Read kumam Marako 13 Bible Online

Marako 13 - kumam bible

Marako 13

¹Di bin Yesu tie wok ki tempulo, ngasiao mere acel oko waco ne be, “Apwony, neningo twon kide kede twon gedo go!”

²Yesu oko waco ne be, “Mam ineno twon gedo go? Likame tie kidi acel moro koyaro dong cungo i wi kidi ocelu; kobino rereto gin dedede piny.”

³Di bin Yesu tie bedo i wi moru me Olibeti, kame oudo pimere kede tempulo, Petero, Yakobo, Yokana kede Anderia oko bino bute. Di kiko penye i mung be,

⁴“Wac ne wa, awene en kame gini bino timere kede, doko gianena nyo kame bino bedo tie pi nyuto be kare do oyapuno tuno me gi nogi dedede timere?”

⁵Yesu oko cako waco ne gi be, “Gwokerenu me wek kur ngatamoro rweny wu.

⁶Jo atot oyaro bino i nyinga di kiwaco be, ‘Ango en Kirisito!’ Di gin kiko bino rwenyo jo atot.

⁷Doko kame iwinyunu kop me yi kame tie timere, kede rwonge me yi, kur cunyu poti, pien manono miero timere, do likame udo ajikini otuno.

⁸Pien atekerin bino yi, doko ajakanut acel da bino yi kede ajakanut ocelu. Yangere me piny bino bedo tie kabedere atot doko kec bino bedo tie. Do magi dedede tie bala agege me aramo me nywal.

⁹“Do gwokerenu; pien koyaro pido wu i nyim kansulo, kede kobino bungo wu i sinagoga. Ibinunu cungo i nyim jopug kede i nyim abakai pira, pi mino ijura.

¹⁰Do me agege miero ber tuc ejiri ne atekerin dedede.

¹¹Do ka komako wu di oko tero wu pido wu i nyim kansulo, kur igeunu bedo kede par pi kop kame iyarunu waco; do kame esawa oromo, wacunu kop kame kobino keto i dogu. Pien kop kame ibinunu yamo likame bino bedo megu do kibino wok kibut Tipo Kacil.

¹²Dano bino mino kotero omin mere di oko neko, papa me atin da bino timo ne atin mere kamanono, kede idwe bino dagi jonywal gi, di kiko mino koneko gi.

¹³Jo dedede bino dagi wu pira. Do ngat kame bino kanyakino tuno i ajikini bino udo alako.

¹⁴“Do kame inenunu gikame munao kabedo kacil ka Rubanga di kosipo kakame oudo likame epoore bedo iye (ngat kame tie somo poore niang dwong mere), jo kame tie Yudea miero do ringi i wi mori.

¹⁵Dano kame tie i wi ot kur doko wok piny amotoko edonyi i ot pi kwanyo gimoro.

¹⁶Doko ngat kame tie i poto kur doko dok i paco pi omo egoe.

¹⁷Can tin bino bedo dwong benyo ne mon oyac kede kame doto idwe i ceng nogo!

¹⁸Kwaunu Rubanga, me wek gigi kur timere i kare me ngico.

¹⁹I ceng go can adwong bino bedo tie kame epone mere lem pwodi likame otimere cako Rubanga cweno piny tuno nan, doko da likame ebino medo timere.

²⁰Doko koto Rwot likame odwodwoko wel me ceng nogo, koto likame ngatamoro obwot. Do pi jo mege kame en eyero, omio Rwot odwodwoko ceng nogo odoko nonok.

²¹“I kare nono ka ngatamoro owaco ne wu be, ‘Neni, Kirisito ine!’ arabo be, ‘Neni, en ica!’ kur iyeunu kop mere.

²²Pien jo kame cuko be gin kibedo Kirisito, kede inabin me angalo oyaro bino. Kiyaro timo gianena kede gi me isuur pi ngalo jo kame Rubanga oyero, ka twerere.

²³Do gwokerenu, ango atieko waco ne wu gigi dedede di pwodi likame kare otuno.

²⁴“I kare nono di do peko nono otieko timere, wang ceng bino doko col, duwe likame doko bino rieny,

²⁵acerin da bino popoto ki malo, kede twer kame tie malo bino yayangun.

²⁶Di do jo ko bino neno Wot ka dano di bino kede idoun kede twer adwong kede deyo.

²⁷En ebino cwano imalaikan tetu bad ongwon dedede me wi lobo pi coko jo kame Rubanga oyero, cako ki agege me lobo tuno i ajikini me malo.

²⁸“Siaonu pwony kame yai ki kom yat epigi; cucuto kame ajange mege odoko yoyom di pote gi oko cako lot, wun ingeunu be kare me iporo do oyapuno tuno.

²⁹Iepone nono da kame inenunu gigi tie timere, ngeunu be en do etieko doko iyapiyapi, kom etuno i erute.

³⁰Ateteni ango awaco ne wu be, gigi dedede bino timere di pwodi jo kame nan tie di kuo likame oto.

³¹Malo kede lobo bino rwenyo, do kope nango likame bino rwenyo.

³²“Do likame tie ngat kame ngeo awene kame ceng amotoko esawa nono bino tuno kede, akadi imalaikan kame tie i malo, akadi Wot ka Rubanga da likame ngeo, do Papa kenekene en kame ngeo.

³³Gwokerenu, bedunu di ikiunu piny, pien likame ingeunu awene en kame kare no bino tuno kede.

³⁴Ebino bedo cal bala dano moro kame tie ot i piny abor. Do di pwodi likame eyai, emio jotic mege tic kame ngat acelacel poore timo, di en eko ciko ngadar ekeko pi bedo di wange bit.

³⁵Pi mano, wuda kiunu piny, pien likame ingeunu awene kame won ot oyaro bino kede, cengemogo eyaro bino otieno, arabo i dier iwor, arabo tetu obai di tongwen tie koko amotoko odiko.

³⁶Aso ka li, en ebino ngoole angola di eko udo wu di ininunu.

³⁷Gikame ango atie waco ne wu en kame atie waco ne jo dedede da be: kiunu piny!”