Read kumam Luka 21 Bible Online

Luka 21 - kumam bible

Luka 21

¹Yesu bin oko tingo wange di eko neno jo ka obaro di tie keto giamia gi i adita me irabu me tempulo;

²doko en eko neno apuserut moro kame ngacan da di keto abolai mege are.

³En eko waco be, “Ateteni awaco ne wu be, apuserut ngacan ni en kokwanyo irabu kalamo jo apat dedede;

⁴pien gin kikwanyo gikame olamar ki abar gi, do i can mere, en ekwanyo gi dedede kame oudo epoore kuo kede.”

⁵Jo mogo oko donyo yamo kop kame mako tempulo, epone kame oudo kotubuso en kede kide kabeco kede giamia kame oudo komio but Rubanga; en eko waco ne gi be,

⁶“Gikame wun inenunu nogi, kare oyaro tuno kalikame tie kidi moro akadi acel ki kan kame bino dong cungo i wi kidi ocelu; kobino rereto gin dedede piny.”

⁷Di gin kiko penye be, “Apwony, awene en kame gini bino timere kede, doko gianena nyo kame bino bedo tie pi nyuto be gi noni do oyapuno timere?”

⁸Yesu oko waco ne gi be, “Gwokerenu me wek kur rweny wu. Pien jo atot oyaro bino i nyinga di kiwaco be, ‘Ango en Kirisito!’ kede da be, ‘Kare otieko do tuno!’ Do kur iyeunu lubo gi.

⁹Doko kame iwinyunu rwonge me yi kede arubaruba, kur ibedunu kede lworo, pien gigi miero kong gei timere, do ajikini likame bino tuno cucuto.”

¹⁰Di do en eko waco ne gi be, “Atekerin bino yi, ajakanut acel da bino yi kede ajakanut ocelu.

¹¹Piny bino donyo yangere kitek, doko kec kede aumpuli bino bedo tie i kabedere apapat, doko gikame kelo lworo kede gianena adongodongo bino neeno i malo.

¹²Do di pwodi likame gigi dedede otimere, kibino mako wu di kiko tidilo wu, di kiko tero wu i nyim kansulo me sinagogan kede i otkol. Kobino tero wu i nyim abakai kede i nyim wegi apugan pira.

¹³Man bino mino wu kare aber me mino ijura i koma.

¹⁴Pi mano, mokunu tam wu pi weko cako paro epone kame ibinunu dwoko kede peny;

¹⁵pien ango abino mino wu kope me ayama, kede rieko da kalikame tie ngakwor wu moro kame bino twero kanyakino arabo piem kede.

¹⁶Kiton jonywal wu, imiegu wu, joawade wu, karacel kede joawotino wu da bino rupao wu, di oko bino neko mogo kikom wu da.

¹⁷Jo dedede bino dagi wu pira.

¹⁸Do akadi yer acel me wi wu likame bino rwenyo.

¹⁹Ibinunu udo kuo me ateni pi ikanyakin wu.

²⁰“Do kame inenunu isirikalen oluko Yerusalem, ngeunu do be kare me poto mere do otieko tuno.

²¹Di do jo kame tie Yudea miero ringi i wi mori, doko jo kame tie i bomba noni do miero yai tenge, kede jo kame tie ooko me bomba noni kur doko dony iye;

²²pien ceng nogi obedo ceng me culo kwor, pi mino gikame riki kowandiko cobere kakare.

²³Can tin bino bedo dwong benyo ne mon oyac kede kame doto idwe i ceng nogo! Pien can adwong bino bedo tie i wi lobo, kede lilo ka Rubanga bino bedo i kom jo nogi.

²⁴Mogo kobino neko kede epima, doko kobino mako mogo di oko tero gi bala mabus i pinye dedede; di jo kalikame Iyudayan ko bino tuturo Yerusalem piny tuno kede kame kare gi otiek.

²⁵“Ceng kede duwe kede acer bino bedo kede gianena mogo, doko atekerin dedede me piny da ko bino bedo kede iturur pi mor kede ebuka me nam.

²⁶Jo bino wile pi lworo kede pi paro gikame oyaro timere i wi lobo; pien twer dedede kame tie i malo bino yayangun.

²⁷Di do kiko bino neno Wot ka dano di tie bino kede edou, kede twer kede twon deyo.

²⁸I kare kame gigi bino cako timere kede, miero iyabunu wangu di ikounu tingo wi wu malo, pien alako wu do udo oyapuno tuno.”

²⁹Di Yesu oko tatamo ne gi agole moro be, “Nenunu ber yat epigi, kede yen apat dedede;

³⁰cucuto kame pote gi ogeo lot, wun inenunu di ikounu ngeno be iporo do oyapuno tuno.

³¹Iepone nono da, kame inenunu gigi do tie timere, ngeunu be Ajakanut ka Rubanga do oyapuno tuno.

³²Ateteni ango awaco ne wu be, gigi dedede bino timere di pwodi jo kame nan tie di kuo likame oto.

³³Malo kede lobo bino rwenyo, do kope nango likame bino rwenyo.

³⁴“Do poore igwokerenu, me wek kur doko idonyunu keto cunyu itek i kom cam kede amera kede par pi kuo me i kare ni, di ceng no ko bino ngoole mako wu

³⁵bala owic. Pien ceng no bino tuno ne jo dedede kame bedo i wi lobo lung.

³⁶Do bedunu di ikiunu piny i kare dedede, di ilegunu, me wek iudunu teko me bwot ki gikame oyaro timere nogi dedede, kede me cungo i nyim Wot ka dano.”

³⁷Ceng dedede Yesu oudo pwonyo i tempulo, do iwor en oudo eoto buto i wi moru me Olibeti.

³⁸Doko odiko sek jo dedede oudo bino bute i tempulo pi winyo kop mere.