Read kumam Iswilia 13 Bible Online

Iswilia 13 - kumam bible

Iswilia 13

¹“Inabin arabo jo kame gonyo dwong me lek romo bino di gin kiko cikere butu pi timo ne wu gianena moro arabo gi me isuur,

²pi mito parao wu donyo woro kede timo tic ne rubangan apat kalikame wun ingeunu. Akadi di gianena kede me isuur kame gin oudo kicikere iye pi timo nogo di ko timere ateteni,

³kur igamunu kop gi. Pien Rwot Rubanga wu udo tie tic kede gin pi tamo wu; en emito ngeno ka wun ateteni imarenu kede cunyu dedede kede kuo wu lung.

⁴Poore ilubunu Rwot Rubanga wu doko bedunu kede lworo bute en kene. Lubunu cik mere kede gikame en ewaco; worenu doko mokunu i kome.

⁵Do poore inekunu inabin nogo arabo jo nogo kame gonyo dwong me lek, pien gin kiwaco ne wu be ijemunu ne Rwot Rubanga wu, ngat kokwanyo wu ki Misiri kakame bin ibedunu iye ipasoi. Gin kimito mino wu iparaunu tenge ki kuo kame Rwot Rubanga wu ociko wu be ibedunu iye. Wun miero inekunu dano nono tetekeny ikwanyunu gikarac nono tenge kibutu.

⁶“Akadi ka omini kikokome, arabo wodi amoto nyari, arabo dako ni kame imaro amoto adieruni kiyapiyapi kedi, oko waco ni i mung be iotunu woro rubangan apat, rubangan kame wun akadi joakwari wu da likame oudo ngeo,

⁷rubangan mogo me atekerin koluko wu, akadi di gin kitie iyapiyapi kede wu arabo kitie kakame bor kede wu,

⁸kur iyeunu kop ka dano nono. Kur ibedunu kede cuny me kisa bute arabo itimunu ne mwolo, doko kur imungenu.

⁹Poore inekenu! In kikomi ibino cako dipe kede kidi, di do jo apat dedede ko didipo en.

¹⁰Didipunu en tuno neke piento en etamo mito loko wu tenge kibut Rwot Rubanga wu, ngat kame bin okwanyo wu ki lobo me Misiri, kakame bin ibedunu iye ipasoi.

¹¹Ka jo me Isirael dedede owinyo gi kotimere nono, gin kibino bedo kede lworo di likame tie dano moro bobo kame ko bino timo gikarac kacal kamanono.

¹²“Kame wun itienu do bedo i bomban kame Rwot Rubanga wu tie mino wu, cengemogo iromunu winyo

¹³be jo mogo kame kony gi li i ateker wu otieko mino jo me bomba gi oparao tenge woro rubangan kalikame wun ingeunu;

¹⁴ka iwinyunu kop moro kame cal kamanono, wapunu yore kiber. Ka ikounu udo be gikarac kacal kamanono kotieko timo i diere wu,

¹⁵ibinunu neneko jo me bomba nono dedede; poore imuducarunu bomba nono atwal atwala karacel kede gi dedede kame tie iye, kiton leini apita dedede.

¹⁶Jamini dedede me jo kame bedo i bomba nono wun ibinunu coko karacel kakaler me dier bomba. Di do ikounu wango bomba nono kede jamini kame tie iye dedede, bala giayala kame kowango dedede but Rwot Rubanga wu. En ebino dong di etie ameje nakanaka, likame bobo kobino gere.

¹⁷Kur iwekunu gimoro kame kopoore dudubo dong ne wu, tetekeny lilo ka Rwot kwei di eko timo ne wu kisa. En ebino timo wu mwol di eko mino wel wu meede bala kame bin en ecikere kede but joakwari wu.

¹⁸Rwot bino timo ne wu kamanono ka wun ilubunu cik mege dedede kame tin ango amio wu, di itimunu gikame en emito.”