Read kumam Luka 5 Bible Online

Luka 5 - kumam bible

Luka 5

¹Cenge moro acel, Yesu oudo tie cungo i dog nam me Genesaret, di jo tie dire kitek pi mito tuno bute, pi winyo kop ka Rubanga.

²En eko neno yede are di tie i dog nam. Jocik oudo otieko do wok tenge ki yede nogo kitie do lwoko bwoini gi.

³Yesu oko donyo yi yee acel kikom gi, kame oudo obedo yee ka Simoni, di en eko kwano Simoni be remoro en ber anonok i pii. En eko donyo pwonyo ekodet di ebedo i yi yee.

⁴Di do bin etieko yamo, en eko waco ne Simoni be, “Kwangunu ber kong yee ootunu i dier nam kakatut, di ikounu uco bwoini wu iye me wek imakunu deknam mogo.”

⁵Do Simoni oko dwoko ne be, “Adwong, do wan kom tin ocane iwor kiakia, do likame oko mako gimoro akadi acel. Do bala kite kame in en iwaco kede, abino do ber uco bwoini nogi kamanono.”

⁶I kare kame bin do kituno kede i dier nam kakatut, kiko uco bwoini di kiko mako deknam atot adikinicel, oko mino bwoini gi do oudo mito cocotun.

⁷Di do kiko gweto jowot gi kame oudo tie i yi yee apat pi bino konyo gi. Jo nogo oko bino di kiko pongo yede are nogo dedede kede deknam, omio kiko cako lwiny.

⁸Do kakame bin Simoni Petero oneno kede gikame otimere, en eko riondiko piny i tien Yesu di ewaco be, “Okwe Rwot ot tenge kibuta, pien ango ngadubo!”

⁹Pien Simoni Petero karacel kede jowote nogo oudo obedo kede ur atek twatwal pi twon deknam kame oudo kimako.

¹⁰Akadi Yakobo kede Yokana da, kame obedo awobe ka Sebedayo, oko bedo kede ur, pien gin oudo kitie karacel kede Simoni. Di Yesu oko waco ne Simoni be, “Kur ibed kede lworo, cako tin ibinunu donyo coko jo buta.”

¹¹Kakame kitieko wano kede yede ooko i dog nam, gin kiko do weko tice dedede kame oudo lem kibedo timo, di kiko donyo lubo Yesu.

¹²I kare moro di Yesu oudo tie i bomba moro acel, icuo moro kame dobo oudo otatapo i kome oko bino kuno. Kakame bin eneno kede Yesu, en eko poto eriebere piny i tiene, di ebako doge be, “Rwot, ka cunyi mito, ikaruno canga.”

¹³Yesu oko rieno cinge oko mule di ewaco be, “Amito, cangi!” Cucuto nono di dobo mere oko cango.

¹⁴Yesu oko cike di waco ne be kur eoti ewac ne ngatamoro, do be, “Oti iko nyutere but ngasaseredoti, di iko mino giayala ni me pwoc pi in cango, bala kame Musa bin ociko. Mano bino bedo gikame nyuto be in icango.”

¹⁵Do rwonge i kom Yesu oko medo sarakin ameda, di ekodet me jo oko donyo bino di kicokere pi winyo kop mere kede pi udo cango ki tuwo gi me iponeso apapat.

¹⁶Do Yesu oudo pokere kene eko ot kakoling di eko donyo ilega.

¹⁷Ceng moro acel di bin Yesu oudo tie pwony, Iparisayon mogo kede jopwony me Iswil oudo tie bedo kuno, kame bin oyai ki calere dedede kame tie Galilaya kede Yudea, kede mogo kame bin wok ki Yerusalem. Twer ka Rwot me cango jotuwo oudo tie i kom Yesu.

¹⁸Cuo mogo oko bino di kiyeo dano kede gibuto mere, dano kame oudo tuwo oneko kome lung. Di kiko tamakino bala koto kiudo epone me cwane i ot, me wek kipiele i nyim Yesu.

¹⁹Do pi kite kame jo oudo opong kede i ot, omio likame kiko karuno tuno kede but Yesu. Di do gin kiko yito malo i wi ot, di kiko yabo wi ot, kiko rwako icuo nono kede gibuto mere, kiko yololo en piny i dier jo i nyim Yesu.

²⁰Kakame Yesu bin oneno kede yei gi, en eko yamo ne icuo nono be, “Ngawota, kotieko do sasiro in ki dub ni.”

²¹Jopwony me Iswil karacel kede Iparisayon oko cako penyere ken gi ken gi be, “Ngai ber ine kame yamo kope me acae i kom Rubanga? Ngai kame twero sasiro jo ki dub gi, kwanyo Rubanga kene?”

²²Yesu oudo ngeo gikame gin kitie paro i cuny gi, omio en eko penyo gi be, “Pinyo ber komio wun itienu kede peny kame cal kamago i cunyu?

²³Mene en kame do yot, waco ne dano noni be, ‘Kosasiro in ki dub ni,’ arabo waco ne be, ‘Yai malo ioti?’

²⁴Do pi mino wu ngeno be Wot ka dano tie kede akarunikin me sasiro jo ki dub gi i wi lobo”, en eko waco ne icuo nono be, “Ango awaco ni be, yai malo ikwany gibuto ni iko ot paco.”

²⁵Cucuto nono, icuo nono oko yai malo ki nyim gi kanono, di en eko tingo gikame oudo ebuto iye, di eko do ot paco di epako Rubanga.

²⁶Gin dedede kiko bedo kede ur atek; kiko donyo pako Rubanga kede lworo adwong twatwal di kiwaco be, “Tin doko oneno gikame nyen.”

²⁷Ki cen mere, Yesu oko donyo ooko, en eko neno ngarar esolo moro kame oudo nyinge Lebi, di etie bedo i ot me culo esolo. Yesu oko waco ne be, “Luba.”

²⁸Lebi oko yai, eko weko jame dedede, di en eko lubo Yesu.

²⁹Di do Lebi oko tedo ne Yesu ebaga adwong adikinicel i ode. Jorar esolo atot kede jo apat da oudo tie kede gi kuno kacam.

³⁰Iparisayon kede joe gi kame pwonyo Iswil oko cako ingungur di ki penyo josiao mege be, “Pinyo ber komio wun icamunu, doko imatunu da kede jorar esolo kede jodubo?”

³¹Yesu oko dwoko ne gi be, “Jo kame kom gi yot likame mo emuron, do jo kame tuwo en kame moe.

³²Ango likame abino pi lwongo jo kopoore, do pi lwongo jodubo me wek kiswilaro.”

³³Jo mogo oko waco ne Yesu be, “Josiao ka Yokana kanyo kec kede kilego dikdik, doko josiao me Iparisayon da timo kamanono; do megin camo di mato.”

³⁴Yesu oko penyo gi be, “In itwero mino wele kame tie i ebaga me nyom kanyo kec di pwodi eteran tie kede gi?

³⁵Do ceng bino tuno kame kobino tero kede eteran tenge kibut gi, di gin kiko donyo kanyo kec.”

³⁶Yesu oko tatamo ne gi agole moro da bobo be, “Likame tie ngat kame nyilo egoe anyen di eko dapo i kom egoe oti; ka etimo kamanono, egoe anyen bino nyil tenge, doko ecapa me egoe anyen nono udo likame riamakin kede egoe oti.

³⁷Doko da likame tie dano moro kame keto bwini anyen i isau me lau oti, pien ka etimo kamanono, bwini anyen bino mwoco isau me lau oti nono, di bwini mere ko ony, di lau nono ko dubere.

³⁸Pi mano, poore onyo bwini anyen i isau me lau anyen da.

³⁹Doko likame tie ngatamoro kame mito bwini anyen ka etieko mato bwini acon, pien ebino waco be bwini acon ber.”