Read kumam Marako 11 Bible Online

Marako 11 - kumam bible

Marako 11

¹Kakame kinoko kede Yerusalem, di pwodi kitie tetu bomban me Betepage kede Betania, i moru me Olibeti, Yesu oko cwano josiao mege are anyim,

²di ewaco ne gi be, “Wun otunu i calo kame tie anyim ca. Cucuto di itienu donyo iye, ibinunu udo atin me punda di kotweo, kalikame pwodi ngatamoro owanano; gonyenu di ikounu kele.

³Ka ngatamoro openyo wu be, ‘Pinyo komio itienu timo kamano?’, wacenu be, ‘Rwot en kame mite, doko da eyaro mino kodwoke susunyo.’ ”

⁴Gin kiko ot di kiko udo atin me punda di kotweo i nget ekeko i dog egudo, di kiko gonye.

⁵Jo kame oudo cungo kuno oko penyo gi be, “Wun itienu timo nyo, kom gonyo atin me punda no?”

⁶Gin kiko dwoko ne gi kop kame Yesu oudo owaco, di jo nogo oko yei ne gi ot.

⁷Gin kiko kelo atin me punda nono but Yesu, kiko peto igoen gi ingee, di Yesu oko bedo iye.

⁸Jo atot oko peto igoen gi i yongayo, apat mege opeto boke kame kitongo ki poti.

⁹Jo kame oudo telo anyim kede jo kame oudo lube ki cen oko cako lelemo be, “Osana![3] Etie kede winyo, ngat kame bino i nying Rwot!

¹⁰Etie kede winyo Ajakanut kame tie bino, en ajakanut ka papa wa Daudi! Osana i malo twal!”

¹¹Yesu oko donyo Yerusalem, di eko ot donyo i tempulo eko donyo ngingio jame dedede rimaro. Do kite kame piny oudo oyuto kede, omio en eko ot Betania kede josiao mege tomon kiwie are.

¹²Oru mere di kitie dwogo ki Betania, kec oudo oneko Yesu.

¹³Di pwodi etie tenge, en eko neno yat epigi kame pote oumo, eko ot kuno pi neno ka oudo etwero udo anyakini mogo iye. Do kakame etuno kede i dude, en eko udo yat nono di tie kede pote kenekene, pien kare me nyak gi oudo pwodi likame otuno.

¹⁴En eko waco ne yat nono be, “Likame ngatamoro bobo bino camo anyakini ni!” Josiao mege owinyo di ewaco kop noni.

¹⁵Kakame kituno kede Yerusalem, Yesu oko donyo i tempulo di eko cako riamo jo kame oudo tie cato kede wilo jame ooko; eko rereto imesai me jo kame oudo seso sente, kede gibedo me jo kame oudo cato amam.

¹⁶Likame en eko yei ne ngatamoro tero gimoro ngolo kede tempulo.

¹⁷Di do en eko pwonyo gi be, “Mam kowandiko i iwandik kacil be, ‘Kobino lwongo oda be ot me ilega me atekerin dedede?’ Do wun itiekunu loke edoko kapwono me joyak!”

¹⁸Kakame jodongo me josaseredoti kede jopwony me Iswil owinyo kede kop noni, kiko cako mono epone me neko Yesu; gin oudo kitie kede lworo i kome, pien ekodet lung oudo ouro pwony mere.

¹⁹Di piny oyuto, Yesu kede josiao mege oko yai ki bomba.

²⁰Oru mere odiko di kitie ot i yongayo, kiko neno yat epigi nono di etieko tuo cako ki wie tuno kiton i aliasin.

²¹Petero oko yutuno gikame oudo otimere, en eko waco ne Yesu be, “Apwony, neningo yat kame ilamo nono otieko tuo!”

²²Yesu oko dwoko ne gi be, “Bedunu kede yei i kom Rubanga.

²³Ateteni awaco ne wu be, ngat kame waco ne moru ni be emukere di eko ot poto i nam abongo gung i cunye, do di eyei be gikame ewaco nono bino timere, kobino timo ne.

²⁴Pi mano, awaco ne wu be, gi dedede kame ikwaunu i ilega, bedunu kede yei be itiekunu udo gi, di en eko bino bedo meru.

²⁵Doko kame itie ilega, di oudo itie kede kop moro arac kede ngatamoro, ber isasiro en, tetekeny Papa ni kame tie malo da ko sasiro in ki gikareco.”

²⁶(“Do kalikame wun isasirunu jo apat, Papa wu me i malo da likame bino sasiro wu.”)

²⁷Gin bobo kiko dok Yerusalem. Kakame oudo Yesu tie ot kede i tempulo, jodongo me josaseredoti, jopwony me Iswil, karacel kede joadongo me piny oko ot bute.

²⁸Gin kiko penye be, “Akarunikin mene en kame in itimo kede gigi? Ngai en komi akarunikin me timo gi?”

²⁹Yesu oko dwoko ne gi be, “Ango ayaro penyo wu peny acel, do ka imianu adwokini mere, ada ako bino waco ne wu akarunikin kame ango atimo kede gi nogi.

³⁰Ber wacanu; akarunikin kame bin Yokana batiso kede jo oudo owok kibut Rubanga, arabo kibut dano?”

³¹Gin kiko cako piem ken gi ken gi be, “Odwokenu benyo? Ka owacunu be, ‘Ewok ki malo’, en ebino penyo wa be, ‘Do pinyo komio likame ikounu yei en?’

³²Do owacenu benyo, be ewok kibut jo?” Gin oudo kilworo ekodet me jo, pien jo dedede oudo ngeo kiber be Yokana obedo enabi.

³³Di do gin kiko dwoko ne Yesu be, “Wan girwa okwia.” Yesu oko waco ne gi be, “Akadi ada likame abino waco ne wu akarunikin kame ango atie timo kede gi nogi.”