Read kumam Matayo 8 Bible Online

Matayo 8 - kumam bible

Matayo 8

¹Kakame Yesu owok kede piny ki wi moru, ekodet ati me jo oko lube.

²Kikano icuo moro kame tie kede tuwo me dobo oko bino bute di oko riondiko piny i nyime di ewaco be, “Rwot, ka cunyi mito, ikaruno canga.”

³Yesu oko rieno cinge di oko mule di ewaco be, “Amito, cangi!” Cucuto nono dobo mere oko cango.

⁴Yesu oko waco ne be, “Nen be likame iwaco ne ngatamoro gi kotimere, do ot inyutere but ngasaseredoti di iko mino giayala kame bin Musa ociko, pi nyuto ne jo be in itieko cango.”

⁵Kakame Yesu odonyo kede Kaperanaum, ngadwong me isirikalen me Roma bin oko bino bute oko donyo bako ne doge

⁶di ewaco be, “Rwot, ngatic na tie i apien, etie kede aramo alit, doko tuwo oneko kome lung.”

⁷Yesu oko waco ne be, “Ango ayaro bino di ako cange.”

⁸Do ngadwong me isirikalen nono oko dwoko ne Yesu be, “Rwot, ango likame apoore me in bino i oda, do in kenekene wac kop nono, di ngatic nango ko bino cango.

⁹Pien ada atie i akarunikin me jo kame loa, doko ada atie kede isirikalen kame tie i akarunikin na; ka aciko acel kikom gi be, ‘Oti,’ en eko ot; doko ka awaco ne ace da be, ‘Bia,’ en ebino; kede ka awaco ne epasoit na be, ‘Tim gini,’ di en eko timo.”

¹⁰Kakame Yesu owinyo kede kop mere, en eko uro di eko waco ne jo kame bin lube be, “Ango pwodi likame audo epone me yei ni, akadi i piny me Isirael da.

¹¹Awaco ne wu be, jo atot oyaro bino ki tetu kide kede ki tetu potoceng di gin kiko bino camo ebaga kede Aburaam, Isaka kede Yakobo i Ajakanut me malo.

¹²Do jo kame poore bedo i Ajakanut kobino uco gi ooko i kabedo me colo, kakame kibino koko kede mwodo lak gi kiye.”

¹³Yesu oko waco ne ngadwong me isirikalen nono be, “Ot do, wek etimere ni di lubere kede yei ni.” Ngatic me ngadwong me isirikalen nono oko cango esawa nono.

¹⁴Kakame Yesu odonyo kede i ot ka Petero, en eko neno toto me dako ka Petero di tie buto, pien musuja oudo omake.

¹⁵Yesu oko mako cinge, di musuja oko weke, en eko yai malo eko cako tedo gi.

¹⁶Otieno nono jo oko kelo ne Yesu jo atot kame jwogi omako, en eko riamo tipere areco kede twer me kop mere, doko di en eko cango jo dedede kame oudo tuwo.

¹⁷Etimo man pi mino cobere kakare gikame bin enabi Isaya owaco be, “En ekwanyo goro me kom wa di eko yeno tuwo wa.”

¹⁸Aso, kakame Yesu oneno kede ekodet me jo di oluke, en eko waco ne josiao mege be, “Ongolunu loka tetuca.”

¹⁹Ngapwony moro me Iswil oko bino bute di oko waco ne be, “Apwony ango ayaro lubi kabedo dedede kame in ibino ot iye.”

²⁰Yesu oko waco ne be, “Ekwee tie kede bur me buto, kede winy da tie kede ude gi, do Wot ka dano likame tie kede kakame epielo iye wie.”

²¹Ngasiao mere ocelu da oko waco ne be, “Rwot wek ber aoti ayik Papa na.”

²²Do Yesu oko waco ne be, “In luba, wek jo oto en kame yik joe gi oto.”

²³Kakame Yesu odonyo kede i yi yee, josiao mege da oko lube iye.

²⁴Kikano yamo atek oko ngoole i yi nam, omio ebuka oko donyo lepulepun i yi yee, do Yesu oudo onino.

²⁵Gin kiko ot cene di kiwaco ne be, “Rwot lak wa, otienu do to.”

²⁶En eko waco ne gi be, “Pinyo komio itienu kede lworo, okwecunu wun jo kame yei wu nonok?” En eko yai di eko coko yamo kede nam, di kiko kwei cuu.

²⁷Josiao oko uro di kiwaco be, “Epone me dano kacal nadi tin ine, kame akadi yamo kede nam da winyo dwane?”

²⁸Di do Yesu bin ongolo loka nam i piny me Gerasene, en eko riamo kede cuo are kame owok ki wi atesin. Gin oudo kitie kede jwogi, doko oudo kiger twatwal, omio jo oudo lworo lubo yongayo nono.

²⁹Kikano gin kiko lelemo kitek be, “Okwe Wot ka Rubanga, nyo kame itie mito timo ne wan? Mam in ibino kan pi mino wa alola di kare kopoore pwodi likame otuno?”

³⁰Esawa nono, oudo tie esipan me ipegei kame tie cam i kakabobor kede gi.

³¹Jwogi nogo oko ngangao Yesu be, “Ka iriamo wa tenge kikom jogi, cwai wa ooti i kom esipan me ipegei ka.”

³²En eko waco ne gi be, “Otunu.” Gin kiko wokun kiko ot donyo i kom ipegei. Esipan me ipegei lung oko dipere ringo piny lor ki wi emukura, kiko donyo i nam, gin dedede kiko mwony kiko to i pii.

³³Jo kame oudo tie kwano ipegei nogo oko ringo, kiko ot i bomba, di do kiko tatamo ne jo gi dedede kame otimere, kiton gi kotimere ne jo kame oudo tie kede jwogi.

³⁴Di jo dedede me bomba oko wok pi riamo kede Yesu. Esawa kame kinene kede, kiko donyo ngangao en be eyai tenge ki adul gi.