Read kumam Matayo 7 Bible Online

Matayo 7 - kumam bible

Matayo 7

¹“Kur ingolunu kop ne jo icegun me wek kur ngol kop ne wuda.

²Pien Rubanga bino ngolo ne wu kop iepone acel nono kame wun ingolunu ne kede jo apat, doko ebino ngolo ne wu kop di epimo rom mere kede kop kame wuda ingolunu ne jo apat.

³Pinyo kame mio in ineno apoke kame tie i wang ngawoti, do di likame iko twero neno isiki kame tie i wangi?

⁴Arabo benyo benyo kame in isobolo waco ne kede ngawoti be, ‘Wek akwany apoke kame tie i wangi,’ do di ida kikomi isiki orire i wangi?

⁵In ngaecuke, gei ber kwanyo isiki kame tie i wangi di do wangi ko doko bit me kwanyo apoke kame tie i wang ngawoti.

⁶“Kur imiunu igwogin gikacil i nyim Rubanga, pien kibino lokere suro wu. Doko kur iucunu ne ipegei bira me wel adwong, pien kibino donyo nyonyono gi kede tien gi.

⁷“Kwaunu, kobino mino wu; mounu, ibinunu udo; kukungunu ekeko, kobino yabo ne wu.

⁸Pien ngat acelacel kame kwao komie, doko ngat kame mo eudo, kede dano kame kukungo ekeko koyabo ne.

⁹Ngai kikom wu ka atin mere openye mugati en emio engaro?

¹⁰Arabo ka epenyo deknam, en emio twol?

¹¹Ka do ber wun jo areco ingeunu mino idwe wu giamia kame beco, do kalamo mano tien adi en kame Papa wu me i malo bino mino jamini kame beco but jo kame kwae!

¹²“Pi mano, tim ne jo apat da gikame in imito be koto gida kitimo ne ida, pien man en Iswil ka Musa kede pwony me inabin.

¹³“Donyunu ki erute adiding, pien erute kame tero jo i to me nakanaka lac, doko yongayo mere lubo yoyot; jo kame donyo ki erute nono tot.

¹⁴Pien erute kame donyo i kuo kame bedo nakanaka diding, doko lubo yongayo mere tek; jo kame ude nonok.

¹⁵“Gwokerenu i kom inabin me angalo, kame bino butu di kicuko be kimwol bala romini, do di i ateni kical bala ipeon ager.

¹⁶Ibinunu ngeno gi kede tice gi kame kitimo. Benyo, kokaruno ngwedo anyakini me olok ki kom okuto, amoto anyakini me epigi kokaruno ngwedo kikom ocokocok?

¹⁷Yat kame kome yot nyako anyakini abeco, do yat kodubere nyako anyakini areco.

¹⁸Yat kame kome yot likame karuno nyako anyakini areco, doko yat kodubere da likame karuno nyako anyakini abeco.

¹⁹Yat acelacel kalikame nyako anyakini abeco kotonge piny di oko uce i mac.

²⁰Pi mano, ibinunu ngeno inabin me angalo kede tice gi.

²¹“Likame ngat acelacel kame lwonga be, ‘Rwot, Rwot,’ bino donyo i Ajakanut me malo, do kenekene ngat kame timo gikame Papa na me i malo mito ne timo en kame bino donyo iye.

²²I ceng me ngolo kop jo atot bino waco na be, ‘Rwot, Rwot, wan bin otatamo kop ka Rubanga i nyingi bobo di oriamo jwogi, kede di otimo tice me twer atot i nyingi!’

²³Do ango ako bino waco ne gi be, ‘Ango gira akwia wu, irwaunu tenge ki nyima, wun jo kame timo gikareco.’

²⁴“Aso, ngat acelacel kame winyo kope na gi, di eko timo gikame ango awaco, udo ecal kede ngarieko kame ogero ode i wi lela.

²⁵Kot di oko cwei, ariram oko bino, di yamo atek oko buko i kom ot nono, do likame en eko poto, pien oudo kogere i wi lela.

²⁶“Do ngat acelacel kame winyo kope na nogi di likame en eko timo gikame awaco, udo ecal kede ngamingo kame ogero ode i asinge.

²⁷Kot di oko cwei, ariram oko bino, kede yamo atek oko buko i kom ot nono, di en eko arwacakin piny, doko arwacakin mere obedo dwong adikinicel.”

²⁸I kare kame Yesu otieko waco kede kope go, ekodet kame oudo tie kuno oko uro epone kame epwonyo kede,

²⁹pien oudo epwonyo kede akarunikin, weko bala bin jopwony me Iswil.