dog nam me Galilaya, i adulion me Sebulun kede Naputali.

¹⁴Man otimere pi mino cobere kakare gikame bin enabi Isaya owaco be,

¹⁵“Lobo me Sebulun kede me Naputali, kame tie tetu nam adwong, ki loka tetuca me Yorodan, Galilaya, lobo me jo kalikame Iyudayan.

¹⁶Jo kame oudo bin bedo i colo oneno lero adwong, doko jo kame bin bedo i piny acol me to, lero otieko tuno ne gi.”

¹⁷Cako i kare nono, Yesu oko cako pwonyo kope mege di ewaco be, “Swilarunu, pien Ajakanut me malo odoko iyapiyapi.”

¹⁸Di bin Yesu oudo tie ririto dog nam me Galilaya, en eko neno imiegu are, Simoni (kame kolwongo be Petero), kede omin mere Anderia. Gin oudo kitie uco bwoi i nam pien gin oudo jocik.

¹⁹Yesu oko waco ne gi be, “Lubanu, di ako bino loko wu idokunu jo kame coko jo buta akaka cik.”

²⁰Cucuto nono, gin kiko weko bwoini gi di kiko lube.

²¹Di pwodi oudo en etie meede kede ot, eko neno bobo imiegu icegun are, Yakobo kede Yokana, awobe ka Sebedayo, di kitie iiko bwoini gi i yi yee, gin kede papa gi Sebedayo. Yesu oko lwongo gi,

²²cucuto gin kiko weko papa gi kede yee kiko lubo Yesu.

²³Yesu oko ririmo Galilaya dedede di epwonyo jo i sinagogan gi, bobo di etuco Kop Aber me Ajakanut me malo kede di ecango jo kame tie kede iponeso me tuwo dedede apapat kede goro dedede me kom.

²⁴Rwonge mere oko sarakin i piny lung me Siria, omio di oko kelo ne jo dedede kame oudo tie kede tuwo me iponeso apapat, kiton jo kame oudo tie kede jwogi, jo kame oudo tie kede tuwo me ikwikwing kede tuwo kame neko kom dano lung. En eko cango gi.

²⁵Ekodet adwong me jo oko lube, gin bin kiyai ki Galilaya, Dekapoli, Yerusalem, ki Yudea, kede ki loka tetuca me nam me Yorodan.