Read kumam Iswilia 21 Bible Online

Iswilia 21 - kumam bible

Iswilia 21

¹“Ka oko udo dano moro kame koneko i lobo kame ango abino mino wu, do di likame ingeunu dano koneke,

²joadongo wu kede jongolkop bino ot di kiko pimo boro me piny yai ki kakame nek otimere iye ot i buli bomba kiyapiyapi kanono.

³Di do joadongo me bomba kiyapiyapi kede kanono kalamo bomban apat ko kwanyo roya atakit kalikame pwodi kotweo i ayoko,

⁴di kiko tere osamai amol di likame edwono, kabedo kalikame pwodi kopuro amoto pito iye gimoro, di gin kiko bino turo ngut atakit nono i dog osamai kunono.

⁵Di do josaseredoti Jolebi ko ot kunono gida, pien Rwot Rubanga wu oyero gin pi timo nen tic kede pi kwano ne jo mulem; kope dedede me piem kede asura gin en kame kitieko.

⁶Di joadongo dedede me bomba kiyapi kede kakame nek otimere iye nono ko bino lwoko cing gi i kom atakit kame koturo ngute osamai nono,

⁷di kiwaco be, ‘Likame wan en kame oneko dano noni, doko da likame oneno di kotie neke.

⁸Okwe Rwot, sasiro jo ni me Isirael, jo kame bin ilako ki Misiri; kur iwek i wi wa raco me onyo remo me dano ali kede raco moro.’

⁹Aso, ka itimunu gikame Rwot mito, likame kobino maro remo me nek nono i wi wu.

¹⁰“Ka wun iotunu i yi kede jokwor wu di Rwot oko mino gi i cingu, di ikounu mamako gi,

¹¹di in icuo moro iko neno i kom mabus nogo dako moro acil kame cunyi wai nyomo,

¹²in ibino tero dako nono turi, di dako nono ko lielo wie, eko kulo lwete,

¹³kede eko loko igoen kame komake kede. En ebino bedo turi di eko koko papa mere kede toto mere pi duwe acel; ingei manono in ikaruno do mine edoko dako ni.

¹⁴Do ka i cen mere cunyi oko kwanyere ki kome, in ibino jale eoto abongo in gamo cul moro. Likame ipoore tere bala apasoit, pien in idwoko dwongo mere piny.

¹⁵“Ka icuo tie kede mon are, do di acel en kame emaro kibut gi, di gin dedede kiko nywalo idwe awobe, do di awobi kao oko bedo me dako kalikame komaro,

¹⁶ka ceng oko tuno me en popoko jame mege but awobe mege, en miero kur elengere but awobi me dako kame en emaro di eko mine iner me jame kame atin kao poore tero, en wot ka dako kalikame cunye maro.

¹⁷Miero en eyei be wot ka dako kalikame cunye maro en obedo awobi kao; epoore mine iner adwong kalamo, bala kame awobi kao poore udo, piento en ebedo kao mere, twero me atin kao obedo mere.

¹⁸“Ka ngatamoro tie kede wode angaepali kede angajemo, awobi kalikame winyo jonywal mege akadi di kimie alola,

¹⁹jonywal mege bino make di kiko tere i bomba kame en ebedo iye, di kiko pide i nyim joadongo me bomba nono i ekiko abedo i erute me bomba.

²⁰Gin kibino waco ne joadongo me bomba nono be, ‘Wod wa ni ngaepali doko engajemo; etieko dagi winyo kop wan. En etieko doko ngacam doko en engamera.’

²¹Di do jo dedede me bomba ko bino didipo en kede kide tuno to. Manono bino mino ikwanyunu tenge raco noni ki diere wu; jo dedede me Isirael kame bino winyo bino bedo kede lworo.

²²“Ka komako ngatamoro pi tim arac kamio kopoore neke, di oko neke, di ikounu liero kome i kor yat,

²³likame liel mere poore dong iwor kiakia i kor yat nono; ipoorenu yike cenge nono, pien dano oto kame liero i kor yat kelo ilam ka Rubanga. Kur imunaununu lobo kame Rwot Rubanga wu tie mino wu pi bedo meru.