Read kumam Iswilia 14 Bible Online

Iswilia 14 - kumam bible

Iswilia 14

¹Musa oko waco ne jo me Isirael be, “Wun ibedunu idwe ka Rwot Rubanga wu. Pi mano, kame ikokunu joe wu oto, kur ingongolunu komu arabo ikebunu nyimu bala kame jo apat timo.

²Pien wun ibedunu jo ka Rwot Rubanga wu; en etieko yero wun kikom jo me wi lobo lung pi bedo jo mege kikokome.

³“Kur icamunu gimoro me kwer.

⁴Leini kame wun iromunu camo en gin ige, diang, oromo, diel,

⁵atil, amiem, emalet, kede amor.

⁶Leini dedede kame abelekek gi okakarun di kinyogao nyamo gikame oudo kitieko mwonyo wun ikarununu camo.

⁷Do kikom leini kame nyogao nyamo gikame oudo kitieko mwonyo arabo kame abelekek gi okakarun, likame ibinunu camo magi: aguragura, apuo kede enyuru. Bed bala gin kinyogao nyamo cam kame oudo kitieko mwonyo do abelekek gi likame okakarun; kibutu gin kibedo leini kopwokere.

⁸Kur icamunu epege da, pien bed bala en abelekek mere okakarun, do en likame enyogao nyamo cam; kibutu en ebedo le kopwokere. Kur icamunu leini nogi arabo imulunu gi ka kito.

⁹“Kikom giakuo dedede kame bedo i pii, ibinunu camo kame tie kede isigigir kede abokoya,

¹⁰do gi dedede kame bedo i pii di likame kitie kede isigigir kede abokoya likame ibinunu camo; kibutu gin kipwokere.

¹¹“Wun iromunu camo winy dedede kalikame opwokere.

¹²Do likame ipoorenu camo magi: ekokom me egere dedede, acut kede winy ace kame cal kede, ebum, etori, agak, ekululu, ekeng me epone apapat, abong, etukiri me epone apapat, atudoi me nam, etolut kede winy ace kame cal kede en, kede olikolik.

¹⁹“Giakuo dedede atitino kame kitie kede bwom gi, kibutu gin kibedo gi kopwokere; kur icamunu gi.

²⁰Ikarununu camo giakuo atitino kame tie kede bwom gi do di likame kipwokere.

²¹“Kur icamunu le moro oto atoa. Iromunu mine but jokumbor kame bedo kede wu di gin kiko came, arabo iromunu cate but jokumbor kobedo wele. Pien wun ibedunu jo ka Rwot Rubanga wu. “Kur itedo ringo me atin diel kede cak ka toto mere.

²²“Poore ipokunu tenge acel me tomon me cam kame icokunu ki poti wu buli mwaka.

²³Di ikounu ot kabedo kame Rwot Rubanga wu bino yero pi wun wore iye, ikounu camo ki kunono acel me tomon me kal wu, bwini wu, mo me olibeti wu, karacel kede idwe kao me doke, diegi kede romini wu. Poore itimunu kamanono tetekeny ipwonyerenu bedo kede lworo but Rwot Rubanga wu nakanaka.

²⁴Do ka kabedo nono bor twatwal di in likame ikaruno yeno acel me tomon me cam kame Rwot Rubanga ni omii pi tero kunono,

²⁵in iromo cate di iko tero sente kunono.

²⁶Wil jamini kame in imito kede sente nono. Iromo wilo dok, romini, bwini, kongo akec arabo gimoroni kame in imito. Di in kede jo me odi ikounu cam i nyim Rwot Rubanga wu di ilelunu.

²⁷“Kur ijalunu Jolebi kame bedo i bomban wu, pien gin kili kede lobo kame opoko negi arabo jamini kame mako gi.

²⁸I atiekini me buli mwaka me adek ibinunu tero acel me tomon me cam kame icokunu i mwaka nono di ikounu kete i dero me bomba wu.

²⁹Cam nono Jolebi en kame bino camo pi gin kili kede lobo arabo jamini kame mako gi, karacel kede jokumbor, idwe kic, kede apuserun kame bedo i bomban wu. Gin kikaruno bino di kiko kwanyo cam kame romo gi. Timunu kamanono di Rwot Rubanga wu ko bino mino wu winyo i gi dedede kame wun itimunu.