Read kumam Marako 10 Bible Online

Marako 10 - kumam bible

Marako 10

¹Di Yesu oko yai ki kuno eko ot i adul me Yudea, en eko ngolo ecilet me Yorodan. Jo atot bobo oko cokere bute, en eko pwonyo gi bala kite kame lem oudo enare timo kede sek.

²Iparisayon mogo oko bino bute pi kino doge di kiko penye be, “Iswil wa yei ne dano riamo dako mere?”

³Yesu oko lunyo penyo gi be, “Nyo kame bin Musa ociko ne wu?”

⁴Gin kiko dwoko be, “Musa bin oyei ne icuo wandiko baluwa me gonyo nyom di en eko riamo dako mere.”

⁵Yesu oko dwoko ne gi be, “Musa bin owandiko Iswil gi piru pien pwonyo wun tek.

⁶Do i agege, i kare me cwec, iwandik kacil waco be, ‘Rubanga ocweo gi icuo kede dako.

⁷Pi manoni, icuo bino weko papa mere kede toto mere, di en eko ribere kede dako mere,

⁸gin jo are go kiko doko kom acel.’ Aso, udo likame doko kitie jo are.

⁹Pi mano, gikame Rubanga otieko ribo karacel, kur ngatamoro poki.”

¹⁰Di do kidok i ot, josiao oko bobo penyo Yesu i kom kop noni.

¹¹En eko waco ne gi be, “Icuo kame riamo dako mere di eko nyomo dako ace, udo etimo adote.

¹²Iepone nono da, dako kame pokere kede cware di en eko ot nyomere kede icuo ace, udo eda etimo adote.”

¹³Jo oko donyo kelo idwe atino but Yesu me wek eket cinge i kom gi, do josiao oko donyo cokocoko gi be kiweki.

¹⁴Do kakame Yesu oneno kede kamano, cunye oko wang, di en eko waco ne josiao mege be, “Wekunu idwe atino bin buta, kur igengunu gi, pien Ajakanut ka Rubanga tie pir jo kame cal bala gin.

¹⁵Ateteni awaco ne wu be, ngat kalikame gamo Ajakanut ka Rubanga bala atin atitidi, likame ebino donyo iye.”

¹⁶En eko tingo gi i kore, eko keto cinge i wi gi, di eko mino gi winyo.

¹⁷Di Yesu oudo tie yai ot, icuo moro oko ringini oko riondiko i nyime, di oko penye be, “Apwony aber, atim nyo me wek aud kuo kame bedo nakanaka?”

¹⁸Yesu oko penye be, “Pinyo komio in ilwonga be ngat aber? Likame tie ngat aber kwanyo Rubanga kenekene.

¹⁹Mam in ingeo cik gi: ‘Kur ineko, Kur itimo adote, Kur ikwalo, Kur imio ijura me abe, Kur isero, Wor papa ni kede toto ni?’ ”

²⁰Loca oko dwoko be, “Apwony, ango abedo gwoko cik go dedede cako di pwodi ango eponga.”

²¹Yesu oko ngine di oko bedo kede amara bute, di oko waco ne be, “In idong kede gi acel kame ipoore timo; oti icat jame dedede kame itie kede, di iko mino jocan sente kame iudo, di iko bino bedo kede abar i malo, di do iko bino luba.”

²²Kakame icuo nono owinyo kede kop no, en eko jul di eko ot tenge di cunye owang, pien oudo ebaro twatwal.

²³Yesu oko ngoloro josiao mege di en eko waco ne gi be, “Ebino tin bedo tek benyo ne jo kobaro donyo i Ajakanut ka Rubanga.”

²⁴Kop noni oko neko kom josiao. Do Yesu bobo oko waco ne gi be, “Idwe na, donyo i Ajakanut ka Rubanga tin tek benyo!

²⁵Eyoyot ne aguragura donyo ki wang piso kalamo ngabar donyo i Ajakanut ka Rubanga.”

²⁶Man oko medo neko kom josiao, kiko penyo Yesu be, “Ngai do kame twero udo alako?”

²⁷Yesu oko ngino gi di eko waco be, “Man likame twerere kibut dano, do weko kibut Rubanga, pien kibut Rubanga gi dedede twerere.”

²⁸Di Petero oko cako waco ne be, “Neningo, wan oweko gi dedede di oko lubi.”

²⁹Yesu oko waco ne gi be, “Ateteni awaco ne wu be, ngat kame weko paco mere, imiegu kede amiegu mege, amotoko toto kede papa mere, idwe mege kiton poti mege pira kede pi ejiri,

³⁰ebino udo gi nogi dedede tien tol acel i kare kanataman; ebino udo ude, imiegu kede amiegu mege, joatoti, idwe kede poti karacel kede itidil da, di en eko bino udo kuo kame bedo nakanaka i kare koyaro bino.

³¹Do jo atot kame nataman tie me agege bino bedo me ajikini, kede jo kame nataman tie me ajikini bino bedo me agege.”

³²Yesu kede josiao mege oudo tie i yongayo me ot Yerusalem, en oudo etelo ne gi yongayo. Josiao mege oko uro adikinicel, kede jo koudo lubo gi da oko bedo kede lworo. En doko eko tero josiao tomon kiwie are tenge kargi ken gi, di en eko cako tatamo ne gi kop i kom gikame oudo oyaro timere ne

³³di ewaco ne gi be, “Winyunu, wan otienu ot Yerusalem, di jo ko bino mino Wot ka dano i cing jodongo me josaseredoti kede jopwony me Iswil. Gin kibino ngolo ne kop me to, di kiko mine i cing jo kalikame Iyudayan,

³⁴di gin kiko bino timo ne tim me anywar; kibino ngulo lau i kome di kiko dane di kiko neke da, do ingei ceng me adek en ebino yaruno.”

³⁵Yakobo kede Yokana, kame oudo obedo awobe ka Sebedayo oko bino but Yesu di kiko waco ne be, “Apwony, wan omito be itim ne wa gikame oyaro kwani.”

³⁶Yesu oko penyo gi be, “Nyo inonono kame imitunu be ango atim ne wu?”

³⁷Gin kiko waco ne be, “Kame idonyo i deyo ni, mi ngat acel kikom wa bed i badi tetu cam kede ngat ocelu i badi tetu ngodal.”

³⁸Do Yesu oko waco ne gi be, “Wun likame ingeunu gikame itienu kwano. Benyo, itwerunu wuda mato ikopo me can kame miero ango amati? Arabo, itwerunu yei udo batisimu kame miero batiso ango kede?”

³⁹Gin kiko dwoko ne be, “Wan otwero.” Yesu oko waco ne gi be, “Ateteni ibinunu mato ikopo me can kame miero ango amati, doko da kobino batiso wu kede batisimu kame miero batiso ango kede.

⁴⁰Do ango likame atie kede akarunikin me mino ngatamoro bedo i bada tetu cam amotoko tetu ngodal. Do kabedo nogi tie pi jo kame kotieko iiko ne gi.”

⁴¹Kakame josiao icegun tomon owinyo kede kop noni, kiko lilo kede Yakobo kede Yokana.

⁴²Yesu oko lwongo gin dedede bute, di eko waco ne gi be, “Wun ingeunu be jo kame poore pugo jo kalikame Iyudayan pugo gi tetek, doko da jodongo gi tie kede akarunikin i kom gi.

⁴³Do man likame epone kame miero ebed kede i diere wu. Do ngat kame mito bedo dano kame pire dwong kikom wu, miero ebed ngatic wu,

⁴⁴doko ngat kame mito bedo dano me agege i diere wu, miero ebed epasoit me jo icegun.

⁴⁵Pien Wot ka dano da likame obino pi jo timo ne tic, do en ebino pi timo tic ne jo icegun kede pi jalo kuo mere pi lako jo atot.”

⁴⁶Gin kiko tuno Jeriko. Esawa kame Yesu kede josiao mege oudo tie yai kede ki Jeriko karacel kede ekodet adwong me jo, emuduk moro kame oudo maro kwac kame nyinge Batulumayo wot ka Timayo oudo tie bedo i nget yongayo.

⁴⁷Kakame ewinyo kede be Yesu me Nasaret oudo inonono, en eko cako lelemo be, “Okwe Yesu Wot ka Daudi, mi kisa maki keda!”

⁴⁸Jo atot oko donyo cokocoko en di kiwaco ne be elingi, do en eko meede ameda ilelem di ewaco be, “Okwe Wot ka Daudi, mi kisa maki keda!”

⁴⁹Yesu oko cungo di eko waco be, “Lwongenu ebin.” Kikano gin kiko lwongo emuduk nono di kiwaco ne be, “Dii cunyi, yai malo, en etie lwongi.”

⁵⁰En eko uco egoe mere me adoka, eko lepun malo di eko ot but Yesu.

⁵¹Yesu oko penye be, “Imito be atim ni nyo?” Emuduk nono oko dwoko be, “Apwony, mi wanga nen piny.”

⁵²Yesu oko waco ne be, “Ot do; yei ni ocangi.” Cucuto wange oko cako neno piny di do en eko cako lubo Yesu.