Read kumam Matayo 6 Bible Online

Matayo 6 - kumam bible

Matayo 6

¹“Gwokerenu kur itimunu tice wu kabeco i nyim jo be tetekeny gin kinen wu, pien mano bino mino likame iudunu giamia me pwoc kibut Papa wu kame tie i malo.

²“Pi mano, kame itie mino ngacan gimoro, kur imi jo ngeno, bala kite kame joecuke timo kede i sinagogan kede i dier yote me bomban, be tetekeny jo pak gi. Ateteni awaco ne wu be, gin kitieko gamo giamia gi me pwoc.

³Do ka itie mino ngacan gimoro, kur imi cingi tetu ngodal ngei gikame cingi tetu cam tie timo,

⁴tetekeny wek ebed gi me mung, di Papa ni kame neno gikame in itimo i mung ko bino mini giamia me pwoc.

⁵“Doko ka iyaro ilega, kur ibed bala joecuke. Pien gin kimaro lego acungo i sinagogan, kede i dier yote me bomban be tetekeny jo nen gi. Ateteni awaco ne wu be gin kitieko udo giamia gi me pwoc.

⁶Do kame in iyaro lego, dony i agola ni di iko cego ekeko iko kwac but Papa ni kalikame neeno. Di Papa ni kame neno gi dedede kame in itimo i mung ko bino culi.

⁷“Doko da ka itie ilega, kur iduro kope kame dwong gi li, bala kame jo kalikame Iyudayan timo kede, pien gin kigeno be Rubanga bino winyo gi pi kope kame kiduro.

⁸Kur ibedunu bala gin, pien Papa wu ngeo cuto gikame wun imitunu di pwodi likame ikwaenu.

⁹Pi mano, ka iyarunu ilega, kwaunu kaman; Papa wa kame tie i malo, nyingi bed me awora.

¹⁰Ajakanut ni bin; wek tim i lobo gikame in imito, bala kite kame kotimo kede i malo.

¹¹Miwa tin cam wa me buli ceng.

¹²Sasiro wa ki dub wa, bala kite kame wada osasiro kede jo kame timo ne wa kirac.

¹³Kur iwek wa opot i atama, do gwok wa ki gikarac.

¹⁴“Pien ka in isasiro jo ki dub gi, Papa ni kame tie i malo da bino sasiro in.

¹⁵Do ka in likame isasiro jo apat ki dub gi, Papa ni kame tie i malo da likame bino sasiro in ki dub ni.

¹⁶“Doko ka itienu kanyo kec, kur imiunu nyimu bedo di pek bala kite kame joecuke timo kede. Pien gin kiloko cal me nyim gi be tetekeny jo apat ngei be gin kitie kanyo kec. Ateteni awaco ne wu be, gin kitieko udo giamia gi.

¹⁷Do ka itie kanyo kec, wir wii kede mo, doko di iko lwoko wangi da,

¹⁸tetekeny jo apat kur ngei be in itie kanyo kec, do Papa ni kalikame neeno en kame ko bino neno. Di do Papa ni kame neno gi dedede kame in itimo i mung ko bino mini giamia me pwoc.

¹⁹“Kur ikanunu abar wu i wi lobo kan, kakame ajekel kede nyal dubo gi kiye, kede kakame jokuwo turo di kiko kwalo.

²⁰Do kanunu abar wu i malo kakame ajekel kede nyal likame dubo gi kiye, kede jokuwo da likame twero turo di kiko kwalo.

²¹Pien kakame abar ni tie iye en kame cunyi da bino bedo iye.

²²“Wang dano tie bala etala me kome. Ka wangi tie kiber, komi dedede bino bedo kede lero,

²³do ka wangi odubere, komi dedede bedo i colo. Ka gikame mi lero odoko colo, colo mere do tin bino bedo rom nadi!

²⁴“Likame tie ngatamoro kame twero timo tic ne jodongo are, pien ebino maro ngat acel di eko dagi ngat ocelu; aso ka li, ebino moko i kom ngat acel di eko weko ocelu. In likame ikaruno tic ne Rubanga kede bobo ne abar da.

²⁵“Pi mano, ango awaco ne wu be, kur ibedunu kede par pi gikame ibinunu camo, arabo gikame ibinunu mato pi bedo kuo, amotoko pi gikame ibinunu ngapo. Mam kuo pire tek kalamo cam, doko kom da mam pire tek kalamo giangapa?

²⁶Nenunu ber winy me obar; gin likame kicuo kodi, akadi kac, akadi coko cam i dere, do Papa wu kame tie i malo mio gi cam. Mam wun piru tek kalamo winy?

²⁷Doko ngai kikom wu kame twero medo ceng me kuo mere ka ebedo kede par iye?

²⁸“Do pinyo komio itienu kede par pi giangapa? Nenunu kong epone kame ature me obar dongo kede; gin likame kitimo tic moro, doko likame kitimo igoen gi ken gi.

²⁹Do awaco ne wu be, akadi bin Abaka Sulumani da kede deyo mere dedede, likame oudo tie kede angapito acil bala acel kikom ature nogi.

³⁰Do ka Rubanga tubuso lum me obar, lum kame tin kuo, diki di oko wango gi i mac, iparunu be likame ebino ngapo wun kalamo? Okwecunu wun jo kame yei wu nonok!

³¹Pi mano, kur ibedunu kede par di iwacunu be, ‘Obinunu camo nyo?’ Arabo be, ‘Obinunu mato nyo?’ Amoto be, ‘Obinunu ngapo nyo?’

³²Pien magi en jame kame jo kalikame Iyudayan tam gi tie pi mono; ateteni Papa wu kame tie i malo ngeo be gigi dedede mitere ne wu.

³³Do geunu ber mono Ajakanut ka Rubanga kede poore mere, di en eko bino mino wu gi nogi dedede.

³⁴“Pi mano, kur iparunu kop me diki, pien diki da bino bedo kede par mege kame make. Wek ceng acelacel bed kede peko mege kame make.