Read kumam Marako 1 Bible Online

Marako 1 - kumam bible

Marako 1

¹Man en agege me ejiri ka Yesu Kirisito Wot ka Rubanga.

²En egere bala kite kame bin enabi Isaya owandiko kede kop kame Rubanga owaco be, “Neni, atie cwano ngaor na geo ot nin anyim, kame bino iiko yongayo nin.

³Dwan ngatamoro tie ilelem i tim be, ‘Iikunu ne Rwot yongayo, rieunu ne yote.’ ”

⁴Yokana Ngaibatis oko neeno i tim di ewaco ne jo be kiswilaro, di oko bino batiso gi pi udo isasir ki dub gi.

⁵Jo oko yai ki piny me Yudea bekebek kede ki bomba me Yerusalem, kiko ot but Yokana. Gin kiko tuco dub gi, di Yokana oko batiso gi i ecilet me Yorodan.

⁶Yokana oudo ngapo egoe kame kotimo kede yer me aguragura, di etweo piere kede rakoba me lau. En oudo ecamo obonyo kede mokic.

⁷Bin en ewaco ne jo be, “Tie ngat kame tie bino i cen ngea kame tie kede twer kame loa. Ango likame apoore gungo pi gonyo ausi me amuka mere.

⁸Ango abatiso wu kede pii, do en ebino batiso wu kede Tipo Kacil.”

⁹I kare nono Yesu oko yai ki Nasaret kame tie i piny me Galilaya, en eko bino di Yokana oko batiso en i ecilet me Yorodan.

¹⁰Cucuto di Yesu owok ki dud pii, en eko neno malo di oyabere, di Tipo Kacil oko bino i kome bala awele.

¹¹Dwan oko wok ki malo di waco be, “In en Woda kame amaro, cunya yom i komi.”

¹²Cucuto Tipo Kacil oko tele ot i tim,

¹³en eko bedo kuno pi ceng ot ongwon di Sitani tame. En oudo ebedo kuno kede leini me obar, di imalaikan gwoke.

¹⁴Di bin kotieko tweno Yokana i otkol, Yesu oko ot Galilaya di eko tuco ejiri ka Rubanga

¹⁵di ewaco be, “Kare do otieko romo, doko Ajakanut ka Rubanga otieko doko iyapiyapi. Swilarunu ki dub wu di ikounu yei kop me ejiri!”

¹⁶Di Yesu oudo tie ririto dog nam me Galilaya, en eko neno Simoni kede omin mere Anderia di kitie uco bwoi i nam, pien gin oudo jocik.

¹⁷Yesu oko waco ne gi be, “Lubanu di ako bino loko wu idokunu jo kame coko jo buta akaka cik.”

¹⁸Cucuto gin kiko weko bwoini gi di kiko lube.

¹⁹En eko meede ot anyim anonok, di eko bobo neno Yakobo kede omin mere Yokana, awobe ka Sebedayo, di kitie i yi yee iiko bwoini gi.

²⁰Cucuto di Yesu oko lwongo gi pi bino lube. Gin kiko weko papa gi Sebedayo i yi yee karacel kede jotic kame oudo kopango, gin di kiko lubo Yesu.

²¹Yesu kede josiao mege oko tuno i bomba me Kaperanaum. Cucuto di Ceng Sabato otuno, en eko ot i sinagoga di eko pwony.

²²Jo oko uro pwony mere piento en oudo epwonyo kede akarunikin, weko bala bin jopwony me Iswil.

²³Cucuto icuo moro kame oudo tie kede tipo arac oko bino i sinagoga gi nono di eko lelemo be,

²⁴“Yesu me Nasaret, nyo kame imito kibut wa? Mam ibino do pi tieko wa? Ango angei, in ibedo Dano Kacil ka Rubanga!”

²⁵Do Yesu oko coke di ewaco be, “Lingi, doko wok tenge ki kome!”

²⁶Tipo arac nono oko mino kom icuo nono odonyo miel teltel, eko dwilao di do eko wok tenge ki kome.

²⁷Gin dedede kiko uro kitek di kiko donyo penyere ken gi ken gi be, “Nyo ine? Man bobo pwony anyen! Kom icuo ni tie kede akarunikin me ciko tipere areco di gin kiko timo gikame en ewaco.”

²⁸Rwonge i kom Yesu oko sarakin awakawaka i adulion dedede kame oluko Galilaya.

²⁹Kakame Yesu oyai kede ki sinagoga, cucuto en eko donyo i ot ka Simoni kede Anderia, en karacel kede Yakobo kede Yokana.

³⁰Musuja oudo omako toto me dako ka Simoni tie i apien. Cucuto di Yesu otuno, oko waco ne kop me aramo nono.

³¹En eko ot but ngatuwo, eko mako cinge di eko kiarao en. Musuja oko weke di eko cako tedo gi.

³²Otieno nono di do ceng otieko donyo, jo oko kelo ne Yesu jotuwo dedede kiton jo koudo tie kede jwogi.

³³Jo dedede me bomba oko cokere i nyim ot.

³⁴Yesu oko cango jo atot kame oudo tie kede tuwo me iponeso apapat, eko riamo jwogi atot, doko oudo likame eyei ne jwogi yamo, pien gin oudo kingee.

³⁵Odiko sek di pwodi piny cocol, Yesu oko dilo yai eko ot kakoling eko donyo ilega.

³⁶Do Simoni karacel kede jo kame oudo tie kede oko wape.

³⁷Di bin kiude, kiko waco ne be, “Jo dedede tie moni.”

³⁸Yesu oko dwoko ne gi be, “Wek ootunu i bomban ace da tetekeny apwony gida kope na, pien kop nono en komio ango abino.”

³⁹Yesu oko ririmo Galilaya dedede, di epwonyo kop ka Rubanga i sinagoga gi kede di eriamo jwogi.

⁴⁰Adobo moro oko bino, eko riondiko piny i nyim Yesu di ebako doge be, “Kame cunyi mito, ikaruno canga.”

⁴¹Kisa oko mako Yesu i kome eko rieno cinge di eko mule, eko waco ne be, “Amito; cangi.”

⁴²Cucuto dobo oko weke di eko cango.

⁴³Yesu oko cike kede dwan atek di oko mine eoto

⁴⁴di ewaco ne be, “Miero inen be likame iwaco ne ngatamoro gi kotimere; do ot inyutere but ngasaseredoti, di iko mino giayala me lonyere ni bala kite kame bin Musa ociko kede, pi nyuto ne jo be in do itieko cango.”

⁴⁵Do icuo nono oko ot, en eko cako yamo kop nono abongo lworo di eko mino kop nono osarakin; man oko mino Yesu likame oko twero bobo donyo i bomba moroni obe, do en gire eko donyo bedo i calo, di jo oko donyo bino bute di kiwok ki adulion dedede.