Read kumam Iswilia 22 Bible Online

Iswilia 22 - kumam bible

Iswilia 22

¹“Ka ineno diang amoto oromo me dano wadu me Isirael di orwenyo etie ot atatai, kur iweke aweka, make iko tero ne wone.

²Do ka wone bedo kakabor kedi, arabo ka likame ingeo wone, in ibino tere turi di iko kure tuno wone udere di iko dwoko ne.

³Ibino timo kamanono da ka iudo punda, amoto egoe, amoto gimoro dedede kame dano wadu me Isirael orwenyo; kur idagi timo kony.

⁴“Ka diang amoto punda ka dano wadu me Isirael opoto piny, kur inene anena, kony wone kiarao en.

⁵“Mon likame poore ngapo igoen me cuo, doko da likame cuo poore ngapo igoen me mon, Rubanga cunye dagi jo acal kamanono.

⁶“Ka iudo ot me winyo i wi yat arabo piny i lobo, di winyo tie rukumo idwe mege arabo di etie buto i abeon mege, kur imak winyo nono karacel kede idwe mege.

⁷Itwero tero idwe winy, do kur iter toto gi, weke eoti tetekeny gi dedede bed ni kiber di iko bedo kuo pi kalac.

⁸“Ka igero ot anyen, ger apama agalao wi ot kat malo; manono bino mino ka ngatamoro opoto ki wi odi di eko to, likame kop me to mere bino maki.

⁹“Likame ibino puro olok karacel kede kodi ace apat i poto acel; ka in itimo kamanono ibino jalo olok karacel kede kodi nono dedede.

¹⁰“Likame ibino tweno twon karacel kede punda i ayoko acel pi pur kede gi.

¹¹“Likame ipoore ngapo egoe kame kotimo kede ausin are apat, ausi acel kobedo yer me oromo kede apat kobedo ausi me egoe aliamaliam.

¹²“Ipoore kuno eula i isondana ongwon me ekanso ni.

¹³“Ka icuo onyomo dako di i cen mere eko lokere dage ingei en buto kede dako nono,

¹⁴di eko donyo dubo nyinge kede pido me abe di ewaco be, ‘Ango anyomo dako noni, do kakame abuto kede, likame ako udo gikame nyuto be en ebedo nyako kalikame pwodi ongeo icuo.’

¹⁵Ka manoni otimere, papa me nyako nono kede toto mere bino tero esuka me nyom kame remo opwoko but joadongo me bomba, i ekiko abedo i erute me bomba; manono bino bedo gikame nyuto be nyako nono oudo likame pwodi ongeo icuo kakame enyomere kede.

¹⁶Papa me nyako nono bino waco ne joadongo be, ‘Ango amio icuo ni nyara eko nyomo, do nan elokere dagi nyako noni.

¹⁷En etieko kelo pido me abe i kom nyako noni di ewaco be nyako noni oudo otieko cako buto kede icuo kakame en enyome kede. Do tie gikame nyuto be nyako ni oudo pwodi likame obuto kede icuo; wuda nenunu remo atie i esuka me nyom!’

¹⁸Joadongo me bomba nono ko bino tero icuo nono di kiko dane.

¹⁹Gin kiko bino tange sekel tol acel me siliba, di eko culo but papa me nyako nono, pien udo en edubo nying nyako me Isirael konyomere di pwodi likame ebilo buto kede icuo moro. Nyako nono bino dong dako mere; likame kobino yei ne pokere kede nyako nono i kare me kuo mere lung.

²⁰“Do ka pido mere nono obedo kop me ateni, di likame tie gimoro atwero nyuto be nyako nono oudo pwodi likame ongeo icuo kakame konyome kede,

²¹gin kibino tero nyako nono i ekeko me ot ka papa mere di cuo me bomba ko didipo en kede kide tuno to, pien udo en etimo gi me lewic i Isirael i yore me en buto kede icuo di likame pwodi konyome. Manoni en epone kame ibinunu kwanyo kede gikarac noni ki diere wu.

²²“Ka komako icuo di etie buto kede dako me icuo ace, kopoore neko gin dedede. Manoni en epone kame ibinunu kwanyo kede gikarac noni ki Isirael.

²³“Ka kotieko nero nyako moro pi nyomo, di icuo moro oko riamo kede i bomba di oko buto kede, ka komako gi,

²⁴ibinunu tero gin dedede i erute me bomba di ikounu didipo gi kede kide tuno to; kobino didipo dako piento en edagi gono duru; kobino didipo icuo piento en ebuto kede dako kame kotieko nero pi nyomo. Manoni en epone kame ibinunu kwanyo kede gikarac noni ki diere wu.

²⁵“Do ka icuo oriamo kede dako kame konero pi nyomo obar kakoling, di do en eko make di eko buto kede tetek, mano bino mino koneko icuo kenekene.

²⁶Likame ibinunu timo ne nyako nono gimoro, pien likame etimo gimoro apoore mino koneke; pido noni cal bala me ngat kosuro dano ace di eko neko.

²⁷Kite kame ebuto kede nyako nono tetek i itela kakame jo li iye, akadi di nyako nono oudo ogo duru, likame tie dano kame oudo twero konye.

²⁸“Ka icuo oriamo kede nyako apwodi lem likame ongeo icuo di eko make tetek di eko buto kede, kame oko mako gi

²⁹icuo kobuto kede nono bino culo papa me nyako nono sekel ot kany me siliba, di eko tero nyako nono doko dako mere. Etie kamanono piento en ebuto kede nyako nono tetek. Likame iswil yei ne pokere kede dako mere nono tuno to.

³⁰“Likame icuo moro poore buto kede dako ka papa mere di eko kelo ne papa mere lewic.”