Read kumam Iswilia 23 Bible Online

Iswilia 23 - kumam bible

Iswilia 23

¹Musa oko meede kede mino iswilia be, “Likame tie icuo moro kame nyige mane oloi arabo kame mane ongol kame kopoore maro i ekodet me jo ka Rwot.

²“Dano kame konywalo di papa mere kede toto mere likame onyomere iepone kame komito, likame kobino maro i ekodet me jo ka Rwot, akadi kiton ikwae kede ikwae gi tuno i kom ikwae me tomon da.

³“Likame tie dano moro me Amon amoto me Moab kame kobino maro i kom ekodet me jo ka Rwot, akadi kiton ikwae kede ikwae gi tuno i kom ikwae me tomon da,

⁴pien bin gin kidagi mino wu cam kede pii i kare kame bin iyaunu kede ki Misiri di itienu ot; doko da medo i wi manono, gin kiko pango Balaam wot ka Beor, dano me Petor, en bomba atie Mesopotamia, pi lamo wu.

⁵Do Rwot Rubanga wu oko dagi winyo kop ka Balaam; Rwot Rubanga wu oko lokere mino wu winyo akaka lamo wu, pien Rwot oudo maro wun.

⁶Kur itimunu gimoro kame bino konyo arabo mino atekerin nogi mulem.

⁷“Kur idagunu jo me Edom, pien gin kibedo joawade wu; doko da kur idagunu jo me Misiri, pien bin wun ibedunu i lobo gi di wun jokumbor.

⁸Kotwero maro i kom ekodet me jo ka Rwot ikwae gi cako ki kom ikwae me lwak me adek.

⁹“Ka iotunu pi yi kede jokwor wu, miero inenunu be kakame igerunu iye kimere wu obedo di li kede pwokere moro i nyim Rwot.

¹⁰Ka icuo moro oleko iwor di eko onyo kwir mere me icuo, di do eko doko dano kopwokere, miero eyai di eko ot tenge me kakame kimere tie iye. Likame epoore dwogo kakame kimere tie iye.

¹¹Kame piny oyuto, en eko bino bol di do eko dok kakame kimere tie iye ka ceng odonyo.

¹²“Ipoorenu bedo kede karamoro tenge me kimere kame itwerunu ot konyere iye.

¹³Isirikalen bino mako esululu bala gi acel kikom jamini kame gin kiupere kede i kom gi. Kame dano mito ot obar, en ebino kunyo piny kede esululu di eko umo bur nono kame etieko ot obar.

¹⁴Gwokunu kakame kimere wu tie iye bed di cil i nyim Rwot, pien Rwot Rubanga wu tie kede wu i kimere wu pi gwoko wu kede pi mino wu bwono jokwor wu. Kur itimunu gimoro kalikame poore kame bino mino Rwot lokere tenge kibutu.

¹⁵“Ka epasoit moro olwi kibut ngadwong mere i piny me kumbor di eko bino gwokere butu, kur idwokenu but ngadwong mere.

¹⁶Gin kikaruno bedo i bomba moro kenekene kame cuny gi oyero i diere wu; likame ipoorenu tero gi kirac.

¹⁷“Likame ngatamoro kibutu, icuo amoto dako, poore doko malaya kame buto kede jo i tempulo.

¹⁸Sente kame koculo but dako malaya pi buto kede, arabo kame koculo but icuo pi buto kede, likame kopoore tero i ot ka Rwot Rubanga wu pi cobo cikere kame dano oudo omio.

¹⁹“Ka ikopo sente amoto cam arabo gimoro ace but dano me Isirael wadu, kur imie ecul gi nono kede bobo magoba i wie.

²⁰Ka ikopo gimoro but ngakumbor, itwero mine eculo gi nono kede magoba i wie, do ka ikopo but dano me Isirael wadu, likame ipoore mine culo gi nono kede bobo magoba i wie. Ka ilubunu cik noni, Rwot Rubanga wu bino mino winyo i gi dedede kame itimunu i lobo kame ibinunu donyo di ikounu bedo iye bala meru.

²¹“Ka isikano pi mino amoto timo ne Rwot Rubanga ni gimoro, kur imed kare me cobo cikere ni, pien Rwot Rubanga ni ateteni mito be icobe; ka likame iko cobe udo itimo dub.

²²Do ka likame itimo cikere moro but Rwot, udo likame tie raco moro kame iyaro bedo tie kede.

²³Gi dedede kame dogi yamo abongo adiadia moro miero icob gi.

²⁴“Ka idonyo i poto me olok ka ngatamoro, in itwero camo anyakini me olok tuno romi, do likame ipoore rwako mogo i isau pi tero.

²⁵Ka idonyo i poto me bel ka ngatamoro, itwero gigito wite kede cingi pi nginyo nyige mege me amwoda, do likame ipoore ngolo wi bel moro kede pala.”