Read kumam Matayo 5 Bible Online

Matayo 5 - kumam bible

Matayo 5

¹Di Yesu oneno ekodet me jo, en eko yito i wi moru di eko bedo piny. Josiao mege oko cokere oluke.

²En eko cako pwonyo gi di ewaco be:

³“Kitie kede winyo jocan i cuny gi, pien Ajakanut me malo tie mergi.

⁴Kitie kede winyo jo kame tururo, pien kobino dino cuny gi.

⁵Kitie kede winyo jo kame mwolere, pien lobo lung bino doko mergi.

⁶Kitie kede winyo jo kame cuny gi mito timo gikame opoore, pien kobino mino gi gikame kimito.

⁷Kitie kede winyo jo kame tie kede cuny me kisa, pien kobino timo ne gida kisa.

⁸Kitie kede winyo jo kame cuny gi cil, pien kibino neno Rubanga.

⁹Kitie kede winyo jo kame kelo mulem, pien kobino lwongo gi be idwe ka Rubanga.

¹⁰Kitie kede winyo jo kame kotidilo pi timo gi kopoore, pien Ajakanut me malo tie mergi.

¹¹“Itienu kede winyo ka jo cao wu di kitidilo wu, kede di kiwaco epone me kope areco dedede me abe i komu pira.

¹²Lelunu di ikounu bedo kede yomcuny, pien giamia wu me pwoc tie dwong i malo. Epone nono da en kame bin jo otidilo kede inabin kame ogeo bino ne wu.

¹³“Wun itienu bala kado me lobo. Do ka tuto odoko bot, kotwero mine bobo edoko kec benyo? Kony mere udo odoko li, pi mano kobwote tenge, di jo ko nyonyono en.

¹⁴“Wun itienu bala lero ne jo me piny. Bomba kame kogero i wi emukura likame kanere.

¹⁵Likame tie dano moro kame cwinyo etala di eko umo kede ebukit, do eketo kakame idelelei pi mino jo dedede kame tie i ot lero.

¹⁶Iepone nono da miunu lero wu rieny ne jo dedede, tetekeny kinen tice wu kabeco di kiko pako Papa wu kame tie i malo.

¹⁷“Kur iparunu be ango abino pi kwanyo Iswil ka Musa kede pwony me inabin. Ango likame abino pi kwanyo gi, do pi mino gi cobere kakare.

¹⁸Ateteni awaco ne wu be, tek di malo kede lobo pwodi tie, likame tie enyukuta moro akadi acel, akadi dul moro atitidi me gikame kowandiko i Iswil, kame kobino kwanyo di pwodi likame gi dedede kame tie iye ocobere kakare.

¹⁹Pi mano, ngat kame yayago akadi cik atitidi ki kom magi di en eko pwonyo jo apat da pi timo kamanono, en ebino bedo dano kalikame pire tek i Ajakanut me malo. Do ngat kame lubo cik di epwonyo jo apat da pi lubo gi, pire bino bedo tek i Ajakanut me malo.

²⁰Pien ango awaco ne wu be, likame ibinunu karuno donyo i Ajakanut me malo, kwanyo ka itimunu gi kopoore ne Rubanga kalamo jopwony me Iswil kede Iparisayon.

²¹“Wun iwinyunu be bin kowaco ne jo ariki sek be, ‘Kur ineko; ngat kame neko kobino ngolo kop loe.’

²²Do awaco ne wu be, ngat kame doko ger ne dano ocelu, kobino pide; doko ngat kame yeto dano ocelu kobino tere i nyim kansulo; kede ngat kame lwongo dano ocelu be, ‘Ngamingo,’ ebino ot i mac kalikame to.

²³Pi mano, ka oudo itie tero irabu ni ne Rubanga i alutari, di iko yutuno ki kuno be omini tie kede ingungur moro i komi pi raco kame in itimo ne,

²⁴wek irabu ni kuno i nyim alutari, di iko ot dwoko nywak kede omini, i cen mere iko dok mino Rubanga irabu ni.

²⁵“Por kop susunyo kede dano kame mito pidi di pwodi itienu i yongayo, tetekeny kur eteri but ngangolkop, di ngangolkop ko mini i cing sirikale di oko bino tweni i otkol.

²⁶Ateteni awaco ni be, likame ibino wok ki kuno tuno kede di iculo sente dedede kame kotangi kede.

²⁷“Wun itiekunu winyo be bin kowaco be, ‘Kur itim adote.’

²⁸Do ango awaco ne wu be ngat kame neno dako di cunye ko paro buto kede, udo etieko timo adote kede dako nono i cunye.

²⁹Ka wangi tetu cam en kame mi idubo, gole ooko iko uce tenge; eber ne in kei adul moro me komi akaka uco komi dedede i mac kalikame to.

³⁰Doko ka cingi tetu cam en kame mi idubo, ngole di iko uce tenge; eber ne in kei adul moro me komi akaka uco komi dedede i mac kalikame to.

³¹“Doko bin kowaco da be, ‘Ngat kame riamo dako mere, poore emi dako nono baluwa me gonyo nyom.’

³²Do ango awaco ne wu be, ngat kame riamo dako mere, kwanyo ka pi kop me caro, udo en etimo raco me mino dako mere doko ngadote ka enyomere bobo; doko ngat kame nyomo dako kopokere kede cware udo etimo adote.

³³“Doko itiekunu winyo be bin kowaco ne jo ariki sek be, ‘Kur ilairo pi kop me abe, do poore itim ne Rwot gikame in itieko cikere iye.’

³⁴Do ango awaco ne wu be, kur ilairo atwal di iwaco nying malo, piento en ebedo kakame Rubanga pugo kiye,

³⁵arabo di iwaco nying lobo, piento en ebedo abanya kame en eteno iye tiene; amoto di iwaco nying Yerusalem, piento en ebedo bomba me abaka adwong.

³⁶Kame itie lairo, kur ilairo kede wi, pien likame in ikaruno mino yer me wi acel moro bedo col amotoko tar.

³⁷Wek kop kame in iwaco bed be, ‘Ee’ arabo be, ‘Li’; pien kop akalamo magi udo owok kibut Ngarac.

³⁸“Wun itiekunu winyo be bin kowaco be, ‘Wang koculo kede wang, doko lak da koculo kede lak.’

³⁹Do ango awaco ne wu be, kur inyang raco kame dano otimo ni. Ka ngatamoro obapo lemi tetu cam, lok ne tetu ngodal da.

⁴⁰Doko kame ngatamoro opidi pi mito gamo ekoti ni, mie eter kiton esati da.

⁴¹Doko kame ngatamoro odii tetek be iotunu kede pi mairo acel, in do meede ot kede en pi mairo are.

⁴²Ka ngatamoro okwai gimoro, mie. Doko ka ngatamoro mito kopao gimoro kibuti, kur itwone.

⁴³“Wun itiekunu winyo be bin kowaco be, ‘Mar jowoti di iko dagi jo kame dingere kedi.’

⁴⁴Do ango awaco ne wu be, marunu jo kame dingere kede wu, doko da ikounu lego ne jo kame tidilo wu,

⁴⁵tetekeny idokunu idwe ka Papa wu kame tie i malo. Piento en emio ceng rieny ne jo kabeco kede jo kareco da, doko en ecwao kot ne jo atimo gikame beco kede jo kame timo gikareco da.

⁴⁶Ka imarunu jo kame maro wu kenekene, kara ibinunu udo giamia nyo me pwoc kiye? Pien akadi jo kame raro esolo da timo kamanono.

⁴⁷Doko kame in inywako kede jowoti kenekene, udo itimo nyo aber kalamo jo icegun? Pien akadi jo kalikame Iyudayan da timo kamanono.

⁴⁸Pi mano, poore ibedunu jo kopoore bala kite kame Papa wu me i malo opoore kede.