Read kumam Marako 12 Bible Online

Marako 12 - kumam bible

Marako 12

¹Di Yesu oko cako yamo kede gi i agole be, “Bin icuo moro opuro poto me olok di eko luke kede awas, di en eko kunyo bur iye me bino bwini, eko gero esipet me daro poto. Di do en eko keto jo mogo daro ne poto nono, di en eko ot i piny apat.

²Kakame kare me ngwedo olok otuno kede, won poto oko cwano ngatic mere acel but jodar poto pi ot gamo ne anyakini mogo kowok ki poto mere.

³Gin kiko make kiko bunge, di kiko riame edok kede cinge nono.

⁴Won poto bobo oko cwano ngatic mere ace, gin kiko daruno mano da kiko tuco wie kede kiko timo ne tim me lewic.

⁵Di bobo en eko cwano ngatic ace, do mano kiko neko. Kitimo kamanono da ne jotic apat atot, mogo kibungo, kede mogo kiko neko.

⁶Oudo pwodi edong kede dano acel kobedo wode kame emaro. Me ajikini mere en eko do cwano wode nono di ewaco be, ‘Angeo be kiyaro do bedo kede wor but woda.’

⁷Do jodar poto ka oko donyo yamo ken gi ken gi be, ‘Man en musika mere, bia onekenu me wek jame kame en epoore sikao dok megwa.’

⁸Gin kiko make, kiko neke di kiko uce ooko me poto me olok.

⁹“Nyo do kame won poto me olok no bino timo? En eyaro bino di eko neko jodar poto me olok nogo di do eko mino poto mere me olok i cing jodar apat.

¹⁰Mam itiekunu somo iwandik kacil kame waco be, ‘Kidi kame jogedo odagi, en kame olokere oko doko kidi me esonda kame pire tek;

¹¹man Rwot en kotimo, doko i wang wa, etie gi me aura?’ ”

¹²Jotel me Iyudayan oko tamo make, pien gin oudo kitieko niang kiber be Yesu oudo oyamo agole noni i kom gin. Do pien oudo kilworo ekodet, oko mino kioto tenge kiweke.

¹³Jotel me Iyudayan oko cwano Iparisayon mogo kede jo me ekodet ka Erode but Yesu pi ot kino doge.

¹⁴Kiko bino but Yesu di kiko waco ne be, “Apwony, wan ongeo be in dano me ateni. Doko in likame ilworo ngatamoro, pien in likame ineno dano kede cal mere me ooko, do in ipwonyo jo yongayo ka Rubanga i ateni. Benyo, Iswil yei ne jo culo esolo but Kaisari arabo li? Ocul gi arabo li?”

¹⁵Do kite kame oudo Yesu ngeo kede ecuke gi, omio en eko waco ne gi be, “Pinyo komio itienu tama? Kelanu ber sente akaya acel aneni.”

¹⁶Gin kiko kelo ne. En eko penyo gi be, “Cal kede nying ngai ine kame tie iye ni?” Gin kiko dwoko ne be, “Me ka Kaisari.”

¹⁷Yesu oko waco ne gi be, “Aso, miunu Kaisari jame ka Kaisari, ikounu mino me ka Rubanga da but Rubanga.” Gin kiko uro kite kame edwoko kede.

¹⁸Isadukayon, jo kalikame oudo yei kede kop me iyarun, oko bino but Yesu di kiko penye be,

¹⁹“Apwony, Musa bin owandiko ne wan Iswil kame waco be, ka icuo moroni oto eko weko dako mere di likame enywal kede, omin mere miero do mak apuserut kame en eto eweko me wek enywal kede idwe ne omin mere kame oto nono.

²⁰Aso, bin tie imiegu kanyaare, me agege oko nyomo dako, do en eko to eweko dako nono abongo idwe.

²¹Omin mere me are oko mako apuserut nono eko bedo kede. Manono da bobo oko to oweko dako nono abongo idwe. Gi acel nono oko timere ne omin gi me adek da,

²²tuno i me kanyaare. Gin dedede kiko to abongo nywal. Ki cen mere di do dako nono da oko to.

²³Nan do i ceng me iyarun en ebino bedo dako ka ngai? Pien cuo kanyaare nogo dedede oudo obedo kede en bala dako gi.”

²⁴Yesu oko waco ne gi be, “Gini en komio wun ipotunu, pien wun ikwianu iwandik kacil akadi twer ka Rubanga.

²⁵Pien kame jo oyaruno, cuo kede mon likame bobo bino nyomere, do kibino bedo cal bala imalaikan kame tie i malo.

²⁶Aso, do i kom kop kame mako yaruno jo oto, mam itiekunu somo kiye itabu ka Musa kop i kom abum, epone kame Rubanga owaco ne kede be, ‘Ango en Rubanga ka Aburaam, Rubanga ka Isaka kede Rubanga ka Yakobo’?

²⁷En likame Rubanga me jo oto, do en Rubanga me jo akuo. Wun kom ipotunu.”

²⁸Ngat acel kikom jopwony me Iswil oko bino en eko winyo di kitie piem. Kakame eneno kede be Yesu odwoko peny gi kiber, en eko penye be, “Kara ber cik mene en kame pire tek kalamo?”

²⁹Yesu oko dwoko ne be, “Cik kame pire tek kalamo en ine be, ‘Winyi in Isirael! Rwot Rubanga wa en Rwot acel.

³⁰Poore imar Rwot Rubanga ni kede cunyi dedede, kede kuo ni dedede kede tam ni dedede, kede teko ni dedede.’

³¹Me are en ine be, ‘Mar ngakio ni bala kite kame imaro kede komi keni.’ Likame doko tie cik moro kame pire tek kalamo magi.”

³²Ngapwony me Iswil nono oko waco ne Yesu be, “Apwony, idwoko kop kiber, iwaco be Rwot Rubanga en acel, doko likame tie rubanga moro ace, kwanyo en kene, mano tie kop me ateni;

³³kede doko be, mar Rwot Rubanga ni kede cunyi dedede, kede tam ni dedede kede teko ni dedede, di iko maro ngakio ni bala kite kame imaro kede komi keni, man en kame kalamo giamia kame kowango alutu kede giayala.”

³⁴Kakame Yesu oneno kede be icuo nono odwoko peny mere kede rieko, en eko waco ne be, “In kom likame ibor do kede Ajakanut ka Rubanga.” Ingei mano, likame tie ngatamoro kame oko dino cunye penye kop moro.

³⁵Di bin Yesu tie pwony i tempulo, en eko penyo jo be, “Benyo benyo kame jopwony me Iswil waco kede be Kirisito en wot ka Daudi?

³⁶Daudi da kikome bin Tipo Kacil otelo di en eko waco be, ‘Rwot Rubanga owaco ne Rwot na be: Bed i bada tetu cam, tuno di ango atieko mini inyono jokwor ni piny i tieni.’

³⁷Ka Daudi da kikome bin olwonge be ‘Rwot’, Kirisito doko twero bedo wot ka Daudi benyo?” Ekodet adwong oudo tie winyo pwony ka Yesu kede kilel.

³⁸I pwony mere, Yesu owaco ne gi be, “Gwokerenu i kom jopwony me Iswil, kame maro latao di kingapo ikanson aboco di kimito be di jo moto gi kede wor i atalen.

³⁹Doko kimaro bedo i komini abeco i sinagoga, kede kabedo me wor i ibagai.

⁴⁰Gin kicamo jame me apuserun, di kiko donyo ngangalo lego ilega aboco me ecuke. Kobino ngolo ne gi kop kame kalamo.”

⁴¹Yesu oko bedo di epimere kede adita me irabu, en eko donyo neno epone kame oudo ekodet me jo tie mino kede irabu gi. Jo kobaro atot oudo mio sente atot twatwal;

⁴²di apuserut moro kame ngacan da oko bino, en eko kwanyo abolai are kenekene.

⁴³En eko lwongo josiao mege di eko waco ne gi be, “Ateteni awaco ne wu be, apuserut kame ngacan ni en komio irabu atot kalamo jo apat go dedede.

⁴⁴Pien jo kobaro omio gikolamar ki abar gi, do apuserut ni, i can mere, en ekwanyo gi dedede kame oudo etie kede, kame epoore kuo kede.”