Read kumam Iswilia 15 Bible Online

Iswilia 15 - kumam bible

Iswilia 15

¹“I atiekini me buli mwaka me kanyaare ibinunu jalo ne jo banyi kame kitie kede.

²Ibinunu timo kaman: ngat acelacel kokopo sente but dano me Isirael wad gi poore jal banya nono; miero kur eburao sente nono, pien Rwot kikome otieko waco be banyi kopoore jalo.

³Iromunu burao banyi wu kame tie but jokumbor, do miero kur iburaunu banyi wu kame tie but jo me Isirael wadu.

⁴“Rwot Rubanga wu bino mino wu winyo i lobo kame en etie mino wu nono. Likame tie ngatamoro kikomu kame bino bedo kede rem me gimoro

⁵ka wun ilubunu kop mere di ikounu keto cunyu gwoko cik mege dedede kame tin ango atie mino wu.

⁶Ka Rwot Rubanga wu otieko mino wu winyo bala kame bin en ecikere pi timo, wun ibinunu kopo sente but atekerin atot, do wun likame ibinunu ot kware but ateker moro; wun ibinunu pugo atekerin atot, do gin likame kibino pugo wu.

⁷“Ka i bomba wu moro i lobo kame Rwot Rubanga wu tie mino wu, tie iye dano wadu moro me Isirael kame tie kede rem me gimoro, kur ibedunu kede woro di ikounu dagi konye.

⁸Do poore ibedunu kede cuny aber di ikounu mine sente kame romo konye udo gi korem ne.

⁹Poore igwokerenu kur ibedunu kede cuny me woro di ikounu neno dano me Isirael wadu kede wang arac ikounu dagi mine gimoro, be pien mwaka me kanyaare kame kojalo ne kede jo banyi onoko. Ka idagunu kope, en ebino kok i komu but Rwot, di wun ikounu bino bedo kede raco i nyim Rwot.

¹⁰Ka imio omini gimoro, poore imie kede cunyi lung, doko abongo ingungur, pien manono bino mino Rwot Rubanga wu mi winyo i gi dedede kame itimo.

¹¹Bala kame jo kame tie kede rem likame bino tiek kede ki wi lobo, ango aciko wu pi bedo kede cuny aber but jo me Isirael wadu kame jocan kede kame rem tie negi.

¹²“Ka in iwilo Ngaeburania moro bala epasoit arabo apasoit di eko timo ni tic pi mwakini kanyape, i mwaka me kanyaare mere in ibino gonye di eko ot abongo en mino cul moro.

¹³Kame in igonye, kur iweke eoti kede cinge nono abongo gimoro.

¹⁴Poore imie jamini kede cunyi lung kikom jamini kame Rwot omii: diegi, romini, engano kede bwini.

¹⁵Yutununu be wuda bin ibedunu ipasoi i lobo me Misiri, di Rwot Rubanga wu oko lako wu; manono en komio ango tin atie mino wu cik noni.

¹⁶“Do ka en eko waco ni be, ‘Ango likame abino weki,’ piento en emari karacel kede jo me odi, pi kite kame iterenu kede kiber,

¹⁷in ibino mine ecungo i nget ekeko me odi di in iko tuco del me yite, di en eko doko epasoit nin atwal. In ibino timo kamanono da kede apasoit ni.

¹⁸Kur iterunu be etie peko butu ka igonyunu ipasoi wu, pien gin kibedo timo ne wu tic pi mwakini kanyape i wel me cul kame tie dul me sente kame koculo kede epakasit. Timunu kamanono di Rwot Rubanga wu ko bino mino wu winyo i gi dedede kame itimunu.

¹⁹“Pokunu tenge ne Rwot Rubanga wu idwe kao me doke, diegi kede romini wu; kur itimunu tic moro kede doke nogo akadi romini da kur inyarunu yer gi.

²⁰Wun kede jo me ude wu ibinunu camo gi i nyim Rwot Rubanga wu i kabedo kame Rwot oyero me jo wore iye.

²¹Do ka tie gimoro arac kede le nono, ka engwalo arabo wange oto amoto etie kede peko moro adwong i kome, likame ibinunu yale but Rwot Rubanga wu.

²²Wun iromunu camo le kame cal kamanono i paco. Jo dedede romo came, arabo kipwokere amoto li, bala kame icamunu kede atil arabo amiem.

²³Do kur icamunu remo gi, poore ionyunu gi piny bala pii.