Read kumam Matayo 9 Bible Online

Matayo 9 - kumam bible

Matayo 9

¹Yesu di do oko donyo i yee, eko ngolo loka, di eko tuno i bomba me tur gi.

²Kikano jo mogo oko kelo ne icuo moro kame oudo tuwo oneko kome lung, di etie buto i apien. Kakame Yesu oneno kede yei gi, en eko waco ne icuo kame tuwo oudo oneko kome lung nono be, “Dii cunyi, woda. Kotieko sasiro in ki dub ni.”

³Kikano jopwony mogo me Iswil oko donyo yamo ken gi ken gi be, “Icuo ni tie porere kede Rubanga.”

⁴Do Yesu oko ngeno gikame gin oudo kitie paro, en eko waco ne gi be, “Pinyo komio ibedunu kede par areco i cunyu?

⁵Mene en kame yoyot, waco be, ‘Kotieko sasiro dub ni,’ arabo waco be, ‘Yai malo ioti?’

⁶Do abino mino wu ngeno be Wot ka dano tie kede akarunikin me sasiro jo ki dub gi di en etie i wi lobo kan.” En eko waco ne icuo kame tuwo oudo oneko kome lung nono be, “Yai malo, kwany gibuto ni di iko ot paco.”

⁷Icuo nono oko yai di eko ot paco.

⁸Kakame ekodet oneno kede gi kotimere, lworo omako gi di kiko pako Rubanga pi mino jo akarunikin acal kamano.

⁹Kakame Yesu oyai kede ki kuno di do etie ot, en eko neno icuo kame nyinge Matayo di etie bedo i ot me culo esolo. Yesu oko waco ne be, “Luba.” Matayo oko yai di en eko lubo Yesu.

¹⁰Kakame Yesu do obedo kede kacam i ot ka Matayo, jo atot kame raro esolo kede jodubo oko bino di kiko donyo cam kede Yesu karacel kede josiao mege.

¹¹Do kakame Iparisayon mogo oneno kede gini, gin kiko penyo josiao ka Yesu be, “Pinyo komio apwony wu camo kede jo kame raro esolo kede jodubo?”

¹²Do kakame Yesu owinyo kede peny gi, en eko waco be, “Jo kame kom gi yot likame mito emuron, do kenekene jo kame tuwo.

¹³Otunu ipwonyerenu i dwong me kop kame Rubanga owaco be, ‘Ango amito cuny me kisa, do likame giayala,’ pien ango abino pi lwongo jodubo do likame jo kopoore.”

¹⁴Di do josiao ka Yokana oko bino but Yesu di kipenyere be, “Pinyo komio wan kede Iparisayon okanyo kec, do josiao nin likame kanyo kec?”

¹⁵Yesu oko dwoko ne gi be, “Wun iparunu be wele kame tie i ebaga me nyom twero tururo i kare kame eteran pwodi tie kede gi? Ceng bino tuno kame kobino tero kede eteran tenge kibut gi di do gin kiko bino kanyo kec.

¹⁶“Doko likame tie dano kame dapo egoe anyen i kom egoe oti, pien ka etimo kamanono, egoe anyen bino nyil tenge di eko weko apore adwong kalamo.

¹⁷Akadi da, likame tie dano moro kame keto bwini anyen i isau me lau oti, pien ka etimo kamanono, lau bino mwoc di bwini ko ony, di lau ko dubere; do bwini anyen koketo da i isau me lau anyen, di gin dedede likame kiko dubere.”

¹⁸Di pwodi Yesu oudo tie waco ne gi kop noni, ngapug oko ot di eko riondiko i nyim Yesu di ewaco be, “Nyara kom otieko to nan noni, do bia i ot iket cingi i kome, me wek en ebed kuo bobo.”

¹⁹Yesu oko yai oko lube karacel kede josiao mege.

²⁰Kikano, dako moro kame oudo tie kede tuwo kame omio remo obedo ony ki kome pi mwakini tomon kiwie are oko bino cen ngei Yesu, di en eko mulo lak egoe mere,

²¹pien oudo ewaco kene be, “Do kom koto amulo egoe mere kenekene, koto acango.”

²²Yesu oko lokere oko nene di oko waco ne be, “Dii cunyi, nyara, yei ni ocangi.” Esawa nono di do dako nono oko cango.

²³Kakame Yesu do ooto kede i ot me ngapug, en eko neno jo kame kuto bilo me koko ngat oto, kede ekodet me jo di ocelakino kede koko.

²⁴En eko waco ne gi be, “Irwaunu tenge, pien nyako ni likame oto do en enino anina.” Gin kiko nyere.

²⁵Do kakame kotieko mino jo odonyo kede ooko, Yesu oko donyo kakame nyako nono oudo buto iye di en eko kiarao en kede cinge, nyako nono oko yai.

²⁶Rwonge me kop noni oko sarakin i adul me piny nono dedede.

²⁷Kakame Yesu oyai kede ki kuno di etie ot, imuduka are oko donyo lube ki cen di kilelemo be, “Wot ka Daudi, mi kisa maki kede wa.”

²⁸Kakame Yesu odonyo kede i ot, imuduka are nogo oko bino bute; Yesu oko penyo gi be, “Wun iyeunu be ango atwero cango wu?” Gin kiko dwoko ne be, “Ebo, Rwot.”

²⁹Yesu oko mulo wang gi di ewaco be, “Di lubere kede yei wu, wek etimere ne wu kamanono.”

³⁰Wang gi oko yabere. Yesu oko ciko gi kede dwan atek be, “Miero inenunu be likame imiunu ngatamoro ongeo kop noni.”

³¹Do gin kiko ot di kiko sarakino rwonge me gikame en etimo i adul nono dedede.

³²Kakame kitie ot do kede tenge, oko kelo ne Yesu icuo kame oudo tie kede jwogi kame lebe oto.

³³Do kakame Yesu otieko riamo kede jwogi tenge ki kome, dano kame oudo bin lebe oto nono oko cako yamo. Ekodet oko uro di kiwaco be, “Lem pwodi likame tie gi koneeno i piny me Isirael kame cal kaman.”

³⁴Do Iparisayon oko waco be, “En eriamo jwogi kede twer kowok kibut ngadwong me jwogi.”

³⁵Yesu oko ririmo bomban kede calere dedede me kuno, di epwonyo jo i sinagogan kede di etuco ejiri me Ajakanut ka Rubanga. Bobo da oudo etie cango jo kame tie kede epone me tuwo apapat kede goro me kom.

³⁶Kakame bin eneno kede ekodet me jo, kisa oko make kede gi, pien oudo kitie kede par, doko di kidong atatai abongo kony, bala romini kame li kede ngakwat.

³⁷En eko waco ne josiao mege be, “Kac tie dwong, do jotic nonok.

³⁸Pi mano, legunu me wek Rwot won kac cwai jotic i kac mere.”