Read kumam Luka 20 Bible Online

Luka 20 - kumam bible

Luka 20

¹Ceng moro acel di Yesu oudo tie pwony i tempulo, di etuco ejiri, jodongo me josaseredoti kede jopwony me Iswil karacel kede joadongo me piny oko bino bute,

²di kiko waco ne be, “Wac ne wa, in iudo akarunikin me timo gigi ki tuai? Ngai komii akarunikin nono?”

³Yesu oko dwoko ne gi be, “Ango da ayaro penyo wu; wacanu ber,

⁴akarunikin kame bin Yokana batiso kede jo oudo owok kibut Rubanga arabo kibut dano?”

⁵Di gin kiko donyo poro kop nono ken gi ken gi di kiwaco be, “Ka owacunu be, ‘Ewok ki malo,’ en ebino penyo wa be, ‘Do pinyo komio likame ikounu yei en?’

⁶Aso ka wan owacunu be, ‘Ewok kibut jo,’ jo dedede oyaro didipo wa kede kide. Pien gin kiyei kiber be Yokana oudo obedo enabi.”

⁷Di do gin kiko dwoko ne be gin likame kingeo kakame akarunikin mere owok kiye.

⁸Di Yesu oko waco ne gi be, “Akadi ada likame abino waco ne wu akarunikin kame ango atie timo kede gi nogi.”

⁹Di Yesu oko cako tatamo ne jo agole moro be, “Bin tie icuo moro kopuro poto me olok, di en eko keto jo mogo daro ne poto nono, di do en eko ot i piny apat pi kare alac.

¹⁰Kakame kare otuno kede me ngwedo olok, en eko cwano ngatic mere acel but jodar poto mere nono, me wek kimi eda anyakini mogo. Do jodar poto oko daruno ngatic nono di kiko bunge, kiko riame edok kede cinge nono.

¹¹Di en bobo eko cwano ngatic mere ace; mano da kidaruno di kiko bungo, kede kiko timo ne tim me lewic, di kiko dwoko eda abongo gimoro.

¹²Di doko en eko cwano ngatic mere me adek; do mano kiko mino awanon di kiko uce tenge me poto me olok.

¹³Won poto me olok nono di do oko waco be, ‘Nan do abino timo benyo? Abino cwano woda kame amaro; cengemogo kibino mine wor.’

¹⁴Do kakame jodar poto me olok onene kede, gin kiko donyo yamo ken gi ken gi be, ‘Man en musika mere, bia onekenu me wek jame kame epoore sikao dok megwa.’

¹⁵Gin kiko make di kiko uce ooko me poto me olok, kiko neke. Nyo do kame won poto me olok no bino timo ne jodar poto go?

¹⁶En eyaro bino di eko neko jodar poto me olok nogo dedede, di eko bino mino poto mere me olok i cing jodar apat.” Kakame jo bin owinyo kede kop noni, kiko waco be, “Mano likame timere.”

¹⁷Do en eko ngoloro gi, di eko penyo gi be, “Nan do dwong me iwandik noni en nyo, iwandik kame waco be, ‘Kidi kame jogedo odagi, en kame olokere oko doko kidi kame pire tek me esonda’?

¹⁸Jo dedede kame poto i wi kidi nono bino ngingidun; do ka kidi nono opoto i kom ngatamoro, ebino nyinyito dano nono.”

¹⁹Jopwony me Iswil kede jodongo me josaseredoti oko tamo mako Yesu iesawa nono, do kiko lworo jo; pien gin oudo kitieko niang kiber be en oudo eyamo agole noni i kom gin.

²⁰Di do gin kiko cako kine, kiko cwano jo kame begao kop, jo kame oudo cuko be gin jo me ateni, tetekeny kimak kop moro ki dog Yesu, me wek kitwer make di kiko mine i loc kede i akarunikin me ngapug.

²¹Gin kiko penye be, “Apwony, wan ongeo be pwony nin kede yamo nin tie me ateni. Doko in likame itie kede apokapoka but jo, do in ipwonyo gikame Rubanga mito be jo lubi, di lubere kede ateni.

²²Benyo, Iswil yei ne wa pi culo esolo but Kaisari arabo li?”

²³Do Yesu oko mako rieko gi di en eko penyo gi be,

²⁴“Aso, nyutanu ber sente akaya acel; cal kede nying ngai en kame tie iye?” Gin kiko waco be, “Me ka Kaisari.”

²⁵Di do Yesu oko waco ne gi be, “Miunu jame ka Kaisari but Kaisari, ikounu mino me ka Rubanga da but Rubanga.”

²⁶Do oudo likame kitwero make pi kope mege i nyim jo kanono; gin do kiko lunyo bedo kede ur twatwal i kom kop kame en edwoko ne gi, di do kiko ling.

²⁷Isadukayon mogo oko bino but Yesu, gin jo kame waco be jo oto likame bino yaruno.

²⁸Di kiko penyo Yesu be, “Apwony, Musa bin owandiko ne wan Iswil kame waco be, ‘Ka icuo moroni oto di en eko weko dako mere abongo idwe, omin mere miero do mak apuserut nono, me wek enywal kede idwe ne omin mere kame bin oto nono.’

²⁹Aso, bin tie imiegu kanyaare. Awobi me agege oko nyomo dako, di en eko to eweko dako abongo idwe.

³⁰Omin mere me are,

³¹kede me adek da di bin oko bedo kede dako nono; iepone nono, awobe kanyaare nogo dedede oko to di likame kiweko dako nono kede atin moro akadi acel.

³²Ki cen mere, di do dako nono da oko to.

³³Nan do i ceng me iyarun, dako noni bino bedo me ka ngai? Pien cuo kanyaare nogo dedede oudo obedo kede en bala dako gi.”

³⁴Yesu oko waco ne gi be, “Jo me i kare ni nyomere, doko komio gi me anyoma;

³⁵do jo kame poore yaruno ki to di kiko bedo i kuo me kare kame bino bino likame nyomere arabo komio gi me anyoma.

³⁶Pien udo gin likame bobo kitwero to, pien gin kical bala imalaikan, doko kibedo idwe ka Rubanga, bala kame gin do udo kitieko yaruno kede.

³⁷I kom kop kame waco be jo oto bino yaruno, akadi Musa da bin onyuto be koyaruno jo oto, enyuto manoni i iwandik mere i kom abum kame oudo tie liel, kakame bin en elwongo kiye Rwot be Rubanga ka Aburaam, Rubanga ka Isaka kede Rubanga ka Yakobo.

³⁸En ebedo Rubanga me jo kakuo, likame Rubanga me jo oto; pien jo dedede kuo pire.”

³⁹Jopwony me Iswil mogo oko dwoko be, “Apwony, in kom iyamo kiber.”

⁴⁰Likame doko gin kiko dino cuny gi penye peny moro akadi acel.

⁴¹Do Yesu oko penyo gi be, “Benyo benyo kame gin kitwero waco kede be Kirisito en wot ka Daudi?

⁴²Pien Daudi da kikome bin owaco i itabu me Sabuli be, ‘Rwot Rubanga bin owaco ne Rwot na kaman: Bed i bada tetu cam,

⁴³tuno di ango atieko mini inyono jokwor ni piny i tieni bala abanya me teno tien.’

⁴⁴Ka Daudi da bin olwonge be ‘Rwot’, Kirisito doko twero bedo wot ka Daudi benyo?”

⁴⁵Di do bin jo ociko yit gi pi winyo yamo ka Yesu, en eko waco ne josiao mege be,

⁴⁶“Gwokerenu kara i kom jopwony me Iswil, kame maro ilat di kingapo ikanson aboco, di kimito be di jo moto gi kede wor i atalen, doko kimaro bedo i komini abeco i sinagoga, kede kabedo me wor i ibagai.

⁴⁷Gin jo kame camo jame me apuserun, di kilego ilega aboco me ecuke. Rubanga bino ngolo ne gi kop adwong kalamo.”