Read kumam Iswilia 10 Bible Online

Iswilia 10 - kumam bible

Iswilia 10

¹“I kare nono Rwot oko waco nango be, ‘Pai kide abatal are bala me agege ka di iko timo sanduku me ebao me keto gi, di in iko yito malo i wi moru buta kan.

²Ango abino wandiko i kom kide nogo kope kame bin awandiko i kom maka kame in iko ngingido nogo, di do in iko bino keto gi i sanduku nono.’

³“Aso, ango ako timo sanduku kede ebao me yat akasia, di ako pano kide are kame cal bala bin me agege, di ako mako gi aoto kede gi malo i wi moru.

⁴Di Rwot oko wandiko i kom kide nogo kope kame bin en ewandiko me agege noka, gin en cik tomon kame bin en emio wu i kare kame en eyamo kede wun ki dier mac i ceng kame wun icokerenu kede i dud moru. Rwot bin oko mina kide nogo

⁵di ango ako dwogo piny ako keto gi i sanduku kame bin ango atimo, bala kame oudo Rwot ociko; gin pwodi kitie kunono.”

⁶(Jo me Isirael bin oko yai ki kulo me jo Jakan di kiko ot Mosera. Aaron bin oko to kunono di oko yike kunono da; Eleasar wode en kame bin oko lunyo wange bala ngasaseredoti.

⁷Gin kiko yai ki kunono di kiko ot Gudugoda, doko kiko yai ki Gudugoda di kiko ot Yotobata, lobo kame bin tot kede pie kame mol.

⁸I kare nono Rwot bin oko yero jo me ekeko ka Lebi pi gin bedo jo kame tingo Sanduku me Isikan, pi gin timo tic mere bala josaseredoti, kede pi gin lamo ne jo winyo i nyinge. Magonogo en kobedo tice gin tuno tin.

⁹Manono en komio jo me ekeko ka Lebi likame bin kopoko negi lobo bala jo me ikekon apat; gikame bin komio gin en winyo me bedo josaseredoti ka Rwot bala kame Rwot Rubanga wu bin ocikere kede but gi.)

¹⁰“Ango bin ako bedo i wi moru tieko ceng ot ongwon bala kame bin atimo i kare me agege. Rwot bobo oko winyo kwac na di eko yei weko muducaro wu.

¹¹Rwot oko waco na be, ‘Yai do imeedenu kede ot di in en kame itelo ne jo yongayo, tetekeny kioti di gin kiko mano lobo kame bin ango akwongere pire but joakwari gi be abino mino gi.’

¹²“Aso, wun jo me Isirael, nyo kara kame Rwot Rubanga wu mito ne wu timo? Rwot mito ne wu bedo kede lworo bute, timo gi dedede kame en emito, mare, timo ne tic kede cunyu dedede kede kuo wu lung,

¹³kede lubo cik kede iswilia mege kame tin ango atie mino wu, tetekeny ibedunu kiber.

¹⁴Nenunu, malo dedede obedo me ka Rwot; piny da kede gi dedede kame tie iye obedo mere.

¹⁵Do cuny Rwot bin oko bedo i kom joakwari wu di en eko maro gin kenekene, eko yero wun ikwae gi kikom jo dedede me wi lobo, bala kame tin pwodi etie kede.

¹⁶Pi mano, cako nataman ot anyim poore ilubunu kop ka Rwot di ikounu jiko epali.

¹⁷Pien Rwot Rubanga wu dwong kalamo rubangan apat dedede, doko etie kede twer kame kalamo me rwode dedede. En Rubanga kame dwong, etie kede twer doko epoore alwora. En likame etie kede apokapoka doko likame Egamo cemusana.

¹⁸Nakanaka en eneno be jo ogwoko twero me idwe kic kede apuserun; en emaro jokumbor, doko emio gi cam kede igoen.

¹⁹Wuda poore imarunu jokumbor, pien wuda bin ibedunu jokumbor i lobo me Misiri.

²⁰Poore ibedunu kede lworo but Rwot Rubanga wu di iworenu en kene; mokunu i kome doko kwongerenu kede nyinge kenekene.

²¹Poore ipakenu; en ebedo Rubanga wu, ngat kotimo ne wu jamini adongodongo kame kelo lworo, kame wun inenunu kede wangu.

²²Joakwari wu riki ooto Misiri di gin jo ot kanyaare kenekene, do nataman Rwot Rubanga wu otieko mino wun idokunu tot bala acer kame tie i edou.