Read kumam Luka 8 Bible Online

Luka 8 - kumam bible

Luka 8

¹Oyotoyot ingei mano Yesu oko donyo ririmo bomban kede calere, di etuco Kop Aber kame ekelo, kame mako Ajakanut ka Rubanga. Josiao mege tomon kiwie are da oudo tie upere kede,

²karacel kede mon mogo da kame bin eriamo tipere areco kikom gi, kede cango gi ki iponeso me tuwo apapat. Gin oudo kibedo Maria kame kolwongo be Magadalina, kame bin Yesu oriamo jwogi kanyaare ki kome,

³kede Joana dako ka Cusa ngagwok jamini ka Erode, kede Susana, kede do jo atot ace kame bin omio kony me gikame kitie kede but Yesu karacel kede josiao mege.

⁴Kakame bin ekodet me jo kowok ki bomban apapat ocokere kede karacel, Yesu oko cako yamo kede gi i agole di ewaco be:

⁵“Bin tie ngacuc moro kame ooto i poto mere cuno kodi; kakame oudo etie cuc kede, kodi mogo oko popoto i dier yongayo, tien jo oko nyonyono mago, di winy oko camo gi pit.

⁶Mogo bin oko popoto i lobo kobedo lela lela, i kare kame bin kodi nogo otui kede, kiko susunyo ner, piento lobo nono oudo otuo.

⁷Mogo bin oko popoto i dier okuto; i kare kame kodi nogo otui kede, okuto oko dongo kede gi oko twilo gi.

⁸Do kodi mogo bin oko popoto i lobo aber; kiko tui di kiko dongo, kiko lingo wit gi kame tie kede nyige tol acel.” Ingei yamo kop noni, Yesu oko yamo kede dwan amalo be, “Ngat kame tie kede yite, wek ewinyi.”

⁹Kakame josiao mege openye kede dwong me agole noni,

¹⁰en eko waco ne gi be, “Wun kotieko mino wu ngeno mung me Ajakanut ka Rubanga, do jo apat kobino yamo kede gi i agole, tetekeny akadi kineni, do likame kibino neno, doko akadi kiwinyi, do likame kiromo niang.”

¹¹Yesu oko waco be, “Dwong me agole no en ine ta: kodi en kop ka Rubanga.

¹²Kodi kopopoto i dier yongayo cungo pi jo kame winyo kop ka Rubanga, do Sitani bino ko kwanyo kop nono tenge ki cuny gi, tetekeny kur kiyei di kiko udo alako.

¹³Kodi kopopoto i lobo kame obedo lela lela cungo pi jo kame ka kiwinyo kop ka Rubanga, kigamo kede kilel; do kop nono likame ko keto aliasin i kuo gi, mio gi kiyei pi kare acecek, do kame atama moro obino, kiko poto ki yei gi.

¹⁴Do kodi kopopoto i dier okuto, cungo pi jo kame winyo kop ka Rubanga, do pi paro kede mito abar, kede kilel me kuo me i kare ni dio gi, di do anyakini gi likame ko twero cato.

¹⁵Aso, kodi kopopoto i lobo aber cungo pi jo kame ka kiwinyo kop ka Rubanga, kimako kitek i cuny gi, cuny kame tie kede ateni kede bero, doko kidio cuny gi tuno nyako nyige atot.

¹⁶“Likame tie dano moro kame cwinyo etala di bobo en eko umo kede ebukit, arabo di eko kano i dud itanda; do eketo kakame idelelei tetekeny jo kame donyo i ot twer neno lero.

¹⁷“Pien likame tie gimoro kame kokano kalikame kobino woto kakaler, doko likame tie gimoro me mung kalikame bino ngere di eko wok i lero.

¹⁸“Pi mano, ketunu tam wu i kom epone kame iwinyunu kede; pien ngat kame tie kede gimoro, kobino medo ne ace; do ngat kame li kede gimoro, kiton atitidi kame en etie kede da kobino kwanyo kibute.”

¹⁹Di do Toto me Yesu, kede imiegu mege oko bino bute, do likame kiko sobolo tuno kakame en oudo etie iye, pien ekodet oudo dwong.

²⁰Di ngatamoro oko waco ne Yesu be, “Toto ni kede imiegu ni tie cungo ooko, kimito neni.”

²¹Do Yesu oko dwoko ne gi be, “Toto na kede imiegu na en jo kame winyo kop ka Rubanga di kiko lubo.”

²²Ceng moro acel Yesu oko donyo i yi yee karacel kede josiao mege, di en eko waco ne gi be, “Ongolunu nam ootunu ber loka tetuca.” Di do gin kiko cako ot.

²³Do kakame oudo gin kitie kede kwang, Yesu oko donyo nino. Yamo atek oko cako buko i dier nam, di pii oko cako pong i yi yee, omio oudo kitie kede peko adwong.

²⁴Josiao mege oko ot bute di kiko cene di kiwaco be, “Apwony, Apwony, kara otienu to.” Yesu oko cei, di en eko coko yamo karacel kede ebuka, di yamo kede ebuka oko cungo, nam oko kwei.

²⁵Yesu oko penyo josiao mege be, “Wun do ber yei wu tie tuai?” Lworo oko mako gi di kiko bedo kede ur di kiyamo ken gi ken gi be, “Ngai ine kame coko kiton yamo kede ebuka da di kiko winyo dwane?”

²⁶Di Yesu karacel kede josiao mege oko kwang, kingolo loka di kiko tuno i lobo me jo Gerasene, kame oudo pimere kede Galilaya.

²⁷Kakame Yesu owok kede ooko i dog nam, en eko riamo kede icuo me bomba, dano kame oudo tie kede jwogi. Icuo nono oudo obedo pi kare alac di likame engapo igoen, doko likame oudo en ebedo i paco, do en oudo emaro bedo i wi atesin.

²⁸Kakame eneno kede Yesu, en eko kok di eko poto piny i nyime kanono, di eko lelemo di ewaco be, “Nyo ber kame in imito timo nango, in Yesu Wot ka Rubanga Ngamalo Twal? Akwai kede mwolo kur icana.”

²⁹En ewaco kamano pien oudo Yesu ociko tipo arac nono be wok tenge ki kome. (Pien i kare atot, oudo tipo arac nono make, di oko donyo dare adara di kotwee kede eriko kede epingo, do en oudo ecocoto gi di tipo nono ko mine eoto bedo i tim.)

³⁰Yesu oko penye be, “In nyingi ngai?” En eko dwoko be, “Ango nyinga Ekodet me isirikalen,” pien jwogi atot oudo otieko donyo i kome.

³¹Di kiko donyo bako ne Yesu dog gi be kur eriam gi kioti kidony i bur atut wiriwir.

³²Oudo bin esipan me ipegei mogo tie kuno cam i bad moru; di kiko donyo bako ne Yesu dog gi be ewek gi kioti kidonyi i kom ipegei nogo; en eko yei ne gi.

³³Di do kiko wokun ki kom icuo nono, di kiko ot donyo i kom ipegei nogo. Di do esipan me ipegei oko bwangere ringo lor piny i nam di kiko lwiny iye.

³⁴Kakame jo kame oudo kwao ipegei oneno kede gikame otimere, kiko ringo ot tatamo kop nono i bomba kede i calo da.

³⁵Jo bin oko ot neno gikame otimere, di do kiko bino but Yesu, kiko udo icuo kame jwogi oudo oyai ki kome nono di bedo piny i nget Yesu, di engapo igoen, di wie da odoko ber; lworo oko mako gi.

³⁶Jo kame bin oneno gikame otimere oko tatamo ne gi epone kame kocango kede icuo kame jwogi oudo bin tie i kome nono.

³⁷Di do jo dedede me adulion kame bin oluko piny me Gerasene[1] oko waco ne Yesu be eyai eot tenge kibut gi; piento lworo atek oudo otieko do mako gi. Di do Yesu oko donyo i yi yee eko dok.

³⁸Icuo kame oudo koriamo jwogi ki kome nono oko kwano Yesu be eyei ne eda upere kede. Do Yesu oko dagi ne di ewaco ne be,

³⁹“In dok paco di iko tatamo ne jo gikaber kame Rubanga otimo ni.” Di do icuo nono oko ot i kabedere dedede me bomba di etatamo ne jo twon gikame Yesu otimo ne.

⁴⁰Kakame bin Yesu odwogo kede, ekodet oko game, pien gin dedede oudo kitie dare.

⁴¹Icuo moro kame nyinge Yairo oko bino kuno, en oudo obedo ngatel me sinagoga; en eko poto piny i tien Yesu, di eko donyo bako doge ne Yesu be ot ture,

⁴²pien oudo etie kede nyare acel kenekene, kame mwaka mere romo tomon kiwie are, kame oudo iyapiyapi to. Kakame Yesu oudo tie ot kede, ekodet me jo oko donyo dire i kome ki bad dedede.

⁴³Oudo dako moro da tie i kom gi kame oudo tie kede tuwo kame omio remo obedo ony ki kome pi mwakini tomon kiwie are, do di ngatamoro likame oko twero cange, bed bala oudo edudubo lim mere dedede but imuroko.

⁴⁴En eko bino ki cen ngei Yesu, di eko mulo lak egoe ka Yesu, cucuto di mol me remo mere nono oko cungo.

⁴⁵Yesu oko penyere be, “Ngai komula?” Di bin jo dedede odagi, Petero oko waco ne be, “Adwong, ekodet me jo opong kan oluki, gin en kame kitie didio in!”

⁴⁶Do Yesu oko waco be, “Tie ngat komula; pien ango aniang be twer oyai tenge ki koma.”

⁴⁷Kakame dako nono oniang kede kiber be kotieko ngene, en eko bino kede mielkom, eko poto piny i nyim Yesu. Di do en eko cako tatamo i nyim jo dedede gikame omio en emulo Yesu, kede epone kame en eko cango kede cucuto nono.

⁴⁸Yesu oko waco ne be, “Nyara, yei ni ocangi, ot kede mulem.”

⁴⁹Do di pwodi oudo etie yamo, icuo moro kowok ki paco me ngatel nono oko bino di eko waco be, “Nyari otieko to, kur bobo imeede lolo apwony.”

⁵⁰Do kakame Yesu owinyo kede kop nono, en eko waco ne Yairo be, “In kur ibed kede lworo; kenekene bed kede yei, di en eko bino doko ber.”

⁵¹Kakame Yesu otuno kede i ot, likame eko yei ne ngatamoro donyo kede en i ot, kwanyo kenekene Petero, Yokana, kede Yakobo, karacel kede papa kede toto me atin.

⁵²Jo dedede oudo tie koko atin kitek; do Yesu oko waco ne gi be, “Kur ikokunu, en gire likame eto, do enino anina.”

⁵³Gin kiko donyo nyere, pien oudo kingeo be atin otieko to.

⁵⁴Do Yesu oko mako cing atin nono di eko waco ne be, “Atin, yai.”

⁵⁵Di cuny atin oko dwogo, esawa nono en eko yai malo; di Yesu oko waco be mi atin nono gimoro ecami.

⁵⁶Jonywal mege oko bedo kede ur atek; do en eko ciko gi be miero kur kiyami ne ngatamoro gikame otimere.