Read kumam Luka 2 Bible Online

Luka 2 - kumam bible

Luka 2

¹I kare no Kaisari Agusito oudo owoto iswil be poore wandiko nying jo dedede kame tie i piny kame en epugo.

²Man oudo obedo wandiko nying jo kotimere tien me agege di Kwirino en oudo obedo ngapug me Siria.

³Di do jo dedede oko ot pi wandiko nying gi, ngat acelacel i bomba me tur gi.

⁴Yosepu da oko yai ki bomba me Nasaret kame tie i piny me Galilaya, en eko ot i Bomba ka Daudi kame kolwongo be Betelem, kame tie i piny me Yudea, en kakame oudo bin konywalo iye Abaka Daudi. En bin eoto kuno pien oudo eda ebedo akwar Daudi.

⁵En oudo eoto pi wandiko nyinge kede Maria, ngat kame oudo onero pi nyomere kede en. Maria oudo oyac.

⁶I kare kame do gin oudo kitie kede Betelem, esawa mere me nywal oko tuno.

⁷En eko nywalo atin awobi kao mere, di en eko ume kede igoen me mukeru kiber, di eko piele i atuba me cam me dok, pien gin do oudo likame kisobolo udo kabedo i ot me wele.

⁸Bin jokwat oudo tie i piny nono kame oudo tie i ebar iwor nono gwoko romini gi.

⁹Malaika ka Rwot oko neeno but gi, di deyo ka Rwot oko rieny oluko gi, lworo oko mako gi.

¹⁰Di do malaika oko waco ne gi be, “Kur ibedunu kede lworo, pien akelo ne wu kop aber me kilel adwong, kame oyaro bino but jo dedede;

¹¹pien tin konywalo ne wu Ngalak i Bomba ka Daudi, en Kirisito Rwot.

¹²Gikame bino nyuto ne wu en ine: ibinunu ot ikounu udo atin di koumo kede igoen me mukeru di etie buto i atuba me cam me dok.”

¹³Cucuto nono di ekodet kame oyai ki malo oko neeno karacel kede malaika nono, kiko donyo pako Rubanga di kiwaco be,

¹⁴“Deyo bed but Rubanga kame tie i malo twal, kede mulem bed i lobo but jo dedede kame cunye yom i kom gi!”

¹⁵Kakame bin imalaikan nogo oyai kede tenge kibut gi pi dok malo, jokwat oko donyo yamo ken gi ken gi be, “Ootunu wada ber Betelem onenunu gikame otimere noni, kame tin Rubanga omio wa ongeo.”

¹⁶Gin kiko ot awakawaka, di kiko udo Maria kede Yosepu, di atin tie buto i atuba me cam me dok.

¹⁷Kakame kineno kede atin, kiko tatamo gi dedede kame oudo malaika owaco ne gi i kom atin nono.

¹⁸Jo dedede kame bin owinyo kope go oko uro twatwal gikame jokwat owaco ne gi.

¹⁹Do Maria oko mako kope nogi dedede di eparo gi i cunye.

²⁰Jokwat oko dok di kimio deyo but Rubanga, di kipake pi gi dedede kame oudo kiwinyo kede kame kineno, bala kite kame imalaikan oudo owaco ne gi kede.

²¹Di do ceng kanyauni oromo, oko kepo atin, di oko cako nyinge Yesu, nying kame oudo malaika bin ociko di pwodi likame koyace be cak ne.

²²Di do kare me lonyere gi oromo bala kite kame Iswil ka Musa oudo mito kede, Maria kede Yosepu da oko tero atin Yerusalem pi mine i cing Rwot,

²³(bala kite kame bin kowandiko kede i iswil ka Rwot be, “Idwe awobe kao dedede kobino mino gi bala gikacil but Rwot”),

²⁴di gida kiko mino giayala bala kite kame oudo iswil ka Rwot waco kede be, “Amam are arabo ilukei atitino are.”

²⁵I kare no oudo tie icuo moro Yerusalem kame nyinge Esimioni. En oudo icuo kopoore, kame keto cunye woro Rubanga, kame oudo tie kuro neno epone kame Rubanga bino kweno kede cuny jo me Isirael; en oudo epong kede Tipo Kacil.

²⁶Doko Tipo Kacil oudo otieko mine ngeno be, likame ebino to tuno kede di eneno Kirisito ka Rwot.

²⁷Tipo Kacil oko telo Esimioni, en eko bino i tempulo. Kakame jonywal me atin Yesu okele kede i tempulo pi timo ne gikame Iswil mito,

²⁸Esimioni oko tingo atin, di eko mino pwoc but Rubanga di ewaco be,

²⁹“Rwot, nan do in itie peruno ngatic ni eot kede mulem, bala kame bin iwaco kede;

³⁰pien wanga otieko do neno alako ni,

³¹kame in itieko iiko di jo dedede neno,

³²en lero kame nyuto mit nin but jo kalikame Iyudayan, kede kame kelo deyo but jo ni me Isirael.”

³³Papa me atin kede toto mere oko bedo kede ur adikinicel pi gikame Esimioni owaco i kom atin.

³⁴Esimioni oko kwano ne gi winyo di ewaco ne Maria toto me atin be, “Neningo, Rubanga oketo atin noni pi kelo poto kede akiar me jo atot i Isirael; kede pi bedo gianena ka Rubanga kame jo atot bino dagi,

³⁵doko ida epima bino cobo cunyi pelao, tetekeny par me cuny jo atot ko bino nyutere kakaler.”

³⁶Bin tie enabi moro adako, kame nyinge Aana, en oudo nyar ka Panueli, me ateker me Aser. En oudo etieko ti adikinicel, ingei bedo kede cware pi mwakini kanyaare cako i kare kalikame oudo pwodi engere kede icuo.

³⁷En eko bedo apuserut tuno mwakini mege me dongo romo ot kanyauni kiwie ongwon. En oudo likame eyai tenge ki tempulo, doko da di epako Rubanga iceng kede iwor, di ekanyo kec kede ilega.

³⁸Esawa nono en eko bino di eko mino pwoc but Rubanga, di eko donyo yamo kop i kom atin but jo dedede kame oudo tie daro kare kame Rubanga bino lako kede Yerusalem.

³⁹Di do kitieko timo gi dedede bala kame iswil ka Rwot mito, Yosepu kede Maria oko dok kede Yesu i bomba me tur gi, kame kolwongo be Nasaret, i piny me Galilaya.

⁴⁰Atin oko dongo di etek, di epong kede rieko, doko kisa ka Rubanga oudo tie kede en.

⁴¹Mwaka acelacel jonywal ka Yesu oudo bedo ot Yerusalem i kare me ebaga me Bwot.

⁴²I kare kame oudo mwakini me dongo ka Yesu oromo kede tomon kiwie are, kiko ot i ebaga bala kite kame lem kinare timo kede.

⁴³Kakame ebaga otiek kede, Yosepu kede Maria oko cako dok do paco; Yesu oudo odong cen Yerusalem di jonywal mege likame ngeo,

⁴⁴gin oudo kiparo be Yesu da tie i dier jo kame oudo tie upere kede gi. Kiko ot pi ceng acel lung di kiko cako mone i dier joawade gi kede jo kame kinao kede.

⁴⁵Do likame kiko ude. Di do gin kiko bobo dok cen Yerusalem di kimoe.

⁴⁶Ingei ceng me adek kiko do ude i tempulo, di etie bedo kede jopwony me Iswil di ewinyo kope gi kede di epepenyo gi.

⁴⁷Jo dedede kame oudo owinyo yamo mere oko uro epone me niang mere kede epone kame edwoko kede peny.

⁴⁸Kakame jonywal mege onene kede, kiko uro adikinicel. Di toto mere oko waco ne be, “Woda, itimo wa kamano pinyo? Neningo, ango kede papa ni otie moni kede par atek.”

⁴⁹En eko dwoko ne gi be, “Pinyo komio wun oudo itienu mona? Mam oudo likame ingeunu be ango poore abed i ot ka Papa na?”

⁵⁰Do gin likame kiko niang kop kame en ewaco ne gi nono.

⁵¹Di do en eko upere kede gi, kiko dok Nasaret, di en eko donyo bedo kede wor but gi. Do toto mere oko kano kope nogi lung i cunye.

⁵²Di do Yesu oko meede dongo i rieko kede i kome di etie kede kisa ka Rubanga doko di jo mare.