Read kumam Luka 19 Bible Online

Luka 19 - kumam bible

Luka 19

¹Yesu oko donyo Jeriko di oudo etie beo abea ki kuno.

²Icuo moro oudo tie kuno kame nyinge Sakayo, kame oudo obedo ngadwong me jorar esolo, doko di ebaro.

³En eko mono epone me neno Yesu pi mito ngene, do likame eko twero, pien ekodet oudo dwong, aso di en oudo ebedo dano acecek.

⁴Di do Sakayo oko ringo anyim, di eko yito i wi cukamori, me wek etwer neno Yesu, pien Yesu oudo oyaro beo ki kanono.

⁵Kakame bin do Yesu otuno kede kanono, eko ngoloro malo di eko waco ne be, “Sakayo, wok piny awakawaka, pien ango tin ayaro bedo welo me turi.”

⁶Sakayo oko susunyo wok piny di cunye oko bedo yom pi gamo Yesu.

⁷Do kakame jo oneno kede kamano, kiko donyo ngunguro di kiwaco be, “Neni, kom eoto bedo welo me ngadubo.”

⁸Di Sakayo oko yai malo, di eko waco ne Rwot be, “Neningo, Rwot, ango ayaro mino dul me jame na but jocan; doko ka lem oudo arodo gi ka ngatamoro, ayaro cule kame rom kamanono tien ongwon.”

⁹Yesu oko waco ne be, “Alako tin do otieko bino i ot noni, pien eda ebedo akwar Aburaam.

¹⁰Pien Wot ka dano obino pi mono kede pi lako jo korwenyo.”

¹¹Di oudo pwodi jo tie winyo kop nono, Yesu oko meede waco ne gi agole moro, pien oudo eyapuno do tuno Yerusalem, doko da pien jo oudo tamo be Ajakanut ka Rubanga do oudo iyapiyapi neeno.

¹²Aso, Yesu oko waco ne gi be, “Bin won ajakanut moro oyai di eko ot i piny abor pi kwere pi doko abaka, di do eko bino dwogo.

¹³En ber eko lwongo jotic mege tomon, di eko mino gi siringi tutumia tomon di ewaco negi be, ‘Timunu tic me cat kede sente gi tuno ango dwogo.’

¹⁴Do jo me piny mere oudo dage, omio kiko oro jo olube pi ot waco be, ‘Wan likame omito be icuo ni pug wa.’

¹⁵“Do kakame edwogo kede ingei en camo ajakanut; en eko waco be lwong ne jotic mege kame ngoce epoko ne gi sente, me wek engei ameda kame kiudo ki tic me cat.

¹⁶Dano me agege obino bute di oko waco ne be, ‘Adwong, siringi ni tutumia acel nono okelo ameda me siringi tutumia tomon.’

¹⁷Ngadwong mere oko waco ne be, ‘Itimo kiber, in ngatic aber! Aso, pi kite kame ibedo kede ngat kame genere kede gikame titidi, in ibino pugo bomban tomon.’

¹⁸Dano me are da oko bino di eko waco be, ‘Adwong, siringi ni tutumia acel okelo ameda me siringi tutumia kany.’

¹⁹Ngadwong mere oko waco ne be, ‘Ida ibino pugo bomban kany.’

²⁰“Di bobo dano ace oko bino di oko waco be, ‘Adwong, sente ni ine; ango bin ako bone kede itambala di ako kane,

²¹pien ango oudo alwori, pien in ibedo dano kame ekite mere tek, in ikwanyo gi kalikame in iketo, doko ikao gi kalikame in icuo.’

²²Ngadwong mere oko waco ne be, ‘In ibedo ngatic arac! Ayaro tic kede kop kowok ki dogi me ngolo ni kop! Mam oudo ingeo be ango abedo dano kame ekite mere tek, akwanyo gi kalikame aketo, doko akao gi kalikame ango acuo?

²³Pinyo bo komio in likame iko kano sente nango go i bangki, me wek koto nan adwogo ako gamo gi kede ameda moro?’

²⁴“Di en eko waco ne jo kame oudo tie cungo kuno be, ‘Gamunu do sente go kibute ikounu mino ngat kame tie kede siringi tutumia tomon.’

²⁵(Di gin kiko waco ne be, ‘Adwong, do en etie kede siringi tutumia tomon!’)

²⁶‘Ango awaco ne wu be, ngat kame tie kede gimoro, kobino medo ne ace; do ngat kame li kede gimoro, akadi atitidi kame etie kede da, kobino kwanyo tenge kibute.

²⁷Aso, do jokwor nango gi, kalikame oudo mito be ango apug gi, kelunu gi kan inekunu gi i nyima.’ ”

²⁸Di bin Yesu otieko yamo kope nogi, en eko meede ot paka Yerusalem.

²⁹Kakame enoko kede Betepage kede Betania, i moru me Olibeti, en eko cwano josiao mege are,

³⁰di ewaco ne gi be, “Otunu i calo kame tie anyim ca, di itienu donyo iye, ibinunu udo atin me punda di kotweo, kalikame pwodi ngatamoro owanano; gonyenu di ikounu kele kan.

³¹Ka ngatamoro openyo wu be, ‘Pinyo komio itienu gonye?’, wacenu be, ‘Rwot en kame mite.’ ”

³²Jo kame bin kocwao oko ot di kiko udo gi dedede di tie bala kite kame Yesu oudo owaco ne gi kede.

³³Kakame bin josiao tie gonyo kede atin me punda, wone oko penyo gi be, “Pinyo komio wun itienu gonyo atin me punda no?”

³⁴Gin kiko dwoko ne be, “Adwong en kame mite.”

³⁵Di gin kiko kele but Yesu. Di do kiko donyo peto igoen gi ingei atin me punda nono, di kiko mino Yesu obedo iye.

³⁶Kakame bin en etie ot kede, jo oko donyo peto igoen gi i yongayo.

³⁷Di do bin eyapuno donyo Yerusalem, di etie i aserengete me moru me Olibeti, ekodet me josiao mege dedede oko cako kilel di kipako Rubanga kede dwan amalo, pi tice adongodongo me twer kame gin oudo kineno.

³⁸Gin oudo kipake di kiwaco be, “Etie kede winyo abaka kame bino i nying Rwot! Mulem bed i malo kede deyo bed but Rubanga i malo twal.”

³⁹Iparisayon mogo kame bin tie i dier ekodet oko waco ne be, “Apwony, wac ne josiao ni lingi.”

⁴⁰En eko dwoko ne gi be, “Awaco ne wu be, ka jogi oling, kide bino donyo lelemo.”

⁴¹Kakame Yesu onoko kede bomba me Yerusalem di eko nene, en eko kok pire,

⁴²di ewaco be, “Koto di oudo tin in ingeo gikame romo kelo ni mulem da! Do nataman kokano gi kibuti.

⁴³Pien kare oyaro bino, kame jokwor ni bino gero kede apama di kiko luki kede, di kiko goloro in ki bad dedede.

⁴⁴Gin kibino tyaikino in piny di kiko nyinyito jo ni dedede kame bedo kanono; doko likame kibino weko kidi moro di odokakin i wi kidi ocelu, pien in likame oudo ingeo esawa me alako ni.”

⁴⁵Di Yesu oko donyo i tempulo, eko cako riamo jo kame bin oudo tie cat kuno ooko,

⁴⁶di ewaco ne gi be, “Kowandiko i iwandik kacil be, ‘Oda bino bedo ot me ilega’; do wun itiekunu loke edoko kapwono me joyak.”

⁴⁷En oudo epwonyo i tempulo ceng dedede. Di jodongo me josaseredoti, jopwony me Iswil, kede joadongo me piny oko donyo mono epone me neke;

⁴⁸do likame kiko karuno udo epone me timo, pien jo dedede oudo tie ciko yit gi pi winyo kop mere.